Read Kahua LUKA 7 Bible Online

LUKA 7 - Kahua bible

LUKA 7

¹Matena o Jesu i visigi hato na tarani ngegana tangara na enoni, ngaia ki râ i Kapenamu.

²I ngekana ki oga igê ta na mane ni me ni Roma. Ngaia ki nahunia na kariana, ma ki takuia bâraha. Na kariana ngekana ki maeha ma ki sugi meme noga.

³Matena na araha iata na mane ni me ki rongo tarohana o Jesu, ngaia ki hagatorangenira tanga o Jesu tani na meraha, ga Siu, hanana vi ga nungia, ki arâ me ma ki rikia na kariana.

⁴Ngaira ka râ i pasina o Jesu, ma ka nungia bâraha nga, ka vi: “Na araha iata na mane ni me ngekana ki ararigo ngavê, vigo tamania.

⁵Ngaia ki takuigia na Siu, ma ngaia marena ki takoha renia na ruma ni sukuru ma ki torea tangagami.”

⁶Vikê o Jesu ki râ henira. Ngaia ki hagarangia noga na ruma, matena na araha iata na mane ni me ki hagatorangenira tani na tamana, hanana vi ga vi tanga, ka vivi: “Araha, siana ko hagame apemu. I pe ararigo, vi gu arâ me i pasiku.

⁷Ma ki pe ararigo nikâ, ve inê be arâ vê i pasimu inê mareku. Gu tamasi ma, ma ke komaga na kariaku.

⁸Inê nikâ na mane, gê oga i ruguhana na araha raha iata na mane ni me; ma inê kê nahunira na mane ni me i ruguhaku. Inê kê bonasia tani, kê vivi, ‘Gu râ’, ma ngaia ki arâ. Inê kê bonasia tani, kê vivi, ‘Me’, ma ngaia ki arâ me. Minê kê bonasia na kariaku, kê vivi, ‘Tagarahia na marâ ikê’, ma ngaia ki tagarahia.”

⁹O Jesu ki kone, matena i rongoa, i tamasi vikana. Ngaia ki ahoro râ, ma ki vi tangara na enoni, ga takua, ki vi: “Be vi tangagamu: inê ki mamênga, vi ve tarahua na enoni, ge tongesuri gatagata manga na mane ikê, ma i pasita na Isiraelita ki mareha rârâ nikâ!”

¹⁰Na mane, ga tora tamasinga, ka aporo i pasina na araha iata na mane ni me, ma ka tarahua na kariana, i komaga.

¹¹I na kere matena i muri o Jesu ki râ i ta na hinua, i Naini na atana. Na kariana ma na enoni rako ka takua.

¹²Matena o Jesu ki sugi banu noga i hinua, na akêkuha ka hura me, hanana vi ga naka na enoni. Na mane i me ngekê ki na kare i tage iana na gete, i nâ. Ma na enoni rako i hinua ka takua.

¹³Matena na Araha ki bâsia, ngaia ki takuia bâraha, ma ki vi tanga, ki vi: “Siana ko angi.”

¹⁴Ma ngaia ki râ ma ki hataria na bea, i tâ igê na mane, i me, ma na mane, ga tugia na gahua, ka me ura so. Mo Jesu ki vi: “Vego! Gê vi tangago, gu aharaga!”

¹⁵Ma ki aharaga na mane, i me, ma ki haganega ki tamasi, mo Jesu ki vatea aporo tanga kenana.

¹⁶Na enoni hato ka bubununuga bâraha, ma ka visia raha God, ka vi: “E, na poropete raha kani vora me i pasika!” Ma ka vi nikâ: “God ki bani râ me, ki hagatahira na kariana!”

¹⁷Na taroha ngekê renia o Jesu ki râ surigi na ara ni hinua i Jutea ma surigi na agua hato rihia.

¹⁸Na kariana o Joane ka hagarongoa renigi na marâ hato ngegê. O Joane ki unirerua me i pasina na vererua na hitangita na kariana.

¹⁹Ngaia ki hagatorangenirerua tanga na Araha, hanana vi garu hagatea, karu vivi: “Igo vari ka no vani o Joane i visia, vi page arâ me, se i ararigami, vi gami naasia na ani getea vari?”

²⁰Matena ngairerua karu tarahua o Jesu, ngairerua karu vi: “Igo vari ka no vani o Joane i visia, vi page arâ me, se i ararigami, vi gami naasia na ani getea vari?”

²¹Na matena nga ngekana o Jesu ki rikira rako na enoni, ga maeha ma ka ape era, ma ka atataroga, ma ki hagamaravagi na maata na enoni, ga guru.

²²Ngaia ki aramirerua na mane tora tamasinga iana o Joane, ki vi: “Muru aporo, ma kamuru hagarongoa o Joane renigi na marâ, muru kahu bâsigi ma kamuru kahu rongogi râ igini. Na enoni, ga guru, ka kahu bâbâ aporo. Na enoni, ga tavi, ka kahu arârâ aporo. Na enoni asiahu ka kahu mavo aporo. Na enoni, i pungu na karingata, ka kahu rongorongo aporo. Na enoni, ga me, ka mauri aporo. Ma na enoni matareha ka kahu rongoa na Taroha Koro.

²³I hagâvo manimaninga na enoni, i tanga monari reniê!”

²⁴Bevoana na mane tora tamasinga iana o Joane karu bani aporo, o Jesu ki haganega ki tamasi renia o Joane tangara na enoni, ki vi: “Na matena mu râ i na manihê i pasina o Joane, na ta kanimu takusia, vi gamu bâsia? Na ri i ababarere rârâ vari? Mareha!

²⁵Na ta kanimu râ, kamu bâsia? Na mane, i tuguni bâkoro vari? Mareha, suria na enoni, ga tuguni manga ngekana ma ka ruruguha bâraha ma ka magoto tare, ngaira ka gâga igê na ruma raha i bâkoro.

²⁶Visia me, na ta kanimu râ kamu bâsia? Na poropete, iê? Monari, be vi tangagamu: mu bâsia o vani i teharira na poropete.

²⁷Renia o Joane ki no vani, na Buka Apuna i tamasi renia, vi God ki vi, ‘Ikê na mane tora tamasinga iaku. Inê be hagatorangenia ke nanago taramu, hanana i hagarêa na tara taramu.’”

²⁸O Jesu ki tamasi nikâ, ki vi: “Be vi tangagamu: o Joane ki teharira na enoni hato, ga bani vora me i maveta, ma ne enoni purua, i toto suria na Arahanga iana God, ngaia nga kani teharia o Joane.”

²⁹Na enoni hato ma na mane totora takesi ka rongoa. Ma ngaira ki na enoni, ga râ suria na katoha oto iana God mo Joane ki bani hagabatesimora.

³⁰Ma na Pariseo ma na mane ni hagesuringa ni Rotu ka usitenia na katoha iana God tangara, ma ka usitenia o Joane, vi ge hagabatesimora.

³¹“Hoita, na ta be visia renira na enoni, ga oga i na matena i ngekê? Ngaira ka bâ manga na ta?

³²Ngaira ka mangara na kere kare, ga oga igê na mahera. Na kere kare, ga pane haku, ka ngerengere tangara na kere kare, ga pane getera, ka vivi, ‘Igami kami uhihi ma igamu kamu pe mâmâ! Igami kami angi maramara, ma igamu kamu pe angiangi!’

³³O Joane Batisita ki râ me, ma ngaia ki hari, ma ki pe tono rârâ na vaini, ma igamu kamu vi, vi ngaia ki beka!

³⁴O Karena Enoni ki râ me, ma ngaia ki ngêngê ma ki totono, ma igamu kamu vi, ‘Bâsia o vani akana! Ngaia ki ngêngê papasi, ma ki totono tare na vaini, ma ki hakunira na mane, ga totora takesi, ma na enoni, ga aharê igê na ramata!’

³⁵God ki tako mataha, ma na enoni, ga tongesuria, ka hagabângenia, vi God ki tako mataha.”

³⁶Ta na Pariseo ki guhia o Jesu, ki ngê i pasina. O Jesu ki râ ki banu, ma ki oga so ki ngê henia.

³⁷Ma i ngekana i hinua ki oga igê ta na gete, na êrâ. Ngaia ki rongoa, vi o Jesu ki ngêngê i pasina na Pariseo. Ngekana ngaia ki merâ me na pi na hê, i vunu renia na marâ, i sigini koro, na marâ i manga na suru.

³⁸Ngaia ki ura i gusigana o Jesu, ma ki angi, ma ki hagaruhusigi na êgana o Jesu renigi na tavoni na maana, ma hemuri ki taruhigi na êgana renigi na varehuna, ki siginigi ma ki monegi renia na marâ, i sigini koro.

³⁹Matena na Pariseo, i mengê o Jesu, ki bâsia vikana, ngaia ki tako i obana, ki vi: “Manga vi na mane ikê, ki na poropete monari, ngaia ki girara ma i girara na gete ikê, i hataria; ngaia ki girara ma i girara vi ngaia ki na êrâ!

⁴⁰Mo Jesu ki tamasi, ki vi: “Simone, be visia tangago ta na marâ.” Ngaia ki arami, ki vi: “Ua, visia me, Araha.”

⁴¹Mo Jesu ki vi: “Na mane gi rua garu kaone. Na mane gi tage ki kaone na haga tangarê gi rima, ma na ruata na mane ki kaone na haga tangahuru gi rima.

⁴²Ma ki asa, vigaru barugi aporo tanga na mane, garu kaone tenia. Ngekana ngaia ki tako hagetage vê renigi na haga iana, garu kaone tenia. Hoita, mo ti na hitangiterua kani ngaia i takuia bâraha?”

⁴³Mo Simone ki arami, ki vi: “Manga inê, ngaia ka na mane, i kaone na haga raha.” Mo Jesu ki vi: “Go vi koro.”

⁴⁴Mo Jesu ki aharia na gete, ma ki vi tanga o Simone, ki vi: “Bâsia na gete ikê! Inê kê banu me i ruma iamu, ma igo ko pe vateê na ve, be tananigi re na êgaku. Ma kani ikê, ngaia ki tananigi na êgaku renigi na tavoni na maana, ma ki taruhigi renigi na varehuna.

⁴⁵Matena inê kê banu me i pasimu, igo ki mareha, gu siginiê, ma kani ikê, ngaia ki ama ni siginigi nga na êgaku, haganega i na matena, gê banu me.

⁴⁶Igo ko pe monea na bêku, ma kani ikê, ngaia ki monegi na êgaku renia na marâ, i sigini koro era.

⁴⁷Hoita, gu rongo! Na takuiha iana ki hagatanga monari, vi na ara ni parongana era ka bani bonotenigi. Suria manga na enoni, ma ka korokoro tangago sisite ma, igo ko takuira sisite ma.”

⁴⁸Mo Jesu ki vi tanga na gete, ki vi: “Ga bani bonotenigi na parongamu era.”

⁴⁹Ma na enoni getera, ga oga ka ngêngê, ka haganega ka takotako i obata, ka vi: “O ti ngekini? Na tasi nikâ ngaia ki bonotenigi!”

⁵⁰Mo Jesu ki vi tanga na gete, ki vi: “Na tongesuriha iamu ki bani hagatahigo tenia na raramohana na eraha. Go arâ, ma ko mauri koro.”