Read Kahua LUKA 8 Bible Online

LUKA 8 - Kahua bible

LUKA 8

¹Ta na matena i muri o Jesu ki vatugigi na hinua, na ani raha ma na ani sisite, ma ki ateate renia na Taroha Koro renia na Arahanga iana God. Na kariana tangahuru matarerua ka takua,

²ma nikâ tani na gete. O Jesu ki bani hagakomagara tani, ga atataroga, ma tani, ga ape era. Na gete ngegê kani ka Maria (ta na atana nikâ ka Matalena), o Jesu i bani paira hura na ataro era gi pi tenia;

³ma ka Joana na gete iana o Gusa, i onosurigi na marâ iana o Herote; ma ka Susana, ma rako na gete getera, ga tamanira o Jesu ma na kariana renigi na nahuninga iata.

⁴Na enoni ka ama ni arâ me ma tanga o Jesu tenigi na hinua. Ma na matena na enoni ka rako era me, o Jesu ki visia na tamasinga maramaraveta ikê, ki vi:

⁵“Ta na mane ki râ ki tokorenigi na maani na koni i mu iana. Matena i tokorenigi na maani na koni, tani na maani ka vota so i tara. Na enoni ka purigi ma na manu ka ngêgi.

⁶Tani na maani ka vota so igê na mako, i hêga, ma na matena ka vavaka na gokoni, ngaigi ki hatani mêgu, renia na mako ki avagavaga.

⁷Tani na maani ka vota so i gupuni na tone. Na tone ka vavaka haku henigi na maani ma ka rubuhigi.

⁸Ma tani na maani ka vota so igê na mako koro: ka akê na gokoni, ma ka hungu, ma ka rako era na guani ma ka borahu.” Mo Jesu ki vi nikâ ki vi: “Mu rongo, manga vigamu karinga renigi na karingami!”

⁹Na kariana ka hagatea o Jesu renia na girarana na maramaraveta ngekê.

¹⁰O Jesu ki arami, ki vi: “Igamu kamu bani giraragi mataha noga na katoha iana God, na Araha; ma na enoni getera, ga oga hura, ngaira ka rongogi na katoha ngegana renigi na maramaraveta, hanana vi ngaira ke bâbâ ma ka pe bâgirara, ma ke rongo ma ka pe rongogirara.

¹¹“Ikê ki na girarana na tamasinga maramaraveta. Na maani na koni ki na tamasinga iana God.

¹²Na maani, ga vota so i tara, ngaira ka na enoni, ga rongoa na taroha; ma Satana ki râ me ma ki torea vê na taroha tenigi na aitangihata, hanana vi siana ngaira ka tongesuria ma ka tahitahi.

¹³Na maani, ga vota so igê na mako i bêratega, ngaira ka na enoni, ga rongoa na taroha ma ka têa ma ka vagevage renia. Ma ki asa, vi ge tâ tonge i obata; ngaira ka tongesuria igê na kere matena abubu ma, ma ka kasia râ, matena i tarahura na heuhungiha.

¹⁴Na maani, ga vota so i gupuni na tone, ngaira ka na enoni, ga rongoa na taroha; ma ngaira ka takoha bâraha ma renigi na marâ ni maveta, ma ka vanasigi na ruruguha, ma ka tenigi rako na marâ getigi. Na marâ hato ngegana ka heboroge i obata, ma ka rubuhia na taroha, ma ngaira ka takataka anunu.

¹⁵Ma na maani, ga vota so igê na mako koro, ngaira ka na enoni, ga rongoa na taroha ma ka têa maninga, ma ka râ suria ki bê ki arâ, mataro me ka hunguhungu bâkoro.

¹⁶“I asa na enoni, vi ge tanga na laiti ma ke buhia renia na apira, se vi ge naka i ruguhana na bea. Mareha! Ngaia ki naka hete na laiti igê na atohana na laiti, hanana na enoni ka rigia na laiti, matena ga bêbanu me i ruma.

¹⁷Na ara ni marâ, ga oga pinihi, ka page nakagi mave, ma na ara ni marâ, ga aba, ka page gagatenigi ma ka nakagi mave.

¹⁸“Hoita, mu karinga manga hanana mu karinga. Renia ga page vateakê nikâ ta na marâ tanga na enoni, i bani nahunia ta na marâ; ma na enoni, i pe nahunia rârâ ta na marâ, ka page tavoa râ tenia na kere marâ sisite, i takusia, vi nahunia.”

¹⁹Kenana ma na goana o Jesu ka râ me, vi ga bâsia, ma ki bara tangara, vi ge ura râ i pasina, suria ga rako era na enoni.

²⁰Ta na enoni ki vi tanga o Jesu, ki vi: “Kenamu ma na goamu kaniga gâga i metara ga obanigo.”

²¹Mo Jesu ki vi tangara na enoni hato, ki vi: “Kenaku ma na goaku ka na enoni, ga rongoa na tamasinga iana God ma ka râ suria.”

²²Ta na tangiana o Jesu ma na kariana ka tage igê na kere haka, mo Jesu ki vi tangara, ki vi: “Nika, ge tarê i na apanena tarê na rano.” Ma ngaira ka tavoraha.

²³Matena ga tage ka arâ, o Jesu ki mamêruga ma ki mêru. Ki parama ma ki tarêheroga ma ki aputaputa na rano, ma na navo ka akêhia na kere haka, ma ngaira ka haga ni kokoro.

²⁴Na kariana ka râ ka hagaritea o Jesu, ka vi: “Araha, Araha! Sugia ma ge meme!” O Jesu ki aharaga, ma ki bonasirerua na roga ma na navo aputaputa karu so, ma ki piova ngavê.

²⁵Ma hemuri ngaia ki vi tangara na kariana, ki vi: “I he na tongesuriha iami?” Ma ngaira ka konekone ka magu, ma ka hetamatamasi, ka vi: “Vania kini noga? Ngaia ki bonasirerua na roga ma na navo, ma ngairerua karu râ suria na tamasinga iana!”

²⁶Ngaira ka tage tarê tanga na mako iata na Ai ni Gerasene, i na apanena tarê na Rano ni Galilea.

²⁷Matena o Jesu ki reke vato i one, ta na mane i atataroga i hinua i ngekana ki râ me vurusia. Ngaia ki bani râ rupaturi kere vê noga, ma ki pe oga rârâ i hinua. Ngaia ki oga ma igê na vaba, ga bêbagi nuni igê.

²⁸Matena i bâsia râ o Jesu, ngaia ki aba so i maana o Jesu, ma ki ngere raha, ki vi: “Jesu, Karena God Raha Teha! Na ta kanigo obania tangê? Inê kê nungigo, siana ko hagaitangiê!”

²⁹Ngaia ki tamasi vikana, suria o Jesu ki bani bonasia na ataro era, ki hura tenia. Hagarako na ataro era ki angaria. Henaka na enoni ka mamaisuria ma ka rakuraku na êgana ma na rimana renigi na seni, ma ngaia ki musigi ma na seni, ma na ataro era ki hagatakusia, ki arâ igê na manihê.

³⁰O Jesu ki hagatea, ki vi: “O ti na atamu?” Ma ngaia ki arami, ki vi: “Na ataku ka no Rako.” Renia ga rako na ataro era, ga angaria.

³¹Na ataro era ka nungia o Jesu, vi siana ki kasira so igê na agua ni hagaitangiha.

³²Na totoha raha ni bo ka gâga hagarangi i ngekana, ga suasua igê na apanena na kere hungana. Na ataro era ka nungia o Jesu, vi hagamarumungenira, ka bêbanu i apeta na bo. Ma ngaia ki hagamarumungenira.

³³Ngekana na ataro era ka hura me tenia na mane ma ka banu i apeta na bo. Na totoha hagenani ni bo ka tango ka rere igê na apanena na suragina, ma ka vota igê na rano, ma ka tono ka me.

³⁴Na mane, ga bâsurira na bo, ka rigia na tarana ngekana. Tahema ngaira ka gava, ma ka tokorenia na rongoha renia na tarana ngekana i hinua raha ma i hinua sisite.

³⁵Na enoni ka râ, vi ga geria na tarana ngekana. Ngaira ka râ i pasina o Jesu, ma ka tarahua na mane, na ataro era ga bani hura tenia. Ngaia ki oga so i ano hagarangia o Jesu. Ngaia ki hagesuru ma ki kahu takotako oto aporo. Ma ngaira hato ka magu.

³⁶Ngaira na enoni, ga bâsia, ka hagarongora na enoni getera renia i tanu hega kini komaga.

³⁷Ma ngaira hato na enoni igê na apanena iata na Ai ni Gerasene ka vi tanga o Jesu, ki râ vê tenira, renia ngaira hato ka magu teha ngavê. Tahema o Jesu i tage igê na kere haka, ma ki aporo.

³⁸Na mane, ga bani hura tenia na ataro era, ki nungia o Jesu, ki vi: “Nakê be râ henigo.” Ma o Jesu ki hagatorangenia vê, ki vi:

³⁹“Gu aporo i pasimu, ma ku hagarongora na enoni renia na tarana, God i katogo renia.” Na mane ki râhia na hinua hagenani, ma ki hagarongora na enoni renia na marâ, i katoa o Jesu tanga.

⁴⁰Matena o Jesu ki aporo tarê i na apanena tarê na rano, na hakuta na enoni ka râ vurusia, renia ngaira hato ka bani oga naasia.

⁴¹Ma ta na mane ki ata me, o Jairo na atana. Ngaia ki bâsuria na sukuru i ngekana. Ngaia ki susure i maana o Jesu, ma ki nungia, vi arâ i pasina,

⁴²renia ka karena ki sugi meme noga; na kare i tage iana, ma ki vora na harisi tangahuru matarerua iana. Matena o Jesu ki râ, na enoni ka heparapara renia.

⁴³Ma i ngekana ki oga nikâ igê ta na gete, i hatamia na mamasiaganiha renia na gapugapu raha surigi na harisi tangahuru matarerua. Ngaia ki bani hatungigi na nahuninga iana tangara na mane mangata, ma ki asa na hitangita, vi ge hagakomaga.

⁴⁴Ngaia ki ahehe me i guputa na enoni i murina o Jesu, ma ki hataria na bogona na tuguni iana o Jesu, ma ki parama na gapugapu raha, ma ki hato hagetage tenia.

⁴⁵O Jesu ki hagate, ki vi: “Se, ti kani hatariê?” Na enoni hato ka vi, vi ngaira ki mareha. Mo Petero ki vi: “Araha, na enoni ka hakurigo bâraha ma ka hepara rihigo.”

⁴⁶Mo Jesu ki vi: “Ta na enoni ki hatariê, renia inê kê girara, na raramohaku ki bani tagara noga.”

⁴⁷Na gete ki girara, ga sugi tarahua, vi ngaia. Tahema ngaia ki tata ki râ me, ma ki aba so i maana o Jesu. Ma i ngekana, i maata na enoni hato, ngaia ki hagarongoa, vi suria i hega kani hataria, ma ki tanu hega kani komaga ototo râ nga.

⁴⁸O Jesu ki vi tanga, ki vi: “Kareku, na tongesuriha iamu ki hagakomagago. Gu arâ ma ko mauru koro.”

⁴⁹Matena o Jesu ki tamasi mênga vikana, ta na mane i totora tamasinga ki râ me tenia na ruma iana o Jairo, na mane i bâsuria na sukuru, ma ki hagarongoa, ki vi: “Ka karemu ki me. Go tamasi purusia na Araha, siana ki arâ me.”

⁵⁰Mo Jesu ki rongo vikana ma ki vi tanga o Jairo, ki vi: “Siana ko tako bâraha. Gu tongesuri ma, ma hanana ngaia i page mauri aporo.”

⁵¹Matena o Jesu ki ata me i metara na ruma, ngaia ki pe obania ta na enoni, ve ge bêbanu henia, nga noga ma o Petero mo Joane mo Jakobo ma o vaemana ma kenana na kare.

⁵²Na akêkuha kani i ngekana. Na enoni hato ka angiangi maramara renia na kare, i me. O Jesu ki vi: “Siana kamu angi maramara. Na kare ki pe me. Ngaia ki mêru ma.”

⁵³Ma ngaira hato ka rurusia, renia ngaira ka bani girara, vi na kare ki bani me.

⁵⁴Mo Jesu ki here i rimana, ma ki tamasi raha, ki vi: “Kego, gu aharaga!”

⁵⁵Ma ngaia ki mêri aporo, ma ki aharaga ototo râ nga. Mo Jesu ki vi tangarerua na enana na kare, karu vatea na ngêra, ki ngê.

⁵⁶Na enana karu konekone ngavê, ma o Jesu ki hagapêpurerua, vi siana karu hagarongoa rârâ ta na enoni renia.