Read Kahua LUKA 9 Bible Online

LUKA 9 - Kahua bible

LUKA 9

¹O Jesu ki hagahakura na kariana tangahuru matarerua, ma ki hagatarêngenia tangara na ramoha ma ki hagêgurira, ka paira na ataro era hato ma ka hagakomagara na enoni, ga maeha.

²Ma ngaia ki hagatorangenira vê ka râ, hanana ga ateate renia na Arahanga iana God, ma ka hagakomagara na enoni, ga maeha.

³Ngaia ki vi tangara ki vi: “Igê na râha iami siana kamu migirâ henigamu ta na marâ: mareha vi na vato, mareha vi na anga, mareha vi na ngêra, mareha na vi haga, ma siana kamu tuguni harigapi renigi na tuguni gi rua.

⁴Matena mu atata vê i ta na hinua, mu gâga henira na enoni, ga unigamu banu i pasita, mataro me kamu arâ pania na hinua ngekana.

⁵Manga mu atata vê i ta na hinua, ma na enoni ka pe unigamu banu i pasita, mu pania na hinua ngekana, ma kamu kangikangi uga, hanana ngaira ka girara, vi i pe koro na parongata.”

⁶Na kariana ka râ, ma ka râhigi na ara ni hinua, ma ka ateate igê renia na Taroha Koro, ma ka hagakomagara na enoni, ga maeha, i na ara ni hinua.

⁷O Herote, i marungia i Galilea, ki rongogi na tarani hato, ga vora me, ma ki hagagira bâraha renigi, suria tani na enoni ka vi: “O Joane Batisita kani mêri aporo!”

⁸Ma tani ka vi, vi o Elia ki vora me. Ma tani nikâ ka vi, vi na hitangita na poropete i nago kani mêri aporo.

⁹O Herote ki vi: “Na me iaku ka bani rete nguria o Joane. Ma na mane o vati kanigê rongoa na tamasinga renia ngekana?” Ma ngaia ki uhungia nga, vi bâsia o Jesu.

¹⁰Na aposotolo ka aporo me, ma ka hagarongoa o Jesu renigi na tagaraha, ga tanugi. Ngaia ki merarâ, ma ka râ vê getera i ta na hinua i Betesaita na atana.

¹¹Matena na hakuta na enoni ka girara, vi ngaia ki râ, ngaira ka mumuria. O Jesu ki vi, i koro kani ga râ me, ma ngaia ki tamasi tangara renia na Arahanga iana God, ma ki hagakomagara na enoni, ga maeha.

¹²Matena i haganega ki takea arârâ na arito, na kariana tangahuru matarerua ka râ me tanga o Jesu, ma ka vi: “Nakara vê na enoni ke râ, hanana ga girara, ga atata i hinua ma igê na ruma hagarangi, hanana ga tarahugi igê na ngêra ma na agua, ga mauru igê, suria na agua ikê ki na tênga.”

¹³Ma o Jesu ki vi tangara, ki vi: “Igamu maremi va, mu vatera na ngêra.” Ngaira ka arami, ka vi: “Igami kami nahunigi ma na bereti gi rima ma na siare gi rua. Go obanigami vari, vigami arâ ma kami vurivuri na ngêra tanga na hakuta hagenani ikê?”

¹⁴(I ngekana ka vora vari na ararina na rehagaro gi rima na mane). O Jesu ki vi tangara na kariana, ki vi: “Mu vi tangara na enoni, ke oga so harahara na me tangahuru gi rima hehegitigi.”

¹⁵Na kariana ka tê viteana, ma ka vi tangara na enoni, ka oga so.

¹⁶Mo Jesu ki têgi na bereti gi rima ma na siare gi rua, ki atakê, ki rahesia God renigi, ma ki pipigi, ma ki vatera na kariana, ka vutungira na enoni renigi.

¹⁷Ngaira hato ka ngê masu, ma na kariana ka hagavunusigi na heni tangahuru matarerua renigi na ngêra, ga ngê kasigi na enoni.

¹⁸Ta na matena o Jesu ki nunginungi getea, ma na kariana ka râ me tanga. Ngaia ki hagatera, ki vi: “Na enoni ka visiê, vi o ti kani inê?”

¹⁹Ngaira ka arami, ka vi: “Tani ka visigo, vi o Joane Batisita. Tani ka visigo, vi o Elia. Ma tani nikâ ka visigo, vi igo kani tani na hitangita na poropete i nago, i mêri aporo.”

²⁰Ma ngaia ki hagatera, ki vi: “Megamu, kamu visiê, vi o ti kani inê?” Petero ki arami, ki vi, “Igo ki na Mesaia, God i bani surua!”

²¹Ma hemuri o Jesu ki hagapêpura bâraha, vi siana ka hagarongoa rârâ ta na enoni renia na tarana ngekana.

²²Ma ngaia ki vi nikâ, ki vi: “O Karena Enoni ki tuguhia, i page hatamia bâraha na mamasiaganiha, ma na meraha ma na mane ni vogasiha ga teha ma na mane ni hagesuringa ni Rotu ka page usitenia, ka page nahuia ki meme, ma igê na oruta na tangiana ngaia ki page mauri aporo.”

²³Ma ngaia ki vi tangara na enoni hato, ki vi: “Manga ta na enoni, ma ki obania vi voravora re na kariaku, ki tuguhia, siana ki takusia so ma marena, ma ki torea hete na kuruse na mamasiaganiha iana i na ara ni tangiani, ma ki takuê.

²⁴Renia manga na enoni, ma ki obania, vi hagatahia na mêrihana marena, ngaia ki page hagatasia. Ma ki manga ta na enoni, ma ki meme reniê inê, ngaia ki page hagatahia na mêrihana.

²⁵Ata ni vi ma: manga ta na enoni, ma ki nahunia na maveta hagenani, ma ki me, se ki hatamigi na mamasiaganiha, ki hega, na nahuninga iana ka girara, ga tamania? Mareha vê!

²⁶Manga ta na enoni, ma ki ngariteniê, se i ngaritenia na hagesuringa iaku, hoi, o Karena Enoni ki page ngaritenia nogana, matena i arâ me manga na Araha Raha henia na arahanga iata o Vaemana ma na angelo koro.

²⁷Mu rongo! Gê vi tangagamu: tani na enoni ga goga i ngekê, ka page tahitahi mêngara, mataro me ka bâsia God, i ramataga.

²⁸Na ararina na wiki gi tage i murina i bani tamasigi o Jesu na marâ ngegê, ngaia ki merarâ o Petero mo Joane mo Jakobo, ma ki meratagare igê na hungana, hanana i nunginungi.

²⁹Matena i nunginungi, na maana ki bâ riariaga, ma na tuguni iana ka togatoga ma ka siki ahuru ngavê.

³⁰Ma karu parama na mane gi rua, ma karu ura me karu metamasi o Jesu. Ngairerua ki no Moise mo Elia.

³¹Ngairerua karu vora me renia na raramohana God, ma karu metamasi o Jesu, renia vi manga i he ngaia ki sugi hagamonaria na katoha iana God renia na mera iana i Jerusaleme.

³²O Petero ma na tamana ka mêru bore. Ngaira ka rite, ma ka bâsira o Jesu, na Araha, ma na mane gi rua, garu ura henia.

³³Matena na mane gi rua ngegana karu râ tenia o Jesu, o Petero ki vi tanga, ki vi: “Araha, i koro, kanimi oga ikê. Igami kami toregi na ruhu gi oru: tani tangago igo, tani tanga o Moise, ma tani tanga o Elia.” (Renia ngaia ki bagatatako, vi na ta ke visia.)

³⁴Matena i tamasi mênga, ma na vaha ki vora me ma ki mamarusira, ma na kariana ka magu, matena na vaha ki buhira.

³⁵Ma God ki tamasi igê na vaha, ki vi: “Ikê o Kareku, gê bani atea. Mu rongoa na tamasinga iana!”

³⁶Matena i tamasi hato, ngaia getea ma o Jesu kani goga. Na kariana ka muni tenigi na marâ hato ngegana, ma i na matena ngekana ngaira ka pe hagarongoa rârâ ta na enoni renia na marâ, ga bani rigia.

³⁷Na tangiana i muri ngaira ka rere tenia na hungana, ma ka rako era na enoni, ga râ me vurusia o Jesu.

³⁸Ta na mane i guputa na enoni ki ngere, ki vi: “Araha! Bâsia na kareku, gê nungigo. Na kare i tage iaku!

³⁹Ta na ataro era ki angaria, ma ki gasuga ni ngereha, ma ki apuri ki arâ ki hitahita, ma ki huhura na hutohuto i harana. Na ataro era ki ama ni hagamamasiaga apena nga, ma na matena i huhura tenia, ngaia na kare ki marusi ngavê na apena.

⁴⁰Inê kê bani nungira na kariamu, vi ga paia na ataro era, ma ki mareha.”

⁴¹O Jesu ki arami, ki vi: “Igamu ki mareha vê, vi gamu tongesuri, ma ki era ngavê na parongami! Hagehita kê oga henigamu? I na keta ke hato? I arihu era me noga inê kê hatamia na mamasiaganiha renigamu!” Ma ngaia ki vi tanga na mane, ki vi: “Gu torea me o karemu ikê!”

⁴²Matena na kere mane ki râ me, na ataro era ki angaria, ma na kere mane ki hagaata, ki vota so i ano, ma ki apuripuri ki râ ki hitahita. O Jesu ki bonasia na ataro era ki hura, ki hagakomaga na kere mane, ma ki vatea aporo tanga o vaemana.

⁴³Ngaira hato na enoni ka kone teha ngavê renia na raramohana raha teha God. Matena na enoni ka konekone tenigi mênga na ara ni marâ, i tanugi o Jesu, ngaia ki vi tangara na kariana, ki vi:

⁴⁴“Mu rongo! Mu takusia maninga na marâ, vi gê visia tangagamu. Ga page mahatangenia o Karena Enoni tangara na merongana.”

⁴⁵Ma ngaira ka pe rongogirara na girarana na tamasinga ngekê. Na tamasinga ngekê ki pe rongo mataha tangara. Tahema ngaira ka pe rongogirara, ma ka magu, vi ge hagatea renia.

⁴⁶Na kariana o Jesu ka hetuguri so mareta, vi o ti na hitangita kini teha.

⁴⁷O Jesu ki giraragi na takotako iata, tahema ngaia ki têa me na kere kare, ma ki hagêrasia so i pasina,

⁴⁸ma ki vi tangara, ki vi: “Na anima na enoni, i unia banu na kere kare ikê reniê inê, ngaia ki uniê banu inê. Na anima na enoni, i uniê banu inê, ngaia ki unia banu nikâ na ani, i bani hagatorangeniê. Renia na enoni i pasimi, i pe hagarahasia marena rârâ, ngaia nga ki na enoni raha monari.”

⁴⁹O Joane ki tamasi, ki vi: “Araha, igami kami bâsia na mane, i paira na ataro era igê na raramohamu, ma igami kami manimania tenia, suria ngaia ki mareha, vi na tamamami.”

⁵⁰O Jesu ki tamasi tanga ma tangara na kariana getera, ki vi: “Siana kamu manimania tenia, suria na anima na enoni, i pe urapusigamu, ngaia ki tamanigamu.”

⁵¹Matena i guru ki râ me hagarangi noga na tangiana tanga o Jesu, vi aporo i pasina God, ngaia ki togeaga vi arâ i Jerusaleme, ma ki râ.

⁵²Ngaia ki hagatorangenira na mane tora tamasinga, ka nanago tarana. Ngaira ka râ ma ka banu i ta na hinua i Samaria, hanana ga hagarêgi igê na ara ni marâ tanga.

⁵³Ma na enoni i ngekana ka usitenia o Jesu, matena ga girara, vi ngaia ki arâ i Jerusaleme.

⁵⁴Matena o Jakobo mo Joane, na kariana, karu bâsia na tarana ngekana, ngairerua karu vi: “Araha, go obanigami vari, vigami nungia God, ki kasia so me na gi ki hagaerasira?”

⁵⁵O Jesu ki aharirerua aporo ma ki ramonirerua.

⁵⁶Ma ngaia ma na kariana ka râ tare tanga ta na hinua getea.

⁵⁷Matena ngaira ka arâ i tara, ta na mane ki vi tanga o Jesu, ki vi: “Inê be râ henigo igê na ara ni agua, go arâ igê.”

⁵⁸O Jesu ki vi tanga, ki vi: “Na o vasiga ka nahunigi na tâtâ iata, ma na manu ka nahunigi na beata, ma o Karena Enoni ki pe nahunia na agua ni tâha, hanana vi ge mamaro igê.”

⁵⁹Ngaia ki vi tanga ta na mane ki vi: “Gu takuê!” Ma na mane ngekana ki arami, ki vi: “Araha, gu nakê so noga, be bagia o vaemaku.”

⁶⁰O Jesu ki arami, ki vi: “Nakara vê na enoni, ga me, ke bagira na enoni, ga me. Gu râ me ma ku ateate renia na Arahanga iana God.”

⁶¹Tani na mane nikâ ki vi: “Araha, inê be râ surigo, ma ku nakê so noga, be râ be arira na kareku.”

⁶²O Jesu ki vi tanga, ki vi: “Na anima na enoni, i bâbâ rârâ ma, matena i hikiru, ngaia ki pe araria, vi ge tagara tanga God na Araha.”