Read Kahua RAMATA 10 Bible Online

RAMATA 10 - Kahua bible

RAMATA 10

¹“Na Araha ki tamasi tangê, ki vi, ‘Gu tahererua na hê aberabera gi rua mangarerua na ani i nago, ma ko tagarahia na bokesi na apinige, hanana go nakarerua igê. Hemuri ko tagere me igê na hungana.

²Inê kê page segegi so aporo igê na hê aberabera haoru na marâ, gê bani segegi igê na hê aberabera gi rua, go arihatenirerua so karu amenamena. Hemuri ko nakarerua nga i rarona na bokesi.’

³“Vikê inê kê tagarahia na bokesi renia na bagorana na apinige ma kê tahererua na hê aberabera gi rua mangarerua na ani i nago, ma kê mererârua tagere igê na hungana.

⁴Ma na Araha ki segegi aporo so igê na bani tamasinga manga i segegi i nago. Ngaigi ka na tangahuri ramata, i vategamu renigi, matena i tamasi tenia na gi, matena mu haku igê na hunana na hungana. Na Araha ki tagarenirerua tangê na hê aberabera.

⁵Ma inê kê kariarigu kê vato. Inê kê nakarerua i rarona na bokesi, gê tagarahia, manga i bani bonasiê na Araha renia. Ngairerua karu gâga mênga i rarona.”

⁶(Na Isiraelita ka panigi na vekaru iana o Jakane ma ka râ tanga i Mosera. O Aroni ki me i ngekana ma ka bagia igê, ma o Eleasare o karena ki urusia ki mane ni vogasiha.

⁷Tenia i ngekana ngaira ka râ tanga i Gutugota ma tenia i ngekana tanga i Jotobata, na agua ni ve.

⁸I na matena ngekana na Araha ki atera na mane tenia na varo ninuni iana o Levi, hanana ga bâsuria na bokesi na suruheri ma ka tagara tanga manga na mane ni hagarahenga ma ka nungia, ki koro tangara na enoni. Na tagaraha ngegana ka tuguhira mênga.

⁹Tahema na varo ninuni iana o Levi ka pe nahunigi na mako mangara na varo ninuni getera. I oto tangara hete, viga tagara tanga na Araha mangara na mane ni hagarahenga, manga i bani visia na Araha God iana.)

¹⁰“Inê kê oga igê na hungana surigi na tangiani ma na bungiani tangahuru ge he manga i nago. Na Araha ki aganaria nikâ na avarasiha iaku ma ki pe mutegamu.

¹¹Ngaia ki hagatorê, kê bêngenigamu, hanana vi igamu kamu henahuraua na agua, i bani surua tangara na êvarimi.

¹²“Hoita, Isiraelita, mu karingagi na marâ, na Araha God iami ki obanigi tenigamu. Mu hagahigasia nga na Araha. Mu têtê viteana tare. Mu takuia nga. Mu tagara tanga i mêrihami hagenani.

¹³Mu marupegi na ramata hato iana. Inê kê vategamu renigi i ngekê, hanana mu mauri.

¹⁴Na Araha ki nahunigi na vavearo ma na maveta ma na marâ hato igê.

¹⁵Na Araha ki takuira ngavê na êvarimi. Tahema ngaia ki ategamu igamu, mareha vi tani râ nikâ, ma igamu ka na kariana hetakui mênga.

¹⁶Hoita, haganega tenia i ngekê, mu têtê viteana nga na Araha. Siana kamu guguruga nikâ tanga.

¹⁷Na Araha God iami ki raha teharira na ataro hato ma na ani ga nahuni ramoha. Ngaia ki raramohaga hunia ma ki bagararaha ngavê. Ki tuguhira na enoni hato viga têtê viteana. Ngaia ki pe panepane henia ma tani ma tani ki mareha. Ngaia ki asa vige aganarigi na vatevate.

¹⁸Ngaia ki katora na kare banogo ma na gete na nâ, hanana ga nahunigi na marâ, ga oto tangara. Ngaia ki takuira na mahuara, ga oga i berarogata na goaka ma ki haganahunira renigi na ngauha ma na gahu.

¹⁹Tahema mu takuira na mahuara ngegana, suria i nago igamu nogami kamu mahuara i Esipito.

²⁰Mu hagahigasia na Araha God iami. Mu rahesia ngaia getea ma. Mu tototo suria, ma kamu tohetohe renia na atana ngaia ma.

²¹Mu hagarahasia nga. Ngaia ki na God iami. Renigi na maami maremi igamu kamu bâsigi na mena ma na tagaraha raha, i tamanigamu renigi.

²²Matena na êvarimi ka râ i Esipito, ngaira ka vora ma na tangahuru gi pi. Ma i ngekê na Araha God iami ki bani hagarakonigamu mangagi na higu i vavearo.