Read Kahua RAMATA 11 Bible Online

RAMATA 11 - Kahua bible

RAMATA 11

¹“Mu takuia na Araha God iami ma kamu marupegi tare na ramata ma na hagesuringa hato iana.

²Mu takusia, manga i he kamu aitangisia na Araha, i tagara igê na ogaha iami. Igamu nga kanimu bani hatamia na Araha igê na ogaha iami, mareha vi na karemi. Igamu kamu bani bâsigi na bâbâhana ma na raramohana raha, na tagaraha raha

³ma na mena iana. Igamu kamu bâsigi na tarani i katogi tanga na maneraha i Esipito ma tangara na enoni hato igê na apanena iana.

⁴Igamu kamu bâsia, manga i he na Araha ki mutera ngavê na mane ni me ni Esipito henigi na hosi ma na kati ni me iata. Ngaia ki katora ka tono igê na Asi Memera, matena ga tarigenigamu.

⁵Mu bani girara na marâ, na Araha ki katoa tangagamu igê na bagamasusu raha hagenago tarana mu ata me ikê.

⁶Mu takusia aporo na tarana na Araha ki katoa tangarerua o Tane mo Abirama. Ngairerua ka no karena o Eliaba tenia na varo ninuni iana o Rubeni. I maata na enoni hato na ano ki avaga ma ki ahunirerua henira na ahemata iaterua ma henigi na ruma na gahu iaterua ma henira na enoni tagara hato iaterua ma na togoha iaterua.

⁷I monari, igamu nga ka na ani mu bani bâsigi na tagaraha raha hato iana na Araha ngegana.

⁸“Tahema mu marupegi nga na ramata hato, gê bonasigamu renigi i ngekê. Vikana igamu kamu girara mu tarêhia na ve ma kamu parênia na agua, mu sugi bêbanu igê.

⁹Vikana igamu kamu page gâga hagahu igê na agua ni mako koro ma ni togoha, na Araha ki bani surua tangara na êvarimi ma na raraha iata.

¹⁰Na agua mu sugi parênia ki pe manga i Esipito, mu oga igê i nago. I ngekana i Esipito, matena mu hasihasi, igamu kamu tagara raha ngavê, suria mu totora ve tangagi na mu.

¹¹Ma na agua, mu sugi bêbanu igê, ki na agua huhunganiga ma ni maruguni ma ni rangi.

¹²Na Araha God iami ki marupea na agua ikê ma ki bâsuria suria na harisi.

¹³“Hoita, mu marupegi na ramata, gê vategamu renigi i ngekê. Mu takuia na Araha God iami ma kamu têtê viteana i mêrihami hagenani.

¹⁴Vikana ngaia ki page hagarangisia na mu iami igê na matena tanga, igê na turituriha ma igê na hagahisi, hanana mu nahunigi na ngauha, na vaini ma na oile ni olive tangagamu maremi.

¹⁵Ma na go tangara na togoha iami. Na ngêra ka page aharêsigamu ngavê tare.

¹⁶Mu bâsigamu maremi. Siana ka hagahorogamu tenia na Araha, hanana vigamu hagarapera na ataro ma kamu vogasira.

¹⁷Manga mu katokato vikana, na Araha ki page mangariaga tangagamu. Ngaia ki page katoa na arito ru ma na mako iami ki page avagavaga renia ma na ngêra ki asa vige akê igê. Vikana igamu kamu page meme rêrê igê na agua bâkoro ngekana, i sugi vategamu renia.

¹⁸“Mu takusigi tare na ramata ngegê ma kamu barigigi. Mu rakugi i rimami ma i raemi, hanana mu takusigi tare.

¹⁹Mu hagesurira na karemi renigi. Mu tamasigi, matena mu gâga i ruma iami, matena mu arâ i tagua, matena mu mamaro ma na matena mu tagara.

²⁰Mu segegi igê na u na maani ruma iami ma igê na manipara na hinua iami.

²¹Vikana igamu ma na karemi kamu page gâga hagahu igê na agua, na Araha God iami ki surua, vi haganahunira na êvarimi renia. Igamu kamu page gâga hagahu i ngekana manga na vavearo i gâga tare i avorarana na maveta.

²²“Mu tototo surigi maninga na ramata, gê vategamu renigi. Mu takuia na Araha God iami. Mu têtê viteana tare.

²³Vikana ngaia ki page tarigenira hura na apaneni me hato tarami, ma igamu kamu page parênia na apanena iata na apaneni me ga rako ma ka ramo teharigamu.

²⁴Na mako hato mu tavo uga igê, ka page vora re na animi. Na apanena iami ki page haganega tenia na bagamasusu raha i Negeve tangagi na hungani i Libanone, ma tenia na ve i Uparatesi i kerekê tanga na asi i kereso.

²⁵I asa ta na enoni, vige urapusigamu. Na agua mavê mu arâ igê, na Araha ki katora na enoni ka magutenigamu, manga i bani visia.

²⁶“I ngekê inê kê nakarerua na tarani gi rua tangagamu, hanana mu atea na hitangiterua: na ramana se na hagaitangiha.

²⁷Na ramana ki page tarahugamu, manga vi igamu ma kamu marupegi na ramata iana na Araha God iami, gê vategamu renigi i ngekê.

²⁸Na hagaitangiha ki page tarahugamu, manga vi igamu ma kamu aharêngigi na ramata ngegana, hanana mu vogasira na ataro, mu pe vogasira noga i nago.

²⁹Matena na Araha ki bêngenigamu banu igê na agua, mu sugi parênia, mu ngerehenia na ramana tenia na hungana i Gerisimi, ma na hagaitangiha tenia na hungana i Ebale.

³⁰(Na hungani gi rua ngegana karu oga kereso i ve i Jotano i na apanena iata na Kananita, ga ogasia na maruguna i Jotano. Ngairerua karu oga i kereso ma karu pe hagatê tenigi na apinige apuna i More hagarangia na hinua i Gilegale.)

³¹Igamu kamu sugi tarêhia na ve i Jotano ma kamu sugi parênia na agua, na Araha God iami ki vategamu renia. Matena mu henahuraua ma kamu ogasia,

³²mu marupegi nga na ramata hato, gê vategamu renigi i ngekê.