Read Kahua RAMATA 12 Bible Online

RAMATA 12 - Kahua bible

RAMATA 12

¹“Igê ka na ramata ma na hagesuringa ki tuguhigamu, vigamu marupegi suria na ogaha iami igê na agua, i sugi vategamu na Araha God na êvarimi ga rahesia. Mu ototo surigi.

²“Igê na agua mu sugi taua ki tuguhigamu, vigamu hagamagahurugi râ igê na agua hato, na enoni ka vogasira igê na ataro iata, igê na barani, se igê na hungani se i mamarugani na apinige ga arubebe.

³Mu hogegi râ na bea ni vogasiha. Mu menamenarigi na u na hê apuna iata. Mu sungigi na nununa ka Asera na ataro iata. Mu tapigi vato na u na nunuta na ataro iata, hanana siana ka vogasira nikâ na ataro igê na agua ngegana.

⁴“Siana kamu rahesia na Araha God iami igê na tarana na enoni ngegana ka rahesia igê na ataro iata.

⁵Igê na apanena hagenani iata na varo ninuni hato iami na Araha ki page atea igê na agua gi tage togo ma. I ngekana nga na enoni ki tuguhira, viga hakuhaku igê i maana na Araha ma ka rahesia igê.

⁶I ngekana nga ki tuguhigamu, vigamu susu igê tanga ma kamu vogasia igê, ma kamu tagarenigi igê na ani getigi na vogasiha iami, na tangahuruta na marâ iami, ma na votovoto mu surugi tanga na Araha ma na votovoto mu tagarenigi suri parongami maremi, ma na kareta hagâkani na puruka ma na sipi iami.

⁷I ngekana nga i maana na Araha God iami, i mamahata tangagamu, igamu ma na ahemata iami kamu page ngaugi ma kamu page vagevagesigi na meni koro na tagaraha iami.

⁸“Igê na matena ngekana siana kamu katokato manga bani hanana ki râ me. Tariha me i ngekê igamu kamu vogasi surigi na obaniha iami maremi,

⁹suria i mamênga vigamu bêbanu igê na agua ni marapeha, na Araha God iami ki sugi vategamu renia.

¹⁰Matena mu tarêhia na ve i Jotano, na Araha ki page nakagamu, kamu parênia na agua ma kamu ogasia. Ngaia ki page ngahingahi pusigamu tenira na merongami hato, ma igamu page gâga igê na ramana.

¹¹Na Araha ki page atea na agua gi tage togo ma, hanana mu vogasia igê, ma i ngekana nga ki tuguhigamu, vigamu toregi râ igê na ara ni marâ ni hagarahenga, manga gê bani bonasigamu renigi. Ngaigi ka na marâ mu susu renigi ma kamu vogasi renigi: na tangahuruta na marâ iami, na votovoto mu tagarenigi tanga na Araha, ma na ani getigi na votovoto mu surugi suri parongami maremi tanga na Araha.

¹²I ngekana nga i maana na Araha mu vagevage henira na karemi, na enoni tagara iami ma na mane ni hagarahenga ga oga i pasimi. Siana kamu bonotenira na mane ni hagarahenga, suria ngaira ki pe tongasira na mako.

¹³Siana kamu vogasi igê na agua mavê mu atea maremi.

¹⁴Mu vogasi ma hete igê na ani gi tage ma na agua, na Araha ki page atea igê na apanena iana ta na hitangita na varo ninuni tangahuru matarerua iami. I ngekana ma mu susu igê ma kamu katogi igê na marâ hato getigi, gê bonasigamu renigi mareha vi ta nikâ.

¹⁵“Ma ki ararigamu ma, vigamu nahuira na togoha iami ma kamu ngaura i na agua mavê mu gâga igê. I arari ma vigamu ngaugi na ganiani, manga i vategamu renigi na Araha. Igamu hato, naka ma mu matarotaro suria na rotu se mareha, igamu ki ararigamu ma, vigamu ngaugi ngegana, tagenani ma mu ngaugi na ganiani getigi.

¹⁶Ma siana kamu ngaugi na gaputa. Ki tuguhigamu, mu merigi râ hete na gaputa i ano manga na ve.

¹⁷Siana kamu ngaugi i pasimi na ani mavê na marâ mu tagarenigi tanga na Araha, mareha vi na tangahuruta na ngêra iami, se vi na vaini iami, se vi na oile ni olive iami, se vi na kareta hagâkani na puruka ma na sipi iami, se vi na votovoto mu surugi tanga na Araha, se vi na votovoto iami suri parongami maremi, se vi na ani mavê na votovoto getigi.

¹⁸Igamu hato, igamu, na karemi henira na enoni tagara iami ma na mane ni hagarahenga i pasimi ki tuguhigamu, vigamu ngaugi na ngêra ma na ganiani ni vogasiha i maana ma na Araha God iami, igê nga na agua gi tage, na Araha God iami ki page atea. Ma i ngekana nga igamu kamu vagevagesigi nga igê na meni na tagaraha iami.

¹⁹Siana kamu bonotenira na mane ni hagarahenga, matena mu gâga igê na apanena iami.

²⁰“Matena na Araha God iami ki hagaraha na apanena iami, manga i bani surua, igamu ki ararigamu ma, vigamu ngaugi na ganiani i na ani mavê na agua mu obania.

²¹Manga vi na agua ni vogasiha, i gi tage togo ma, ma ki hagatê ngavê, hoi, manga mu obania, ki ararigamu ma, vigamu nahuia tani na puruka se na sipi na Araha ki vategamu renia. Ma ki koro ma, mu ngaura i pasimi, manga gê bani visia tangagamu.

²²Na anima na enoni, naka ma i matarotaro suria na rotu se mareha, ngaia ki girara i ngaugi na ganiani ngegana tagenana mangagi na ganiani getigi.

²³Siana kamu ngaugi na ganiani gagapugaga, suria na gapu ki na mêriha, ma siana kamu ngaua na mêriha henia na gapu.

²⁴Siana kamu ngaua na gapu. Mu karangigi râ hete i ano manga na ve.

²⁵Manga mu taua maninga na ramata ngekana, igamu kamu page hagakoro obana na Araha, ma na ara ni marâ ka page tavoraha bâkoro tangagamu hato, igamu ma na raraha iami.

²⁶Mu toregi râ i na agua ni vogasiha i gi tage togo ma, na marâ iami tanga na vogasiha ma na votovoto iami mu bani surugi tanga na Araha.

²⁷I ngekana nga mu susu igê tanga na Araha igê na bea ni vogasiha iana. I ngekana nga mu vogasi igê ma kamu ngaugi igê na ganiani ni vogasiha ma kamu karangigi na guputa igê na bea ni vogasiha.

²⁸Mu tototo surigi na ramata hato gê vategamu renigi, ma na ara ni marâ ka page tavoraha bâkoro tare tangagamu, igamu ma na raraha iami, suria mu page katogi na tarani, ga oto i maana na Araha God iami ma ka hagakoro obana.

²⁹“Na Araha God iami ki page mutera na apaneni me, matena mu bêbanu igê na apanena iata, ma igamu kamu page parênigi na mako iata ma kamu page ogasigi.

³⁰Matena na Araha ki mutera hato igê na apaneni me ngegana, siana hagetage kamu arâ surigi na rotu iata, i era ma kamu me. Siana kamu uhungia, vigamu giraragi na tarani ngaira ka vogasira renigi na ataro iata, hanana vigamu vogasira vigana nogami.

³¹Siana kamu vogasia na Araha God iami igê na tarani, ngaira ka vogasira renigi na ataro iata. Suria matena ngaira ka vogasia na ataro iata, ngaira ka tanugi na marâ erataga ngavê, na Araha ki kikitenigi ngavê. Ngaira ka susu renira na kareta igê na bea ni vogasiha.

³²“Mu katogi ma na marâ, gê bonasigamu renigi. Siana kamu nakanaka banu me nikâ ta na marâ, se vigamu kasikasi hura tani.