Read Kahua RAMATA 13 Bible Online

RAMATA 13 - Kahua bible

RAMATA 13

¹“Vari ta na poropete, se na enoni i girara i ramatenigi na girarani na maruteha, ki surugi na mena se na tagaraha raha,

²hanana vi okegamu, kamu vogasira ma kamu hagarapera na ataro, mu pe bani vogasira me i nago. Henaka ga voravora mave me na suruha iana,

³siana kamu amaka suria. Na Araha God iami ki uhungigamu igê na tarana ngekana, hanana vi tarahua, vi igamu kamu takuia na Araha i mêrihami hagenani se mareha.

⁴Mu têtê viteana na Araha ma kamu hagahigasia. Mu amake suria ma kamu marupegi na ramata iana. Mu rahesia ma kamu tototo suria.

⁵Mu nahuia ki meme hete na anima na enoni i ramatenigi na girarani na maruteha se na poropete, ki vi tangagamu, vigamu murisigea na Araha, i hagatahigamu tenia i Esipito, na agua mu vora re igê na kare rakuraku. Na enoni ngekana ki erataga hunia, suria i uhungia, vi okegamu râ tenia na ogaha, na Araha ki bani naka tangagamu. Mu nahuia nga ki meme, hanana mu hagamagahurua tenigamu maremi na eraha ngekana.

⁶“Vari na goami se o karemi se ka karemi se na gete hetakui iami, se na tamami koro, ngaia ki kanukanugamu pinihi, hanana vigamu vogasira na ataro, igamu ma na êvarimi kamu pe bani vogasira me i nago.

⁷Vari tani na hitangita ki kanukanugamu, hanana vigamu vogasira na ataro iata na apaneni me, ga oga hagarangigamu, se na ani ga oga hagatêrigamu.

⁸Siana kamu nakara ka okegamu. Siana kamu karingara. Siana kamu takira se vigamu hagatogo surira. Siana kamu roherohe pusira.

⁹Mu nahuira nga ka meme! Mu arihahunira hagenago ma hemuri na ani getera.

¹⁰Mu arihahunira nga! Suria ngaira ka uhungia, viga okegamu pania na Araha God iami, i hagatahigamu tenia i Esipito, na agua mu vora re igê na kare rakuraku.

¹¹Vikana na Isiraelita hato ka page girara na tarana ngekana. Ngaira ka page magu. Vikana na Isiraelita ki hato vige katoa nikâ na eraha vikana.

¹²“Matena mu ogasigi na hinua, na Araha God iami ki haganahunigamu renigi, igamu vari kamu rongora,

¹³vi tani na eragata na goami ka hagabekasira na enoni i pasita, hanana ga vogasira na ataro, mu pe bani vogasira me i nago.

¹⁴Manga mu rongoa na tarana vikana, mu garia manga vi i monari se mareha. Mange vi na eraha ngekana ma ki voravora me monari,

¹⁵hoi, mu nahuira ka meme na enoni hato i hinua ngekana henira na togoha hato iata. Mu ruhuruhua ngavê na hinua ngekana.

¹⁶Mu toratora haku na nahuninga hato iata na enoni i hinua ngekana, ma kamu pagepage haku igê na mahera ni hinua. Ma hemuri kamu sungia na hinua ngekana henigi na ara ni marâ hato igê, manga vi na vogasiha mu susu renia tanga na Araha. Na hinua ki makaka ngavê nga tare. Siana kamu tagarahia aporo.

¹⁷Siana hagetage, kamu toregi tangagamu maremi tani na marâ, ga oga tanga ga sungigi, hanana na Araha ki page hato na mangariaganiha iana, ma ki page takuigamu. Ngaia ki page korokoro tangagamu ma ki page hagarakonigamu ngavê, manga i bani surua tangara na êvarimi.

¹⁸Manga vi igamu ma kamu tototo surigi na ramata hato iana, gê bani vategamu renigi i ngekê, hoita, mu katogi nga na marâ hato i visigi tangagamu.