Read Kahua RAMATA 14 Bible Online

RAMATA 14 - Kahua bible

RAMATA 14

¹“Isiraelita, igamu ka na kariana na Araha God iami. Vikana, matena mu angiangi maramara renira na enoni ga me, siana kamu haraharasigamu maremi, se vigamu gorogoro i raemi mangara tani na enoni.

²Igamu ka na anina na Araha God iami. Ngaia ki bani ategamu i berarogata na enoni hato i maveta, kamu vora na anina.

³“Siana kamu ngaugi na ganiani, na Araha i visigi vige apu vige ngaugi.

⁴I ararigamu ma, vigamu ngaugi na ganiani na ani igê: na puruka, na sipi manata, na goti manata, na sipi vasiga ma na goti vasiga

⁵ma na ganiani vigana;

⁶na ganiani ga matanga na ababa ni ugata ma ka ngêngê hurigi na ngêhurita.

⁷Ma siana kamu ngaugi na ganiani ga pe matanga na ababa ni ugata ma ka pe ngêngê hurigi na ngêhurita. Siana kamu ngaura na kamelo, na ngongohuriva se vi na rabiti. Ngaira ka pe matarotaro. Ngaira ka ngêngê hurigi na ngêhurita ma ka pe matanga na ababa ni ugata.

⁸Siana kamu ngaura na bo, suria ngaira ka pe matarotaro. Ngaira ka matanga na ababa ni ugata ma ka pe ngêngê hurigi na ngêhurita. Siana kamu ngaura na ganiani ngegana, se vigamu hatarigi na gahuata.

⁹“I ararigamu ma, vigamu ngaura na ega ga tonga renigi na egota, na aheaheta, na heheni na kereta ma na ênahita,

¹⁰ma na ani getera na marâ ga gâga i ve ma i asi ga pe tonga renigi na marâ ngegana, siana kamu ngaura, suria ngaira ka pe matarotaro.

¹¹“I ararigamu ma, vigamu ngaura na manu hato ga matarotaro,

¹²nga noga ma na ahetaronga, na ko makukuni, na tehe, na ani raha ma na ani sisite, na emu, na manu ni waiê, na gaoha ma na manu vigana, na roke, na ani raha ma na ani sisite.

¹⁹“Na ara ni marâ mamauri hato ga tonga renigi na gagahata, ka mareha vi na manu ma ka angoango, ngaira ka pe matarotaro. Siana kamu ngaura,

²⁰nga noga ma na ani ga rekereke mangara na pê.

²¹“Siana kamu ngaura na ganiana i meme suri parongana. I ararigamu ma vigamu nakara na mahuara i berarogami ka ngaua ngaira, se mu hagavuringenia tangara na mahuara ga pe oga i berarogami. Ma igamu ka na anina na Araha God iami. Igamu ka na kariana nga. “Siana kamu hagagoboa na karena sipi se na goti renia na nongana na susuna kenana.

²²“I na ara ni harisi mu nakagi râ na tangahuruta tenigi na ngêra i mu iami.

²³Hemuri kamu arâ tanga na agua apuna, na Araha God iami i page atea, hanana vigamu rahesia igê. Ma i ngekana i maana na Araha igamu kamu ngêngê haku henigi na tangahuruta na koni, na vaini ma na oile ni olive ma renira na kareta hagâkani na puruka, na goti, ma na sipi iami. Mu katokato vikana, hanana mu hagahigasia tare na Araha God iami.

²⁴Manga vi na agua ni hagarahenga ma ki hagatê tenigi i pasimi, hanana vigamu migirâ me na tangahuruta na ngêra, na Araha i vategamu renigi, mu katokato nga vikê.

²⁵Mu hagavuringenigi na tangahuruta ngegana ma kamu migirâ na haga tanga na agua apuna ni hagarahenga.

²⁶Mu kasigi na haga renigi na marâ mu obanigi, manga na hasigona na puruka, se na karena na sipi, se na goti se na vaini, se na ani getea na tonoha. Ma i ngekana i maana na Araha God iami igamu ma na ahemata iami kamu ngêngê ma kamu vagevage.

²⁷“Siana kamu bonotenira na raraha iana o Levi ga oga i pasimi, suria ngaira ka pe nahunigi mareta rârâ ta na marâ.

²⁸Igê na bogona na ara ni oruta na harisi mu rurugi haku na tangahuruta hato na ngêra iami i hinua iami.

²⁹Ngaigi ka na ngêra tangara na raraha iana o Levi, suria ngaira ka pe nahunigi ta na marâ, ma tangara nikâ na mahuara, na kare banogo ma na gete na nâ, ga oga i berarogami. Ngaira ka arâ me nga ma ka tavogi na ara ni ngêra ga obanigi viga mauri re. Mu katokato nga vikana ma na Araha God iami ki page katogi na ara ni tagaraha iami ka tavoraha bâkoro.