Read Kahua RAMATA 15 Bible Online

RAMATA 15 - Kahua bible

RAMATA 15

¹“Igê na bogona na ara ni pita na harisi igamu kamu bonotenigi vê nga na hagaba iami tangara na enoni.

²Mu katokato nga vikê. Na ara ni Isiraelita i hagaba tanga na tamana na Isiraelita, ki bonotenia vê nga. Siana ki tuguria vi barua aporo tanga, suria na Araha ngaia marena ki bani visia vikana.

³I arari ma, vigamu tugurira na mahuara ka barubaru aporo tangagamu na hagaba iami ma siana kamu katokato vikana tangara na tamami na Isiraelita.

⁴“Na Araha God iami ki page korokoro tangagamu, matena mu ogasigi na mako i page haganahunigamu renigi. I asa ta na hitangimi vige page matareha,

⁵manga vi igamu ma kamu têtê viteana ma kamu marupegi maninga na ara ni ramata iaku, gê vategamu renigi i ngekê akê.

⁶Na Araha ki page korokoro tangagamu, manga i bani surua. Igamu page hagaba tangara na enoni igê na agua rako getigi, ma igamu ki mareha vigamu totora na hagaba tenira. Igamu kamu page raharaha tangara igamu, ma ki mareha vige raharaha tangagamu ngaira.

⁷“Manga vi ta na tamami na Isiraelita igê na hitangini na hinua igê na agua na Araha God iami i page haganahunigamu renia, ma ki matareha, siana kamu maongo, se vigamu usi vigamu tamania.

⁸Mu mahata hete ma kamu hagaba tanga araria i mauri re.

⁹Siana kamu usi vigamu hagaba tanga, suria ma vi na harisi ni bonoteniha ni hagaba ki sugia ma. Siana ki gâga igê na aitangihami na takoha era vikana. Manga mu usi vigamu hagaba tanga, ngaia ki page avarasia na Araha ki tamania pusigamu ma ngaia ki page surigamu ki hagaitangigamu.

¹⁰Mu mahata nga tanga ma siana kamu maongo. Vikana na Araha ki page katogi na ara ni tagaraha iami ka tavoraha bâkoro.

¹¹Tarema tani na Isiraelita ka matareha ma ki barabara tangara. Tahema inê kê bonasigamu, vigamu mamahata tangara.”

¹²“Manga vi na tamamu na Isiraelita, na mane se na gete, ma ki hagavuringenia marena tangago ki voravora re na kare vurivuri iamu, go naka vê ki asitatara i murini na harisi gi ono i tagara tangago igê. Igê na pita na harisi go naka nga vê ki asitatara.

¹³Ma siana ko kasia ki arâ vê baguru.

¹⁴Go mamahata tanga renigi na marâ na Araha i mahatangenigi tangago: na sipi, na goti, na koni ma na vaini.

¹⁵Go girara, vi igamu na Isiraelita kamu kare vurivuri i Esipito ma na Araha God iami ki hagatahigamu tenia. Tahema inê kê vategamu renia na ramata ngekana.

¹⁶“Vari na kare vurivuri iami ki pe obania vige arâ, suria i takuigamu igo ma na ahemata iamu ma ki arinusigamu vi gâga ma.

¹⁷Vikana ko merâ tanga na maani ruma iamu ma i ngekana ko taketake kurua igê na verona na karingana. Ngekana ngaia ki page vora re na kare vurivuri tare iamu. I tangenana ma na kare vurivuri hehene iamu.

¹⁸Siana ki aera na obamu matena go naka vê na kare vurivuri iamu ki asitatara. Bâ, ngaia ki tagara purua bâraha tangago surigi na harisi ge ono ma ko pe vuria igê. Go katokato vikana ma na Araha God iamu ki page katogi na tagaraha hato iamu ka tavoraha bâkoro.

¹⁹“Mu nakara râ tanga na Araha God iami na ara ni kareta mane hagâkani na puruka ma na sipi iami. Siana kamu hagatagarahira na puruka ngegana ma siana kamu tapurura na sipi ngegana.

²⁰I na ara ni harisi igamu ma na ahemata iami kamu ngaura nga i maana na Araha igê na agua apuna ni hagarahenga.

²¹Manga vi ta na hitangita ma ki apeape era, i abogo se i guru se i tarahua ta na tarana getea, siana kamu vogasia na Araha God iami renia.

²²I arari ma, vigamu ngaua i pasimi, igamu hato, henaka vigamu matarotaro se i mareha, tagenana ma manga mu ngaura na marâ mamauri vasiga.

²³Ma siana kamu ngaua na gapuna ma kamu karangia râ nga hete i ano manga na ve.