Read Kahua RAMATA 16 Bible Online

RAMATA 16 - Kahua bible

RAMATA 16

¹“Mu hagahigasia na Araha God iami igê na hageha na Abibi. Mu hagahigasia nga na paseka igê, suria na bungiana igê na hageha ngekana ngaia ki hagatahigamu igê tenia i Esipito.

²Mu arâ nga tanga na agua ni hagarahenga ma kamu nahuia ki meme igê ta na sipi se na puruka iami tanga na ngêra na paseka, hanana mu hagahigasia na Araha God iami.

³Matena mu ngêngê, siana kamu ngaua na bereti i ahunga surigi na tangiani gi pi. Mu ngaua ma na bereti i pe ahunga, manga mu ngê matena mu tavoraha susu tenia i Esipito. Mu ngaua na bereti ngekana, na bereti ni mamasiaganiha.

⁴I apu tangagamu vigamu nahunia na isiti i ruma iami surigi na tangiani gi pi igê na hinua iami. Na ganiana mu nahuia ki meme igê na manurahitana na tangiana hagenago, kamu ngaua nga igê na bungiana ngekana.

⁵“Mu nahuia nga na ganiana na paseka igê na agua apuna ni hagarahenga, mareha vi i he nikâ igê na hinua na Araha God iami i page haganahunigamu renigi. Mu nahuia nga igê na matena i susu na arito, na matena manga mu hura tenia i Esipito.

⁷Mu hagagoboa na hasigona ma kamu ngaua igê na agua apuna ni hagarahenga ma kamu kahu aporo i pasimi igê na tangiana i muri.

⁸Mu ngaua nga na bereti i pe ahunga surigi na tangiani gi ono. Igê na pita na tangiana mu hakuhaku, hanana mu rahesia igê na Araha God iami ma siana kamu tagara igê.

⁹“Mu tomanigi na wiki gi pi haganega tenia na matena mu rurugi haku igê na koni

¹⁰ma kamu kahu hagarahasia na tangiana raha ni nagoni na mu, hanana mu hagahigasia na Araha God iami. Mu tagarenia suria na obaniha iami maremi na vogasiha ni ngêra tanga, manga ga ganora se ga huguhugu bâraha na mu iami se hagarari ma, manga na Araha i vategamu renigi.

¹¹Mu vagevage nga i maana na Araha henira na karemi, na enoni tagara iami ma henira na raraha iana o Levi, henira na mahuara, na kare banogo ma na gete na nâ, ga oga i berarogami surigi na hinua iami. Mu katokato vikana nga igê na agua apuna ni hagarahenga.

¹²Mu marupegi maniga na ramata ngegana. Siana kamu bonotenia vigamu ka na kare vurivuri i Esipito.

¹³“Matena mu tahuru nuinuigi hato na koni iami ma kamu rusirusi hato na guani na vaini iami, mu hagarahasigi nga na tangiani raha ni ruhu surigi na tangiani gi pi.

¹⁴Mu vagevagesigi henira na karemi, na enoni tagara iami ma henira na raraha iana o Levi, ma henira na mahuara, na kare banogo ma na gete na nâ ga oga i berarogami surigi na hinua iami.

¹⁵Mu hagahigasia na Araha God iami, matena mu hagarahasigi na tangiani raha gi pi ngegana igê na agua apuna ni hagarahenga. Mu vagevage nga, suria na Araha God ki vategamu renigi na ngêra ma ki katogi na tagaraha iami ka akê me bâkoro.

¹⁶Na mane hato na Isiraelita ki tuguhira viga arâ ka rahesia na Araha hageoru igê na harisi igê na agua apuna ni hagarahenga: igê na paseka, igê na tangiana raha ni nagoni na mu ma igê na tangiani raha ni ruhu. Na ara ni mane ki mêra me nga na votovoto,

¹⁷i araria vi tagarenia surigi na nahuninga God i vatea renigi.”

¹⁸“Mu atera na mane ni hagatamasinga ma na mane ni hagaotonga surigi hinua hato, na Araha God iami i page haganahunigamu renigi. Na mane ngegana ka surira nga na enoni igê na monariha ma siana ka merapane tani.

¹⁹Ngaira ka surira nga na enoni igê na otoha ma siana na suriha iata ki arâ ma tanga ta apanena. Siana ka aganarigi na vatevate, suria na vatevate ki hagagurura na enoni. Henaka vi ngaira ka tako mataha se ga enoni ni monariha, na vatevate ka katogi na suriha iata ka pe ototo.

²⁰Mu surira oto tare nga na enoni, hanana mu page ogasia na agua, na Araha God iami i page haganahunigamu renia ma hanana mu gâga hagahu i ngekana.

²¹“Matena mu tagarahia na bea ni vogasiha tanga na Araha God iami, siana kamu hagêrasia ngahisia na apena na nununa ka Asera na ataro.

²²Siana kamu hagêrasia na hê borahu tanga na vogasiha ni ataro. Na Araha ki kitenigi ngavê na tarani ngegana.