Read Kahua RAMATA 17 Bible Online

RAMATA 17 - Kahua bible

RAMATA 17

¹“Siana kamu vogasia na Araha God iami renia na puruka se na sipi, i pe apeapekoro se i baubêga. Na Araha ki tenia ngavê na tarana ngekana.

²“Hoita, igamu kamu rongoa, vi ta na mane se na gete i ta na hinua iami ki haritohea na Araha ma ki aharêngia na suruheri iana na Araha,

³suria i vogasira ma ki hagarapera na ataro, se na arito se na hageha, se na higu. Na Araha ki manimania na tarana ngekana.

⁴Manga mu rongoa na rongoha vikana, mu garia maninga nga. Manga vi na eraha ngekana ma ki akê me monari i Isiraele,

⁵mu torea hura nga na enoni ngekana tenia na hinua ma kamu arihahunia nga ki meme,

⁶manga vi na vererua se ga haritamani, ka hagatanga monari renia. Manga vi na veretage ma kani hagatanga monari renia, siana kamu arihahunia ki meme.

⁷Na ani, ga hagatanga monari renia, ka arihatenigi hagenago nga na hê ma hemuri na enoni getera ka arihahunia. Vikana igamu kamu page hagamagahurua hagetage na eraha ngekana.

⁸“Vari tani na hagatamasinga ka barabara tangara na mane ni hagatamasinga i hinua vige hagaotogi, manga na hagatamasinga renia vi ti ka na avanuna ta na marâ, se renia na hagamamariha ninuni, se renia na nahunga ninuni. Vikana mu arâ nga tanga na agua apuna ni hagarahenga, na Araha God iami i atea.

⁹I ngekana igamu kamu tagarenia nga na tarana ngekana tangara na mane ni hagarahenga na raraha iana o Levi ma tanga na mane ni hagatamasinga, i tagara igê na matena ngekana, hanana ngaira ka hagaotoa.

¹⁰Ngaira ka page hagaotoa ma igamu arâ suria nga manga hanana ga vi tangagamu.

¹¹Mu aganaria nga na suriha iata ma kamu arâ surigi nga na kere manitarani igê.

¹²Na enoni i haritohea na mane ni hagarahenga se na mane ni hagatamasinga igê na matena ngekana, kamu nahuia nga ki meme. Vikana igamu kamu page hagamagahurua hagetage na eraha ngekana tenia i Isiraele.

¹³Vikana na enoni hato ga rongoa, ka page magu vige kato vikana nogata.

¹⁴“Matena mu parênia hato na agua na Araha God iami i page haganahunigamu renia ma kamu ogasia hato, vari igamu kamu obania na maneraha mangara na enoni i na agua hato getigi.

¹⁵Mu atea nga na mane, na Araha i bani atea, ki maneraha iami. Ngaia ka na hitangimi so ma igamu. Siana kamu atea na mahuara ki maneraha iami.

¹⁶Na maneraha ki apu, vige nahunira rako na hosi tangara na mane ni me iana, ma siana ki hagatorangenira na kariana tanga i Esipito, hanana vi vurira me nikâ tani na hosi, suria na Araha ki bani vi, vi na kariana ki hato vige aporo râ nikâ i ngekana.

¹⁷Na maneraha ki apu vige rakorako na gete iana, i era ma ki murisigea na Araha, ma ki apu vige aharêsia na siliva ma na golo.

¹⁸Na matena i vora re igê na maneraha, ngaia ki nahunia nga na buka na ramata ma na hagesuringa iana God, ga segea so tenia na bani ani i oga i pasita na mane ni vogasiha na raraha iana o Levi.

¹⁹Ngaia ki pe bonotenia rârâ na buka ngekana ma ki tomania tare hete suria na ogaha iana hagenani, hanana i girara i hagahigasia na Araha ma ki tototo surigi na ara ni bonasiha i rarona,

²⁰i era ma ki takusia, vi ngaia ki koro teharira na tamana na Isiraelita ma ki aharêngigi na ramata iana na Araha. Vikana ngaia ki page maneraha surigi rako na harisi ma na raraha iana ka page heheuri ka marungia i Isiraele.