Read Kahua RAMATA 18 Bible Online

RAMATA 18 - Kahua bible

RAMATA 18

¹“Na mane ni hagarahenga tenia na varo ninuni iana o Levi ki apu vige nahunigi na mako i Isiraele. Ngaira ka mauri renigi hete na votovoto ma na vogasiha, na Isiraelita ga tagarenigi tanga na Araha.

²Ngaira ki apu vige nahunigi na mako, nga noga ma na varo ninuni getera. Na apaneta ngaira ka na mane ni hagarahenga iana na Araha, manga i bani surua tangara.

³“Matena na enoni ka tagarenira na puruka se na sipi tanga na vogasiha, ngaira ka vatera nga na mane ni hagarahenga na gaparata, na parateta, ma na bahurita.

⁴Ngaira ki oto tangara viga nahunigi na nagoni na koni, na vaini, na oile ni olive ma na varehuta na sipi.

⁵Na Araha ki atea na varo ninuni iana o Levi tenigi na varo ninuni hato iami, hanana ga mane ni hagarahenga hagahu iana.

⁶“Manga ta na raraha iana o Levi i oga i ta na hinua i Isiraele ma ki obania vi arâ tanga na agua apuna ni hagarahenga, ki koro ma.

⁷Ngaia ki arari ma vi tagara i ngekana manga na mane ni hagarahenga iana na Araha God iana mangara na raraha getera iana o Levi ga tagara i ngekana.

⁸Ngaia ki nahunigi nga na ngêra ga tagenani ma henira na ani getera na mane ni hagarahenga ma ki nahunigi nikâ na anima na marâ i kasigi me na ahemata iana tanga.

⁹“Matena mu bêbanu igê na agua, na Araha God iami i page haganahunigamu renia, siana kamu arâ surigi na tauhata na ahuroto i ngekana, na tauhata God i kikitenigi ngavê.

¹⁰Siana kamu susu renira na karemi igê na gi igê na bea ni vogasiha iami. Siana kamu marumaru, se vigamu hagaata se vigamu hagangi,

¹¹se vigamu arangenia na enoni, se vigamu matu se vigamu mauru hesuri.

¹²Na Araha God iami ki ngaritenira ngavê na enoni ga katogi na tarani erataga ngegana. Tahema ngaia ki page tarigenira hura na ahuroto ngegana tenia na agua iata, matena mu gâga parera.

¹³Mu tototo suria ngavê na Araha.”

¹⁴O Moise ki vi: “Na enoni igê na agua, mu sugi parênia, ngaira ka râ surigi na girarasiha ma na mangataniha iata na enoni tenira na ani ga bani me. Na Araha God iami ki manimanigamu tenigi na tarani ngegana.

¹⁵Tahema ngaia ki page katoa ki voravora me na poropete i beragogami maremi manga inê. Ki tuguhigamu, vigamu têtê viteana.

¹⁶“Igê na matena mu haku i hunana na hungana i Sinai, igamu kamu usi, vigamu rongoa na Araha ge tamasi tangagamu nikâ, ma kamu pe obania vigamu bâsia nikâ na gi raha i oga igê, suria igamu kamu magu vigamu meme.

¹⁷Tahema na Araha ki vi tangê, ki vi, ‘Ngaira ka vi koro.

¹⁸Vikana inê be katoa ke vora me na poropete i berarogata mareta manga igo. Inê be tamasi i harana. Ngaia ki page hagarongora na enoni renigi na ara ni marâ gê visigi.

¹⁹Ngaia ki page tamasi urusiê. Inê kê page hagaitangia na anima na enoni, i usi vige tê viteana.

²⁰Manga ta na poropete ma ki togeaga ki tamasi, ki vi tamasi urusiku, ma inê kê pe kasia, hanana vige tamasi urusiê, ki tuguhia, viga nahuia ki meme. Ki tuguhia nikâ, viga katoa vikana nogana na poropete i tamasi urusia na ataro.’

²¹“Vari igamu kamu tako, kamu vi, ‘Manga i he kanimi girara, manga vi na poropete kani tamasi urusia na Araha se mareha?’

²²Manga ta na poropete ma ki vi, vi ngaia ki tamasi urusia na Araha, ma na tamasinga iana ki pe vaga me mave, hoi, na tamasinga ngekana ki pe râ me tenia na Araha. Ngaia ki na tamasinga iana marena ma. Siana kamu tongesuria na tamasinga iana.