Read Kahua RAMATA 19 Bible Online

RAMATA 19 - Kahua bible

RAMATA 19

¹“Na Araha God iami ki page haganahunigamu renia na agua iata na enoni i na apanena tarê na ve i Jotano. Ngaia ki page mutera na enoni i ngekana ma igamu kamu page parênia na agua iata ma kamu page ogasigi na hinua ma na ruma iata.

²Hato vikana, igamu kamu page voasia nga na agua ngekana ki voravora gi oru. Igê na ara ni hitangini ki gâga nga igê na hinua ni rukuha, i mataku viga arâ igê. Ngekana na enoni i nahunahu enoni ki page girara i gavagava ki rukuruku igê na hitangini.

⁴Manga vi ta na enoni ma ki bagararâ me ki nahuia ki me ta na enoni, i mareha vi na merongana, ngaia ki girara i gavagava tanga na hitangini na hinua ni rukuha ngegana, hanana i tahitahi igê.

⁵Ata ni vi ma: manga vi vererua na mane ma karu râ i bemu, karu tapitapi na ario. Matena na hitangiterua ki tapia na apinige, na bêna na akesi ki abotenia na gatana ma ki tahuru hunia na tamana. Hoi, vikana ngaia ki girara i tangotango tanga na hitangini na hinua ni rukuha gi oru ngegana, hanana i tahitahi igê.

⁶Manga vi na ani gi tage ma na hinua ni rukuha, vari ki hagatê tanga, ma na goana na mane i me ki oto tangara viga marabaru, ka page ranguia ma ka page nahuia ki meme baruna, suria ga mangariaga. Na tarana i manga ngekana ki pe oto, suria na mane ngekana ki pe katoa rârâ ta na tarana vige era. Ngaia ki bagararâ ma me ki nahuia ki me na mane i mareha vi na merongana.

⁷Tahema inê kê bonasigamu, kamu ategi na hinua gi oru ka hinua ni rukuha.

⁸“Matena na Araha God iami ki hagaraha hato na apanena na agua iami, manga i bani surua tangara na êvarimi, ma ki bani haganahunigamu hato renia na agua hagenani,

⁹igamu kamu ategi nga nikâ na hinua gi oru ka hinua ni rukuha. Na Araha ki page haganahunigamu renia na agua ngekana, manga vi igamu ma kamu arâ surigi na ara ni marâ gê bonasigamu renigi i ngekê akê ma kamu takuia na Araha God iami ma kamu marupegi na hagesuringa iana.

¹⁰Hoi, mu ategi vigana, i era ma ki me na enoni i bagararâ me ki nahuia ki me na enoni, ma ki era ma nikâ igamu kamu tasi, suria vigamu nahuia ki me igê na agua na Araha ki page haganahunigamu renia.

¹¹“Manga vi na enoni ma ki takusia gatagata nga vi nahuia ki meme na merongana ma ki nahuia ma hemuri ki gava ki rukuruku igê na hitangini na hinua ngegana,

¹²hoi, na meraha i hinua iana ka arâ nga i ngekana ka torea ma ka tagarenia tangara na goana na mane i me, i oto tangara viga nahunahu baruna hanana ga nahuia ki meme.

¹³Mu takotako hagetage vê renia. Mu hagamagahurua hagetage tenia i Isiraele, hanana na ogaha iami ki tavoraha bâkoro.

¹⁴“Siana kamu gurugurugi na pereperegani na mako iana ta na enoni, ga bani oga me kerevê noga igê na agua God i page haganahunigamu renia.”

¹⁵“Na tamasinga iana na vere tage ki pe arari, vige suria renia ta na enoni, i katoa na eraha se i aharêngia ta na ramata. Nga noga ma na vererua se tani me nikâ ngaira ka girara ka hagatanga monari renia na enoni, i katoa na tarana era.

¹⁶Manga vi na vere tage ma ki hagatoraia na enoni getea igê na kotiha, suria i obania vi hagaerasia,

¹⁷ngairerua hato ki tuguhirerua, vigaru arâ i ruma ni rotu gi tage togo, hanana na mane ni hagarahenga ma na mane ni suriha, ga tagara igê i na matena ngekana, ka surirerua.

¹⁸Na mane ni suriha ki tuguhira, viga hahariria maninga na hagatorainga. Manga vi na enoni ma ki hagatoraia monari na goana na Isiraelita,

¹⁹ki tuguhia, viga vatea na hagaitangiha, i araria na eraha, i hagatoraia na tamana renia. Vikana igamu kamu page hagamagahurua na hagatorainga.

²⁰Ngekana na enoni hato ka page girara ma ka page magu ma ki page hato na hagatorainga.

²¹“Manga ta na enoni ma ki katokato vikana, siana kamu takuia. Na hagaitangiha ki na mêriha tanga na mêriha, na maana tanga na maana, na rivona tanga na rivona, na rimana tanga na rimana, ma na êgana tanga na êgana.