Read Kahua RAMATA 2 Bible Online

RAMATA 2 - Kahua bible

RAMATA 2

¹“Igia ka aharaga tenia i Katesi ma ka aharêvoro igê na bagamasusu raha suria na tara tanga na Asi Memera, manga i bani visia tangagia na Araha. Igia ka gari tara arihu igê na hungani i Etome.

²“Ma hemuri na Araha ki vi tangê, ki vi,

³‘Mu tarupe. Ki arari noga.

⁴Gu bonasira na enoni vikê: Mu kari arigu. Mu aharêvoro igê na hungani i Etome na apanena iata na goami na raraha iana o Esau. Ngaira ka page magutenigamu.

⁵Siana kamu meraheariha, suria inê kê pe hagamarumungenigamu, hanana vigamu parênia na mako tenira, i mareha makoko vê. Inê kê bani haganahunira na raraha iana o Esau renia i Etome.

⁶Ma igamu ki koro ma, mu vurivuri na ve ma na ngauha tenira.’

⁷“Mu takusia tare, vi na Araha God iami ki katogamu, kamu tavoraha bâkoro igê na ara ni marâ. Ngaia ki marupegamu igê na raoha igê na bagamasusu raha. Ngaia ki ngahisigamu surigi na tangahuri harisi ge he, ma ki asa ta na marâ vige marehasigamu.

⁸“Vikana igia ka râ nga ma ka pania na tara i râ me tenigi na hinua i Elata ma i Esionegebere tanga na Asime. Igia ka kari arigu tanga i Moaba.

⁹Na Araha ki vi tangê, ki vi, ‘Siana kamu hagamamasiagara na ai ni Moaba na raraha iana o Loti, ma siana kamu meraheariha. Inê kê bani haganahunira renia na hinua i Are, ma inê ki asa be haganahunigamu igamu renia na mako iata, i mareha makoko ngavê.’”

¹⁰(I nago kerevê noga na Emita ka goga i Are. Ngaira ka na enoni ga bagararaha ma ka ramo ngavê. Ngaira ka borahu mangara na Enakita, ga bagararaha ma ka ramo ngavê nogata.

¹¹Na Emita ma na Enakita ka hêtata vi na Repaimi. Ma na Moabita ka hêtata na enoni ga borahu ni Are vi Emita.

¹²Na Gorita ka oga i nago i Etome ma na raraha iana o Esau ka tarigenira hura ma ka mutera, ma ka oga ngaira i ngekana. I hemuri na Isiraelita ka kato vikana nogata, matena ga tarigenira hura na merongata tenia na agua na Araha ki haganahunira renia.)

¹³“Hoi, igia ka tarêhia na ve i Sereti manga i bani bonasigia na Araha.

¹⁴Na raoha iaka tenia i Katesi Baranea ki tariha me ga tarêhia na ve i Sereti ki vora na tangahuri harisi gi oru matara ke varu. Ngaira hato na mane ni me na voraha haku ngegana ka bani me, manga i bani surua vikana na Araha.

¹⁵Na Araha ki ama ni merongasira nga mataro me ki mutera hato.

¹⁶Matena ngaira ka bani me hato,

¹⁷na Araha ki vi tangagia, ki vi,

¹⁸‘Hoita, i ngekê ki na matena iami, mu aharêvoro i Moaba suria na tara tanga i Are.

¹⁹Igamu kamu page mataro hagarangia na apanena iata na Amonita na raraha iana o Loti. Siana kamu hagamamasiagara, se vigamu meraheariha, suria inê ki asa be haganahunigamu renia na mako, gê haganahunira ngaira renia, i mareha makoko vê.’”

²⁰(Na apanena iata na Amorita ka hêtana nikâ vi na apanena iata na Repaimi, na atata na enoni ga oga i nago i ngekana. Na Amonita ka hêtata vi Samasumita.

²¹Ngaira ka borahu mangara na Enakita. Ngaira ka rako ma ka bagararaha ngavê. Na Araha ki mutera, hanana vi na Amonita ka oga parênia na apanena tenira.

²²Na Araha ki tamanira vikana nogata na Etomita na raraha iana o Esau, ga ogasigi na hungani i Etome. Ngaia ki mutera na Gorita, hanana na Etomita ka oga parênia na apanena tenira. I ngekê ngaira ka gâga mêngara i ngekana.

²³Na enoni tenia na marê i Kerete ka ogasigi na tarasini kereso. Ngaira ka mutera na Avita ga oga i nago i ngekana, ma ka oga parênia na apanena iata ki râ ki tariha i hinua i Gasa igê na Negeve.)

²⁴“Matena igia ka bani aharêvoro i Moaba, na Araha ki bonasigia, ki vi, ‘Hoita, hagarurugu ma kamu tarêhia na ve i Aranone. Inê be tagarenia tangagamu o Sigone ni Geseboni, na maneraha iata na Amorita henia na apanena iana. Mu taharia ma kamu henahuraua na apanena iana.

²⁵Haganega tenia i ngekê inê be katora na enoni surigi na agua hato, ke magutenigamu. Matena ga rongorongo tarohami ma, ma ka tatata ma ka magu ma.’

²⁶“Hoi, tenia na bagagmasusu raha i Ketemote inê kê hagatorangenira na mane tora tanasinga tanga o Sigone na maneraha i Geseboni. Inê kê pe takusia na hearihatana. Inê kê nungia ma vikê:

²⁷‘Gu nakagami, kami aharêvoro igê na apanena iamu. Igami kami ototo suria ma na tara ma kami pe arâ ahaharê.

²⁸Igami kami page vurivuri na ngêra ma na ve mi obanigi. Na marâ gi tage ma mi obania: kanimi aharêvoro igê na apanena iamu,

²⁹mataro me kami tarêhia na ve i Jotano, hanana mi bêbanu igê na agua, na Araha ki page haganahunigami renia. Bâ, na raraha iana o Esau ga oga i Etome, ma na Moabita ga oga i Are, ngaira ka nakagami, kami aharêvoro igê na apanena iata.’

³⁰“Ma o Sigone na maneraha ki usi, vige nakagia ka aharêvoro. Na Araha God iami ki naka ki togeaga ma ki guguruga, hanana igia ka girara ga teharia ma ka henahuraua na apanena iana, ma igia ka ogasia mênga.

³¹“Hoi, na Araha ki tamasi tangê, ki vi, ‘Bâ, inê kê bani katoa o Sigone na maneraha ki so na ramoha iana. Na apanena iana ki na animi. Mu parênia ma kamu ogasia.’

³²O Sigone henira na mane ni me hato iana ka râ me ka megiaheariha hagarangia na hinua i Jahasi.

³³Na Araha God iaka ki tagarenia tangagia, ma igia ka mutera ngaia, o karena ma na mane ni me hato iana.

³⁴Nikâ igia ka henahuraugi ma ka ruhuruhugi na ara ni hinua hato ma ka mutera na enoni hato, na mane, na gete ma na kare. Mareha rârâ na hitangita vige tahi.

³⁵Igia ka raura na togoha iata ma ka rurugugi na hinua.

³⁶Na Araha God iaka ki tamanigia, ka henahuraugi na hinua hato, haganega i Aroere i ta bogona na maruguna i Aranone na hinua i na gupuna, ki râ tare tanga i Gileata. Naka ma na hinua i nganganihaga, igia ka henahuraua.

³⁷Ma igia ka pe râ tanga na apanena iata na Amonita, se vi tanga na maruguna na ve i Jaboko, se vi tangagi na hinua igê na hungani, se vi tanga na anima na hinua, na Araha God iaka ki manimanigi tenigia.