Read Kahua RAMATA 20 Bible Online

RAMATA 20 - Kahua bible

RAMATA 20

¹“Matena mu râ kamu meraheariha na merongami, siana kamu magutenira, matena mu bâsira ga rakorako teharigamu henigi na kati ni me iata ma henira na mane ni me igê na hosi iata. Na Araha God iami, i hagatahigamu tenia i Esipito, ki page ngahisigamu.

²Hagenago ma ki kahu haganega na hearihatana ta na mane ni vogasiha ki rerâ me nga i maata na mane ni me ma ki vi tangara nga, ki vivi:

³‘Igamu na mane ni Isiraele, igamu karinga! I ngekê igamu kamu meraheariha na merongami. Siana kamu magutenira. Siana kamu bagahagêguri. Siana kamu tugupu.

⁴Na Araha God iami ki panepane henigamu ma ki page katogamu kamu tehateha.’

⁵“Hemuri na meraha iata na enoni ka vi tangara nga na mane ni me, ka vivi: ‘Manga vi ta na hitangimi ikê ma ki kahu tagarahia ma na ruma haoru iana ma ki mamênga vige gâga igê, hoi, ngaia ki aporo nga i ngekê, i era ma ki me igê na hearihatana ma na enoni getea ki gâga i ruma iana.

⁶Manga vi ta na hitangimi ikê ma ki kahu hasia ma na pariki ni vaini iana ma ki mamênga viga husihusi na guani, hoi, ngaia ki aporo nga i ngekê, i era ma ki me igê na hearihatana ma na enoni getea ki husigi ma ki tunumia na vaini.

⁷Manga vi ta na hitangimi ikê ma ki sugia ma vige auragi, hoi, ngaia ki aporo nga i ngekê, i era ma ki me igê na hearihatana ma na mane getea ki êragia na gete vi auragia.’

⁸“Hoita na maneraha iata na enoni ka vi tangara nga na mane ni me nikâ, ka vivi: ‘Manga vi ta na hitangimi ikê ki magu ma ki tatata ngavê, hoi, ngaia ki aporo nga i ngekê, i era ma ki katora na tamana ka bagahagêguri nogata.’

⁹Matena na meraha ka tamasi hato tangara na mane ni me, ngaira ka atera nga na mane ga bêngenira na apaneni na mane ni me hehegitigi.

¹⁰“I nago tarana mu taharia na hinua, mu hagatera hagenago nga na enoni igê, hanana ga tagarenira mareta tangagamu.

¹¹Manga vi ngaira ma ka tangahigi na maani para ni hinua ma ka tagarenira mareta tangagamu, ngaira ka voravora re na kare rakuraku iami ma kamu hagatagarahira tangagamu.

¹²Manga vi na enoni i hinua ngekana ma ka usi, vige tagarenira mareta tangagamu ma ka obania ma viga megamuheariha, hoi, na mane ni me iami ka gâgarihia nga na hinua ngekana.

¹³Manga vi na Araha God iami ma ki hagamarumu tangagamu hanana igamu hinahuraua na hinua ngekana, mu mutera nga na mane hato igê.

¹⁴Ma ki arari ma mu henahuraura tangagamu maremi na gete, na kare, na togoha ma na ara ni marâ hato getigi igê. Igamu kamu girara mu nahunigi na ara ni nahuninga hato iata na merongami, suria na Araha ki vategamu renigi.

¹⁵Nga hanana mu katogi na hinua ngegana ga hagatê tenia na agua mu page ogasia ngekana.

¹⁶“Tangagi na hinua igê na agua na Araha God iami ki page haganahunigamu renia, mu henahuraugi nga ma kamu mutera nga na enoni hato igê.

¹⁷Mu sinora ngavê na enoni hato: na Hitita, na Amorita, na Kananita, na Perisita, na Gavita ma na Jebusita, manga na Araha i bani bonasigamu vikana.

¹⁸Mu mutera nga, hanana siana ka hagesurigamu renigi na tarani ga erataga, matena ga vogasira na ataro iata ma ka hagatasigamu kamu murisigea na Araha.

¹⁹“Suria na matena mu uhungia vigamu henahuraua na hinua, henaka vi arihu manga i he, siana kamu tapigi so na apinige ni ngêra. Mu ngaugi hete na guani. Siana kamu tapigi so. Ngaigi ka mareha vi na merongami.

²⁰Na ani getigi na apinige ki koro ma vigamu tapigi so tangagi na erapi tanga mu agari igê, mataro me kamu henahuraua hato na hinua.