Read Kahua RAMATA 21 Bible Online

RAMATA 21 - Kahua bible

RAMATA 21

¹“Manga vi na enoni ma ka tarahua na gahuana i ta agua ma igê na agua, na Araha God iami i page haganahunigamu renia, ma igamu kamu pe girara, vi o ti kani nahuia ki me ngekana,

²hoi, na meraha ma na mane ni hagatamasinga iami ka arâ nga i ngekana ma ka hagevorea vi hagatê manga i he ka na agua ga tarahua igê na gahuana tenia na ara ni hitangini na hinua hagarangia.

³Hemuri na meraha igê na hinua i hagarangia ngavê na agua ga tarahua igê na gahuana ngekana, ngaira ka atea na bêhâgana na puruka hehene, ga pe hagatagarahia rârâ.

⁴Ngaira ka urua râ nga tanga na agua i na akerena na ve, i asa vige page mamata, igê na agua i mareha rârâ vige hikiru igê se vige hasihasi igê. Ma ka tahuru nguria nga na riona i ve ngekana.

⁵Na mane ni vogasiha na raraha iana o Levi ka arâ nga nogata i ngekana, suria i tuguhira viga garia maninga vi manga i he ka na ara ni hagatamasinga renia na henahuita. Na Araha God iami ki bani atera tanga na hagarahenga ma ka nungia ki korokoro tangara na enoni.

⁶Hemuri na meraha hato igê na hinua ga hagarangia ngavê na agua ga tarahua igê na gahuana ngekana, ka tanani rima so nga i avorana na puruka,

⁷ma ka vivi: ‘Igami kami pe nahuia ma kami pe hagarea rârâ vi o ti kani nahuhunia.

⁸Araha, gu takigami na kariamu na Isiraelita, go hagatahigami tenia i Esipito. Gu takigami ma siana ko hagaitangigami renia na nahuiana na enoni i pe erasia rârâ ta na marâ.’

⁹Vikana na hagaitangiha tanga na nahunga ninuni ki pe tarahugamu igamu, suria mu râ suria na tamasinga iana na Araha.

¹⁰“Matena na Araha God iami ki katogamu kamu tehateha igê na hearihatana ma kamu henahuraura na enoni,

¹¹vari i berarogata igo ko bâsia ta na gete i bâkoro ma ko obania vigo auragia.

¹²Go merâ nga i pasimu tanga na ruma iamu. I ngekana ngaia ki gorogoro bêhuri nga, ki misimisi na misini na kakêna,

¹³ma ki urisigi na gahu iana. Ngaia ki gâga nga i ruma iamu suria na hageha gi tage, hanana i mesirerua na enana ma hemuri ko kahu girara go auragia.

¹⁴Ma hemuri ma ko usisitenia, go naka vê nga ki asitatara. Suria go tuguria ki megomêru, siana ko katoa manga na kare rakuraku se vigo hagavuringenia.

¹⁵“Ata ni vi ma: na mane i herogarerua na gete gi rua. Ngairerua hato karu aparara kare mane, ma na bêbê ni kare mane iana na mane ngekana ki mareha vi na karena na gete i obania bâraha.

¹⁶Matena na mane ngekana i votogi na nahuninga iana tangara na karena, siana ki takusia bâraha ma o karena na gete i obania bâraha ma ki votogi tanga na nahuninga, ga oto tanga na bêbê ni kare mane iana, hanana i nahunigi.

¹⁷Henaka vi na bêbê ni kare mane iana ka no karena na gete i pe obania bâraha, ngaia ki vatea nga na apanena na nahuniga iana i biribirihuria akê hagerua teharia na anina o karena na gete i obania bâraha. Na mane ki girara nga na bêbê ni kare mane iana ma ki vatea nga renia na apanena na nahuninga iana, i oto tanga vi nahunia.

¹⁸“Ata ni vi ma: na arua karu apara o kareterua ma ki pe têtê viteaterua rârâ, henaka vigaru hagaitangia. Ngaia ki togeaga ki ama ni guguruga nga tangarerua.

¹⁹Na enana karu tagarenia nga tangara na meraha i hinua i oga igê, hanana ga hagatamasia.

²⁰Ngairerua karu vi tangara nga na meraha ngegana, karu vivi: ‘O karemirua ki togeaga ki ama ni guguruga nga tangagamirua. Ngaia ki usi ngavê, vige tê viteamirua. Ngaia ki kasigi purua ma na haga iana ma ki totono tare.’

²¹Hato vikana, na mane i hinua ka arihahunia nga ki meme. Ngekana igamu kamu hagamagahurua ngavê na eraha ngekana. Vikana na Isiraelita hato ga rongoa ka page magu, vige kato vikana nogata.

²²“Manga vi na enoni ma ki katoa na tarana i erataga ngavê ma ka suria ki meme renia, hoi, ga nahuia ki meme ma ka sugenia ki kukuku na gahuana igê na apinige ga hagêrasia.

²³Siana ki kukuku i ngekana mataro me na tangiana i muri. Ga bagia igê nga na tangiana ga nahuia igê ngekana, suria na gahuana na enoni i kukuku igê na apinige ki hagamangaria God. Manga vigamu naka mavê, igamu kamu hagaerasia na agua, na Araha God iami i page haganahunigamu renia.