Read Kahua RAMATA 23 Bible Online

RAMATA 23 - Kahua bible

RAMATA 23

¹“Na mane ga bani voea se ga bani retea râ na sisina, ngaia ki hato tenira na kariana na Araha.

²“Na kare ni tara ki bara vige kariana na Araha ma na raraha iata nogata, henaka vi na tangahuruta na apaparaha iata.

³“Na ai ni Amone ma ni Moaba ki bara vige kariana na Araha ma na raraha iata nogata, henaka i na tangahuruta na apaparaha iata,

⁴suria ngaira ka usi vige hagangêgamu ma ke hagatonomigamu, matena mu râ me tenia i Esipito. Nikâ ngaira ka vatevatea o Bileama karena o Beore ni Petore na hinua i Mesopotamia, hanana i kuasigamu.

⁵Henaka ma na Araha God iami ki pe tê ringena o Bileama ma ngaia ki horoa hete na kuasiha igê na koroha tangagamu, suria i takuigamu.

⁶Vikana siana hagetage kamu tamanira na enoni ngegana, hanana vige tarahua na ramana.

⁷“Siana kamu kikitenira na ai ni Etome, suria ngaira ka na goami. Siana kamu kikitenira na ai ni Esipito, suria i nago igamu kamu oga i pasita.

⁸Tenia na oruta na apaparaha iata ngaira ka girara ga voravora re na kariana na Araha.

⁹“Matena mu arâ tanga na hearihatana ma kamu taunga, siana kamu katogi na marâ, ga katogamu kamu pe matarotaro.

¹⁰Manga na mane ma ki pe matarotaro, suria i ororo matena i mauru, ngaia ki huhura nga tenia na tênga ma ki gâga nga i metara.

¹¹I manurahi ngaia ki mamanu nga ma na matena i susu na arito, ngaia ki girara i kahu bêbanu me aporo igê na tênga.

¹²“Mu hatare nga i metara na tênga igê na agua tanga.

¹³Matena mu arâ tanga na hatarenga, mu migirâ na apinige ni âpaha ni kiru ni hegata tanga mu hegahega hato igê ma kamu ahunigi re.

¹⁴Na tênga iami ka matarotaro nga tare, suria na Araha God iami ki oga i berarogami igê na tênga iami, hanana i anumasigamu ma ki tamanigamu kamu teharira na merongami. Siana kamu katoa na tarana i pe obania, i era ma ki murisigegamu.

¹⁵“Manga vi na kare vurivuri ma ki gavagava tenia na avanuna ma ki arâ me ki rukuruku i pasimi, siana kamu hagatorangenia aporo tanga na avanuna.

¹⁶Mu naka ma ki gâga asitatara igê na hitangini na hinua iami, i atea marena. Siana kamu katoa bera matena i gâga i pasimi.

¹⁷“I apu hagetage tanga na Isiraelita, na mane se na gete, vige vora re na êrâ igê na ruma ni vogasiha ni ataro.

¹⁸Nikâ na haga, ga voravora me igê na tarana ngekana, ki apu, vige tagarenigi tanga na ruma ni rotu iana na Araha God iami, hanana vige hagamonaria na suruha iata. Na Araha ki kitenira ngavê na êrâ ngegana.

¹⁹“Matena go hagaba renigi na haga, se na ngêra, se na ani mavê na marâ tanga na tamamu na Isiraelita, siana ko turia ki hagabaha kê nikâ.

²⁰Manga go hagaba tanga na mamahuara, ki arari ma go turia ki hagabaha kê nikâ, ma siana vi tanga na tamamu na Isiraelita. Mu marupea nga na ramata ngekana ma na Araha God iami ki page katogi, ke tavoraha bâkoro na tagaraha iami igê na agua mu page ogasia.

²¹“Matena go surusuru tanga na Araha God iamu, siana ko kakaviaga renia. Na Araha ki hagasugo renia na suruha iamu. Manga go pe hagamonaria, igo ko tasi.

²²Matena go pe surusuru tanga na Araha, igo ko pe tasitasi.

²³Ma ki manga go surusuru, suria vi igo maremu ko obania, hoi, go hagamonaria nga.

²⁴“Manga go arâ suria na tara igê na pariki ni vaini iana ta na enoni, ki koro ma, go ngaugi ka tungigo na guani na vaini, ma ki apu vigu huhuhu huria na anga se na marâ vigana tanga igo totora.

²⁵Manga go arâ suria na tara igê na mu ni koni iana ta na enoni, i arari ma go husigi ma ko ngaugi ka tungigo, ma siana ko retegi na apeni hagenani.