Read Kahua RAMATA 24 Bible Online

RAMATA 24 - Kahua bible

RAMATA 24

¹“Manga na mane ma ki êragia na gete, ma hemuri ngaia ki usitenia, suria ngaia ki tarahugi tani na tarani na gete ki pe koro igê. Vikana ngaia ki segea na pepa ni hekasigiana ma ki vatea renia, ma ki paia hura tenia na ruma iana.

²Hoi, ma ki manga na gete ngekana ma ki êragia na mane getea,

³ma hemuri na mane ngekana ki usitenia nogana, ngaia nogana ki segea na pepa ni hekasigiana, ki vatea renia ma ki paia hura tenia na ruma iana. Se na ruata na mane ngekê ki me tenia.

⁴Igê na tarani gi rua ngegana o vaniana hagenago ki pe arari vige êragia aporo, suria i takusia nga vi na gete ngekana ki apu tanga. Manga vi êragia aporo, vikana ki erataga ngavê i maana God. Siana igamu kamu tasitasi raha vikana igê na agua, na Araha God iami ki sugi haganahunigamu renia.

⁵“Manga vi na mane ma ki auragi haoru, ngaia ki pe araria vige arâ igê na hearihatana, ma ki apu nikâ, vige torea hura tangagi ta na tagaraniha. Ngaia ki araria ma, ki gâga tonge i hinua suria na harisi gi tage, hanana i hagakoro obana kaniana.

⁶“Manga na enoni ma ki torea noga ta na marâ tenigo, siana ko tuguria ki naka i pasimu ta na marâ, i kavikavi igê matena i hagamako ngêra. Manga go katoa vikana, igo ko torea vê tenia na ahemata iana na marâ, i taua na ogaha iata.

⁷“Manga na enoni ma ki raua na tamana na Isiraelita, hanana vi katoa renia kare rakuraku iana, se vi hagavuringenia ki voravora re na kare rakuraku iana ta na enoni getea, hoi, mu nahuia nga ki meme na enoni i katokato vikana. Vikana igamu kamu hagamagahurua na eraha ngekana.

⁸“Manga i tarahugamu na asiahu se na maeha vigana, mu arâ surigi maninga nga na tamasinga iata na mane ni hagarahenga. Mu marupegi nga na hagesuringa, gê bani vatera renigi.

⁹Mu takusia aporo na tarana i bani katoa na Araha God iami tanga ka Miriama, matena mu hura tenia i Esipito.

¹⁰“Matena mu naka ta na enoni ki torea noga ta na marâ, siana kamu bêbanu i ruma iana, hanana vigamu torea na gahu iana, i takusia vi naka i pasimi manga vi na baruna, mataro me ki hagaporosia tangagamu na marâ i torea noga tenigamu.

¹¹I tuguhigamu, mu gâga naasia i metara, hanana ngaia ki torea me tangagamu.

¹²Manga vi ngaia ma ki matareha, siana ki tâtâ i pasimi na gahu iana suria na bungiana hagenani.

¹³Mu hagaporosia tanga i na ara ni manurahi, hanana ngaia ki girara i tokotoko renia, matena i mauru. Vikana ngaia ki page visigamu koro ma na Araha God iami ki page obakoro renigamu.

¹⁴“Siana kamu hagabekasia na enoni tagara i matareha ma ki bara tanga, naka ma vi ngaia ki na goami na Isiraelita se vi na mahuara i oga i ta na hinua i pasimi.

¹⁵I na ara ni tangiana matena na arito ki mamênga, vige susu, ki tuguhigamu, mu vuria na mena na tagaraha iana igê na tangiana ngekana. Ngaia ki kavikavi igê na haga ngekana ma ki takusia vi tavoa. Manga mu pe vuria, ngaia ki page hagagege tanga na Araha renigamu, ma igamu kamu tasitasi.

¹⁶“Siana kamu nahuira ka meme na enani kare renigi na bagatauhata na kareta, se vi na kareta renigi na bagatauhata na enata. Mu nahunahu hunia na enoni renigi hete na bagatauhana marena.

¹⁷“Siana kamu taugi tenira na mahuara ma na kare banogo na marâ ga oto tangara. Siana kamu torea na gahu iana na gete na nâ, hanana vi na baruna na marâ, i torea noga tenigamu.

¹⁸Mu takusia, matena mu vora re na kare rakuraku i Esipito ma na Araha God iami ki rupasigamu. Tahema inê kê bani vategamu renia na ramata ngekê.

¹⁹“Matena mu toratora haku na harisi iami ma kamu bonotenigi vê tani i mu, siana kamu aporo kamu totora. Mu nakagi ma vê tangara na mahuara, na kare banogo ma na gete na nâ, hanana na Araha God iami ki tamanigamu igê na tagaraha hato iami.

²⁰Mu husihusi na guani na olive iami hagetage togo ma. Siana kamu aporo kamu husihusi na guani ga hitahita vê, suria ngaigi ka na anita na mahuara, na kare banogo ma na gete na nâ.

²¹Mu husihusi na guani na vaini iami hagetage togo ma. Siana kamu aporo kamu husihusi na guani, ga hitahita vê, suria ngaigi ki na anita na mahuara, na kare banogo ma na gete na nâ.

²²Siana kamu bonotenia, vi igamu kamu vora re na kare rakuraku i Esipito. Tahema inê kê vategamu renia na ramata ngekê.