Read Kahua RAMATA 26 Bible Online

RAMATA 26 - Kahua bible

RAMATA 26

¹“I murina mu parênia na agua, na Araha God iami ki sugi haganahunigamu renia, ma kamu ogasia,

²na ara ni hitangimi ki tuguhia, i nakagi i rarona na heni na nagoni na ara ni ngêra hehegitigi tenigi na mu iana, ma ki totora râ tanga na agua gi tagena togo ni vogasiha.

³Mu arâ i pasina na mane ni vogasiha i tagara igê i na matena ngekana kamu vivi, ‘I ngekê inê kê visia mataha i maana na Araha God iaka, vi inê kê banu igê na agua, i bani surua tangara na êvarika, vi vategia.’

⁴“Na mane ni vogasiha ki page toregi na heni tenigamu ma ki page nakagi i maana na bea ni vogasiha iana na Araha God iami.

⁵Ma hemuri i maana na Araha mu vivi haku vikê: ‘Na êvariku ki na mane ni Aramea, i pe nahunia na agua ni ogaha iana. Ngaia ki merarâ na ahemata iana tanga i Esipito, ma ka oga igê. Ngaira ka pe rako, matena ga râ i ngekana. Ma ngaira ka vora na apaneni me gahu ma ka raramohaga.

⁶Na ai ni Esipito ka hagamamasiaga apeka ma ka tugurigia ka tagara mangara na kare rakuraku.

⁷Ma igia ka avarasia na Araha God, na êvarika ga rahesia. Ngaia ki aganarigia. Ngaia ki bâsigi na mamasiaganiha, na hagamamasiaganiha ma na bagabevoani ga tarahugia.

⁸Ngaia ki hagatahigia tenia i Esipito renia na raramohana raha. Ngaia ki katogi na mena ma na tagaraha raha ma na marâ ga hagamamagutaga.

⁹Ngaia ki bêngenigia me ikê ma ki haganahunigia renia na agua na mako koro ni ngauha ma ni togoha.

¹⁰Tahema inê kê tagarenigi tanga na Araha na nagoni na ngêra, i vateê tenigi na mu iaku.’ “Hemuri kamu nakagi so na heni i maana na Araha ma kamu rahesia.

¹¹Mu visia koro na Araha God iami renigi na marâ koro, i vategamu, igamu ma na ahemata iami. Mu guhira tanga na ngêra na mane ni hagarahenga ma na mahuara, ga oga i berarogami.

¹²“Igê na ara ni oruta na harisi mu tagarenigi igê na tangahuruta na ngêra tenigi na mu iami tangara na mane ni hagarahenga, na mahuara, na kare banogo ma na gete na nâ, hanana surigi na ara ni hinua ngaira ka page nahunigi na ngauha ga mauri re. Matena mu katokato vikana,

¹³mu vi tanga na Araha, kamu vivi, ‘I mareha tani na tangahuruta na ngêra tangago, vige hita so i pasiku. Inê kê bani vatera na mane ni hagarahenga, na mahuara, na kare banogo ma na gete na nâ, manga go bani bonasiê renia. Inê kê pe aharêngia se vi ve bonotenia na anima na ramata iamu renia na tangahuruta na ngêra.

¹⁴Inê kê pe hagatataka rârâ renigi tani. Inê kê pe tavogi râra tani tenia na ruma iaku, matena gê pe matarotaro. Inê kê pe ahunigi rârâ tani henira na enoni ga me. Inê kê tê viteamu, Araha. Inê kê marupegi na ramata hato iamu renia na tangahuruta na ngêra.

¹⁵Tenia i pasimu gu takuira na kariamu na Isiraelita ma ku korokoro tangara. Gu katoa na agua na mako koro ni ngauha ma ni togoha ke tavoraha bâkoro, na agua go haganahunigami renia, manga go bani surua tangara na êvarimami.’”

¹⁶O Moise ki vi nikâ: “I ngekê na Araha God iami ki bonasigamu, hanana mu marupegi na ramata hato iana. Hoi, mu marupegi maninga nga i mêrihami hagenani.

¹⁷I ngekê igamu kamu bani aganaria na Araha, hanana vi God iami. Igamu kamu suru, vigamu têtê viteana, kamu marupegi na ramata hato iana ma kamu katogi na marâ hato, i bonasigamu renigi.

¹⁸I ngekê na Araha ki bani aganarigamu, vi igamu ka na kariana, manga i bani surua tangagamu. Ngaia ki bonasigamu, hanana mu marupegi na ramata hato iana.

¹⁹Ngaia ki page hagarakonigamu teharira na apaneni me hato getera i hagavorara, ma igamu kamu page hagarahasia ma kamu page hagahigasia. Igamu kamu page voravora re na kariana marena, manga i bani visia.”