Read Kahua RAMATA 27 Bible Online

RAMATA 27 - Kahua bible

RAMATA 27

¹Hemuri o Moise henira na enoni raha iata na Isiraelita ki vi tangara na enoni, ki vi: “Mu amaka surigi na hagesuringa hato, gê vategamu renigi i ngekê.

²Matena mu tarêhia na ve i Jotano ma kamu bêbanu igê na agua, na Araha God iami ki sugi haganahunigamu renia, ki tuguhigamu, mu hagêrasigi tani na bagahê raha ma kamu pupunigi siki.

³Mu segegi nga igê na ramata ma na hagesuringa hato ngegê. Matena mu atata vê igê na agua na mako koro ni ngauha ma ni togoha, na Araha God iata na êvarimi ki bani surua tangagamu,

⁴ma na matena mu gâga i na apanena tarê i Jotano, mu hagêrasigi nga na hê siki i hungana i Ebale, manga gê bonasigamu i ngekê.

⁵I ngekana nikâ ki tuguhigamu, mu tagarahia igê na panga na bea ni vogasiha. Siana kamu ninigi na hê renigi na aiani,

⁶suria na hê ga ninigi ki apu, vige tagarahia renigi na bea ni vogasiha tanga na Araha God iami. I ngekana mu susu igê tanga na Araha,

⁷ma kamu vogasia nga igê renigi na votovoto tanga na ngêra haku apuna iami. Mu visia koro na Araha God iami renigi.

⁸Igê na hê siki ngegana mu segegi so maninga igê na ara ni ramata hato iana na Araha.”

⁹Hemuri o Moise henira na mane ni hagarahenga ki vi tangara na Isiraelita hato, ki vi: “Isiraelita, mu karingê ma kamu rongo! I ngekê igamu kamu bani vora re na kariana na Araha God iami.

¹⁰Hoita, mu têtê viteana ma kamu marupegi na ramata hato iana, gê vategamu renigi i ngekê.”

¹¹O Moise ki vi tangara na Isiraelita, ki vi:

¹²“Matena mu tarêhia hato i Jotano, na varo ninuni iata hehegitigi o Simeone, o Levi, o Juta, o Isakare, o Josepo mo Benamino ki tuguhira, ga rêra igê na hungana i Gerisimi ma ka ngerehenigi na korohana na Araha tangara na enoni ga têtê viteana.

¹³Na varo ninuni iata hehegitigi o Rubeni, o Gata, o Asere, o Sebuluni, o Tane mo Nepatali ki tuguhira, ga rêra i hungana i Ebale ma ka ngerehenigi na hagaitangiha tanga na guguruganiha.

¹⁴“Na mane ni hagarahenga ka page ngerengere raha vikê:

¹⁵“ ‘God ke hagaitangia na anima na enoni, i tagarahia na nununa na ataro renia na hê, se renia na apinige se renia na kapa, ma ki hagarapea pinihi. Na Araha ki ngaritenia ngavê na vogasiha ni ataro. “Na enoni hato ka page arami, ka vivi, ‘Monari!’

¹⁶“God ke hagaitangia na anima na enoni i pe hagahigasirerua o vaemana ma kenana. “Na enoni hato ka page arami, ka vivi, ‘Monari!’

¹⁷“God ke hagaitangia na anima na enoni i gurua na pereperegana na mako iana na tamana. “Na enoni hato ka page arami, ka vivi, ‘Monari!’

¹⁸“ ‘God ke hagaitangia na anima na enoni, i urua bera na enoni, i guru taropuru na maana. “Na enoni hato ka page arami, ka vivi, ‘Monari!’

¹⁹“ ‘God ke hagaitangia na anima na enoni, i urapusigi na tarani ga oto tangara na mahuara, na kare banogo ma na gete na nâ.’ “Na enoni hato ka page arami, ka vivi, ‘Monari!’

²⁰“God ke hagaitangia na anima na mane i hagamakia o vaemana, suria i rongo era henia na anima na hitangita na gete iana o vaemana. “Na enoni hato ka page arami, ka vivi, ‘Monari!’

²¹“ ‘God ke hagaitangia na anima na mane, i rikihia na goti, se na sipi ma na marâ vigana. “Na enoni hato ka page arami, ka vivi: ‘Monari!’

²²“ ‘God ke hagaitangia na anima na mane, i rongo era henia kesina se keogana.’ “Na enoni hato ka page arami, ka vivi: ‘Monari!’

²³“ ‘God ke hagaitangia na anima na mane, i rongo era henia ka hungâna.’ “Na enoni hato ka page arami, ka vivi: ‘Monari!’

²⁴“ ‘God ke hagaitangia na anima na enoni i nahunahu piria na enoni.’ “Na enoni ka page arami, ka vivi: ‘Monari!’

²⁵“ ‘God ke hagaitangia na anima na enoni, i taua na vatevate, hanana vi nahuia ki meme na enoni, i pe erasia rârâ ta na marâ.’ “Na enoni hato ka page arami, ka vivi: ‘Monari!’

²⁶“ ‘God ke hagaitangia na anima na enoni, i pe marupegi na ramata ma na hagesuringa hato iana God.’ “Na enoni hato ka page arami, ka vivi: ‘Monari!’