Read Kahua RAMATA 28 Bible Online

RAMATA 28 - Kahua bible

RAMATA 28

¹Manga mu têtê vitana na Araha God iami ma kamu marupegi maninga na ramata hato iana, gê vategamu renigi i ngekê, ngaia ki page hagarakonigamu teharira na apaneni me hato getera i maveta.

²Mu têtê viteana na Araha God iami, ma ngaia ki page korokoro tangagamu vikê.

³“Na Araha ki page katogi na hinua iami ki hagagara koro ma na mu iami ka page ganora bâkoro.

⁴“Na Araha ki page hagarakonira na karemi, na puruka, na sipi ma na goti iami, ma ngaia ki page hagaharêsigamu renigi na ngauha.

⁵“Na Araha ki page katogi na mu iami, ki akê bâkoro, hanana mu nahunigi na ngêra mu ngaugi.

⁶“Na Araha ki page katogi ki tavoraha maninga na tagaraha hato iami.

⁷“Na Araha ki page teharira na merongami, matena ga taharigamu. Ngaira ka page taharigamu tenigi na ara ni agua rihigamu, ma ngaira ka page gavagava surigi na ataka mavê na agua tenigamu.

⁸“Na Araha God iami ki page vategamu na meni na tagaraha i mu iami, ma na ruma ni ngêra iami ka page vunuvunu mamasuaga. Ngaia ki page haganahunigamu renia na ramana igê na agua, i sugi vategamu renia.

⁹“Manga mu têtê viteana na Araha God iami ma kamu marupegi na ramata hato iana, ngaia ki page aganarigamu, kamu voravora re na kariana marena, manga i bani visia.

¹⁰Vikana na enoni hato getera i maveta ka page giraragamu, vi igamu ka na kariana marena, ma ngaira ka page magutenigamu.

¹¹Na Araha ki page hagarakonira na karemi ma na puruka iami, ma ki page hagaharêsigamu renigi na ngauha igê na agua, i bani surua tangara na êvarimi, hanana viga vategamu renia.

¹²Tenia na ruma raha ni rangi iana i vavearo ngaia ki page hagarangisigi na mu iami igê na matena tanga. Vikana igamu kamu page hagavuri tangagi na agua rako getigi, ma igamu ki asa, vigamu vurivuri tenira ngaira, suria ga aharêsigamu na ara ni marâ mu obanigi.

¹³Na Araha God iami ki page katogamu, kamu bêngenira na enoni getera i maveta, ma ki asa vige bêngenigamu ngaira. Igamu kamu page gâga igê na ramana ma kamu page tavoraha bâkoro igê na ara ni marâ, manga vi igamu ma kamu marupegi maninga na ramata hato iana, gê vategamu renigi i ngekê.

¹⁴Siana hagetage kamu aharê igê na ani mavê na tarani, se vigamu vogasira ma kamu hagarapera na ataro.

¹⁵“Manga mu haritohea na Araha God iami ma kamu pe marupegi maninga na ramata ma na hagesuringa hato iana, gê vategamu renigi i ngekê, ka page tarahugamu na hagaitangiha hato igê:

¹⁶“Na Araha ki page hagaerasigi hinua ma na mu iami.

¹⁷“Na Araha ki page hagaerasigi na ngêra iami, vigamu ngaugi.

¹⁸“Na Araha ki asa, vige hagarakonira na karemi, na puruka, na sipi, ma na goti iami, ma ki page katogi na mu iami ka pe ganora bâkoro.

¹⁹“Na Araha ki page katogamu, ki asa vigamu tavoraha bâkoro igê na anima tagaraha iami.

²⁰“Manga mu bagatauhami ma kamu haritohea na Araha, ngaia ki page hagaitangigamu renigi na bagabevoani, na anumanumaha ma na votaha igê na tagaraha hato iami, mataro me kamu hata ni mutemute hato.

²¹Ngaia ki page hagaitangigamu hesurisuri renigi na mera, mataro me kamu meme hato tenia na agua, mu sugi parênia.

²²Na Araha ki page nahigamu renigi na ringa, na mamanuha ma na matoroha. Ngaia ki page katogi na arito ru ma na roga mahana, hanana ga hagaerasigi na mu iami. Na tarani erataga ngegana ka page tarahugamu rârâ, mataro me kamu meme.

²³I asa ngavê vige rangi rârâ, ma na mako iami ka page avagavaga ma ka page rate manga na hê.

²⁴Suria i mareha na rangi, tahema na Araha ki page katogi na roga raha ni mono ma ni one ka nahuigamu, mataro me kamu mutemute.

²⁵“Na Araha ki page nakara na merongami ka teharigamu. Igamu kamu page taharira tenigi na ara ni agua rihira, ma igamu kamu page gavagava surigi na ataka mavê na agua tenira. Vikana na enoni hato i maveta ka page bubununuga, matena ga bâsigi na tarani, ga tarahugamu.

²⁶Matena mu meme, na manu ma na marâ vasiga ka page arâ me ka ngaugi na gahuami, ma ki asa ta na enoni, vige tarigenira tenigamu.

²⁷Na Araha ki page katogamu kamu mamanu, manga i bani katora noga na ai ni Esipito. Na babasu ka page manasigi na apemi hagenani. Mu page gagaro ngavê ma ka nunuriga na apemi. Ma ki asa iami, vigamu apekoro aporo.

²⁸Na Araha ki page katogamu, kamu bekabekaga. Igamu kamu guruguru taropuru, ma kamu page tugupu ngavê.

²⁹Igamu kamu ototo purupuru manga na enoni i guru taropuru, naka ma igê na tangiana, ma ki asa iami, vigamu page togâna i he. Na tagaraha hato iami ki asa vige tavoraha maninga. Ga page hagamamasiagagamu tare, ma ka page hanago tenigamu, ma ki asa ta na enoni vige tamanigamu.

³⁰“Ga page atengenira na kere gete tangagamu, ma na mane getera ka page auragira ngaira tenigamu. Igamu kamu page torea na ruma, ma ki asa iami vigamu oga igê. Igamu kamu page hasigi na pariki na vaini, ma ki asa iami, vigamu ngaugi na guani na vaini.

³¹Ga page harasira na puruka iami i maami maremi, ma ki asa iami vigamu ngaugi na hasigoni. Ga page bahenira vê na tonki iami tenigamu i maami maremi, ma ki asa vige hagaporosira tangagamu. Na merongami ka page raura na sipi iami, ma ki asa ta na enoni vige page tamanigamu.

³²I maami maremi na mahuara ka page raura o karemi ma ka karemi, hanana viga voravora re na kare rakuraku iata. I na ara ni tangiani igamu kamu page borebore rapurapu ma igamu kamu page borebore makira, suria na karemi ki asa iata, vige aporo me.

³³Na mahuara tenia na agua getea ka page hanagogi na ngêra hato tenigi na mu iami. I asa iami vigamu page nahunigi na meni na tagaraha i mu iami. Ga page hagamamasiagagamu tare ma ka page katogamu bera tare.

³⁴Na mamasiaganiha iami ka page katogamu kamu bekabekaga.

³⁵Na Araha ki page katogi na êgami ka mamanu ngavê, ka harahara ma ki asa vige page mavo aporo. Na babasu ka page manasigi na apemi haganani, haganega i bêmi ki so ki mataro i na baba ni ugami.

³⁶“Na Araha ki page toregamu vê, igamu ma na maneraha iami, tanga na agua getea, na agua igamu ma na êvarimi kamu pe bani oga me noga igê i nago. I ngekana igamu kamu page hagarapera igê na ataro, ga tahera renigi na apinige ma na hê.

³⁷Igê na agua na Araha ki page tokorenigamu surigi, igamu kamu page hagamamaguraga tangara na enoni i ngegana, matena ga bâsigi na tarani ga tarahugamu. Ngaira ka page hagaru renigamu ma ka page megamumarabe.

³⁸“Igamu kamu page hasihasi rako na ngêra ma na ngêra ki asa vige rako, suria na pê ka page ngaugi na mu iami.

³⁹Igamu kamu page hasihasi na pariki ni vaini ma kamu page bâbâsurigi, ma igamu ki asa vigamu husi guani, se vigamu totono na vaini tenigi, suria na mama ka page ngaugi.

⁴⁰Na apinige ni olive ka page manasia na apanena iami, ma na oile ni olive ki page marehasigamu, suria ga mabomebome na guani.

⁴¹Igamu kamu page apara kare, mane ma na gete, ma igamu kamu page têtê tara renira, suria na merongami ka page henahuraura.

⁴²Na pê ka page ngaugi na apinige ni ngauha ma na mu hato iami.

⁴³“Na mahuara ga oga igê na apanena iami, ka page ama ni ramoramo nga, ma na raramohami iami ki page ama ni soso nga.

⁴⁴Ngaira ka page tongatonga re na haga, hanana ga page vategamu hagaba na haga, ma tangagamu igamu ki bara, vigamu vatera na hagaba. Ki arârâ, ngaira ka page marungigamu.

⁴⁵“Na bagabevoani hato ngegana ka page tarahugamu ma ka page hagamamasiagagamu, mataro me kamu mutemute, suria igamu kamu pe tê viteana na Araha God iami ma kamu pe marupegi na ramata hato, i vategamu renigi.

⁴⁶Na tarani ngegana ka page hagatanga monari, vi God ki rumakaka renigamu, igamu ma na raraha iami.

⁴⁷Na Araha ki koro tangagamu igê na ara ni tarani, tahema igamu kamu pe gagêmaga, hanana vigamu toto suria ma kamu vagevagesia.

⁴⁸Tahema igamu kamu page oga i ruguhata na merongami, na Araha ki nakara ka taharigamu. Igamu kamu page magê, ki page mamata na riomi ma kamu page rupaturi. I page marehasigamu ngavê na ani mavê na marâ. Na Araha ki page nakara na merongami, ka hagamamasiagagamu ngavê, mataro me kamu mutemute.

⁴⁹Na Araha ki page nakara na apaneni me tenia na agua hagatê ngavê ka taharigamu. Igamu ki asa vigamu giraragi na tamasinga iata. Ngaira ka page hagavato hurigamu manga na ahetaronga.

⁵⁰Ngaira ki asa ngavê vige hetaki, se vige takia na anima na enoni, naka ma na kare se na gemêa.

⁵¹Ngaira ka page ngaura na togoha iami ma na mu iami, ma igamu kamu page mesi magêha. I asa ngavê, ta na marâ vige hitahita so tangagamu: mareha vi na ngêra, na vaini, na oile ni olive, na puruka se vi na sipi, se vi na goti. Igamu kamu page meme nga.

⁵²Ngaira ka page taharigi na ara ni hinua igê na agua, na Araha God iami i sugi haganahunigamu renia. Igamu kamu page hagêgurigi na para ni hinua, suria ga nganganihaga ma ka akê ngavê. Ma ngaigi ki page ahogehoge hete.

⁵³Matena na merongami ka gâga rihuigi na hinua iami, igamu kamu page magê ngavê. Vikana igamu kamu page ngaura na karemi, na Araha ki vategamu renira.

⁵⁴I tagenana ma na maneraha, i ruruguha ngavê. Matena na merongana ka gâga rihuia na hinua iana, ngaia nogana ki page magê ngavê. Tahema ngaia ki page ngaura tani na karena marena, suria i marehasia ngavê na ngêra getigi. Ngaia ki asa vige meratongani na goana, se vi kaniana hetakui, se vi na karena ga hitahita râ mêngara.

⁵⁵

⁵⁶I tagenana ma tanga na gete raha i ruruguha ngavê ma ki pe tagara marena rârâ. Ngaia ki page manga ngekana nogana. Matena na merongana ka gâga rihuia na hinua iana, ngaia ki page magê ngavê. Vikana ngaia ki page ngaua pinihi na kare meramera iana henia na ahuna. Ngaia ki asa vige meratongani o vainana hetakui, se vi na hitangita na karena getera.

⁵⁷

⁵⁸“Manga igamu ma kamu pe marupegi maninga na hagesuringa hato iana God, ga oga i rarona na buka ngekê, ma kamu pe hagahigasia na Araha God iami, i hagamamaguraga ngavê ma ki rongo raha na atana,

⁵⁹hoi, ngaia ki page hagaitangigamu, igamu ma na raraha iami, renigi na mera ma na ringa ga erataga ngavê ma ki asa vige page hato, suria i mareha rârâ ta na meresini vige ararigi.

⁶⁰Ngaia ki page nakagi na mera era ka tarahugamu nikâ manga i nago i Esipito. Ma ngekana ki asa iami, vigamu page komaga aporo.

⁶¹Ngaia ki page nakagi nikâ na ani mavê na mera ma na ringa getigi, ga pe oga i rarona na buka na ramata ma na hagesuringa iana God ikê. Igamu kamu page mutemute.

⁶²Henaka igamu kamu gahu mangagi na higu i vavearo, na kere hitangimi ma ka page tahi, suria igamu kamu pe tê viteana na Araha God iami.

⁶³Tagenana ma na Araha ki vagevage, hanana i haganahunigamu renia na ramana ma ki hagarakonigamu, ngaia ki page vagevage nikâ, hanana i haganahunigamu renia na eraha ma ki mutegamu. Ga page ragegamu tenia na agua, mu sugi parênia.

⁶⁴“Na Araha ki page tokorenigamu surira na apaneni me hato suria na maveta hagenani, ma i ngegana igamu kamu page hagarapera igê na ataro, ga tahera renigi na apinige ma na hê, na ataro igamu ma na êvarimi kamu pe bani vogasira me noga i nago.

⁶⁵I asa vigamu page tarahua na marapeha i tagua mavê. Igamu kamu page mamahuara rârâ ma. Na Araha ki page nakagi na anumanumaha ma na petakotogoha ma na bagahagêguringa ke angarigamu.

⁶⁶Igamu kamu page takotako hurigamu igê na ogaha iami. Igê na tangiani ma na bungiani igamu kamu page bubununuga ngavê ma kamu page ama ni magu nga vigamu meme.

⁶⁷Na bunaniami ka page tatata, suria mu magutenigi na ara ni marâ mu basigi. Igê na ara ni mavoraro igamu kamu page naasia vige bungibungi rêrê. Igê na ara ni bungiana igamu kamu page naasia vige tangitangi rêrê.

⁶⁸Na Araha ki page hagatorangenigamu aporo igê na haka tanga i Esipito, naka ma vi ngaia ki bani vi, vi i asa vigamu page aporo râ nikâ i ngekana. I ngekana igamu kamu page uhungia igê, vigamu hagavuringenigamu maremi tangara na merongami, hanana vigamu voravora re na kare vurivuri iata, ma ki asa na hitangita vige vurigamu.”