Read Kahua RAMATA 29 Bible Online

RAMATA 29 - Kahua bible

RAMATA 29

¹Igê ka na tamasinga na suruheri, na Araha ki bonasia o Moise ki naka henira na Isiraelita igê na apanena i Moaba. Na tamasinga ngegê ka nakagi banu igê na suruheri, na Araha ki bani naka henira igê na hungana i Sinai.

²O Moise ki hagahakura na Isiraelita hato ma ki vi tangara, ki vi: “Igamu maremi kamu bani bâsigi na tarani, na Araha ki bani katogi tangara na maneraha i Esipito, na mane ni hagaotonga iana ma na enoni hato igê na apanena iana.

³Igamu kamu bâsigi na hagaitangiha raha, na mena ma na tagaraha raha i katogi na Araha.

⁴Ma ki tariha me i ngekê nga ngaia ki mamênga vige hagagiraragamu maninga renigi na tarani, ga bani tarahugamu.

⁵Surigi na harisi tangahuru ge he na Araha ki bêngenigamu kamu aharêvoro igê na bagamasusu raha, ma na gahu ma na santele iami ka pe aharihari.

⁶Igamu ki marehasigamu na ngêra, se na vaini ma na marâ vigana, hanana vigamu ngaugi ma kamu tonomigi. Ma na Araha ki vategamu renigi, hanana i hagagiraragamu, vi ngaia ki na God iami.

⁷Ma na matena mu ata me ikê, ngairerua o Sigone na maneraha i Geseboni ma o Ogo na maneraha i Basani, karu râ me karu megiaheariha. Ma igia ka teharirerua,

⁸ka parênigi na apaneni iaterua, ma ka votogi tonganira na varo ninuni iaterua hehegitigi o Rubeni mo Gata ma tanga ta na apanena na varo ninuni iana o Manase.

⁹Mu marupegi maninga na tamasinga hato igê na suruheri ngekê, hanana mu tavoraha bâkoro igê na tagaraha hato iami.

¹⁰“I ngekê igamu kamu oga i maana na Araha God iami, igamu hato: na enoni raha iami, na mane ni hagaotonga iami, na mane iami,

¹¹na gete iami ma na karemi, ma na mahuara, ga oga i berarogami ga papapa ario ma ka titi ve tangagamu.

¹²I ngekê igamu kamu oga ikê, hanana mu aganaria na suruheri, na Araha God iami ki naka henigamu henigi na ramata igê,

¹³hanana na Araha ki aganarigamu, vi igamu ka na kariana, ma ngaia nga ka na God iami, manga i bani surua tangagamu, igamu ma na êvarimi o Abarahamo, o Isako ma o Jakobo.

¹⁴Na Araha ki naka na suruheri ngekê henigi na ramata mareha vi tangagmu ma igamu.

¹⁵Ngaia ki naka henigia hato, ga oga i maana i ngekê, ma henira nikâ na raraha iaka, ga mamêngara vige voravora me.

¹⁶“Igamu kamu bani girara, vi manga i he na ogaha iami i Esipito, ma ki manga i he na raoha iami, matena mu aharêvoro igê na apaneni iata na apaneni me getera.

¹⁷Igamu kamu bani bâsigi na nunuta na ataro, ngaira ka tagarahigi renigi na apinige, na hê, na siliva ma na golo, na nunuta ngegana God ki ngaritenigi ngavê.

¹⁸Siana hagetage, vi na mane, se vi na gete, se vi na ahemata, se vi na hagosi ninuni, mu oga ikê i ngekê, vige murisigea na Araha God iami, hanana vige vogasira na ataro iata na apaneni me getera. Na tarana ngekana ki manga na tavona na marâ, i raharaha, ki mahe ma na enoni ka meme renia.

¹⁹Siana hagetage na hitangimi mu oga ikê i ngekê ma ki rongogi na ramata henigi na hagaitangiha ma ke kato, ke vivi, ‘E, i asa ta na marâ vige tarahuê, naka ma gê togeaga kê arâ suria na obaniha iaku mareku.’ Na tarana ngekana ki page mutegamu hato, igamu na ani mu koro ma na ani mu erataga.

²⁰Na Araha ki asa vige takia na enoni i katokato vikana. Na mangariaganiha iana na Araha ki page nahuia manga na anguruna na gi, ma na hagaitangiha hato i rarona na buka ikê ka page tarahua, mataro me na Araha ki hagamesia ngavê.

²¹Na Araha ki page naka manga na hagararinga tangara na varo ninuni hato iana o Isiraele, ma ki page hagaitangia surigi na hagaitangiha hato igê na suruheri i rarona na buka na hagesuringa iana na Araha.

²²“Na enoni i na matena i muri me, naka ma ngaira ka na raraha iami se na mahuara tenigi na agua hagatê, ngaira ka page bâsigi na hagaitangiha ma na mamasiaganiha, na Araha ki bani nakagi ki tarahua na apanena iami.

²³Na mako ki page marasiga ma ki page karekare ni sivi hagenani. Ngaia ki page bagora ma ki page avagavaga. Na apanena iami ki page mangagi na hinua i Sotome, i Gomora, i Atema me Seboimi, na Araha ki ruhuruhugi, matena i mangariaga ngavê.

²⁴Vikana na enoni hato i maveta ka page hagate, ka vivi, ‘Tanu hega na Araha ki katoa vikana na apanena iata? Tanu hega ngaia ki mangariaga ngavê?’

²⁵Ma na aramiha ki manga ikê: ‘Suria na kariana ka aharêngia na suruheri, ga naka henia na Araha God iata na êvarita, matena i bêngenira hura tenia i Esipito.

²⁶Ngaira ka hagarapera na ataro, ga pe bani vogasira me i nago, na ataro na Araha ki bani manimani, vi siana ka vogasira.

²⁷Tahema na Araha ki mangariaga tangara na kariana ma ki hagaitangia na apanena iata renigi na hagaitangiha hato ga oga i rarona na buka ikê.

²⁸Na Araha ki mangariaga ngavê tangara. Tahema igê na mangariaganiha raha iana ngaia ki ragera hura tenia na apanena iata ma ki kasira igê na agua getea iata na mahuara, ma ngaira ka gâga mênga i ngekana i ngekê.’

²⁹“Tani na tarani na Araha God iaka ki ama ni pinihigi nga tenigia. Henaka ma ngaia ki hagagiraragia renigi na ramata iana. Ma ki arari vikana. I tuguhigia, igia ma na raraha iaka, viga marupegi tare ki bê ki arâ.”