Read Kahua RAMATA 3 Bible Online

RAMATA 3 - Kahua bible

RAMATA 3

¹“Ma hemuri igia ka râ nga tanga na apanena i Basani. O Ogo na maneraha ni Basani henira na mane ni me hato iana ka râ me ka megiaheariha hagarangia na hinua i Eterei.

²Na Araha ki vi tangê, ki vi, ‘Siana ko magutenira. Inê be tagarenira ngaia ma na mane ni me iana ma na apanena hagenani iana tangago. Gu katoa tanga na tarana, go bani katoa noga tanga o Sigone na maneraha iata na Amorita, i marungia i Geseboni.’

³“Vikê na Araha ki tagarenira o Ogo ma na kariana tangagia, ma igia ka mutera hato.

⁴Nikâ igia ka henahuraugi na hinua hato iana, mareha rârâ tani vige hita râ. Ngaigi hato na tangahuri hinua ge ono, i vi na apanena hagenani i Aragobo, o Ogo na maneraha i Basani ki marungia.

⁵Na para raha ka rihuigi na hinua hato ngegana. Na maani para ka tonga renigi na raburini. Ma rako na kere hinua ka oga rara so ma.

⁶Igia ka ruhuruhugi na hinua hato ma ka mutera na enoni hato igê, na mane, na gete ma na kare, manga ga bani katogi na hinua iana o Sigone na maneraha i Geseboni.

⁷Igia ka henahuraura na togoha ma ka ruhuruhugi na hinua.

⁸“Vikana igia ka parênia tenirerua na maneraha gi rua na Amorita na mako kerekê i ve i Jotano, haganega igê na ve i Aranone tanga na hungana i Heremone.

⁹(Na ai ni Sitone ka hêtana na hungana i Heremone vi Sirione, ma na Amorita ka hêtana vi Senire.)

¹⁰Igia ka henahuraua na apanena hagenani iana o Ogo na maneraha i Basani: na hinua igê na bena, igê na hungani, na apaneni i Gileata ma i Basani ki tariha akê i hinua i Saleka me Eterei.”

¹¹(O Ogo na maneraha ki na hagahatungita na Repaimi. Na bea iana ka tagarahia renia na aeani. Na borahusigana na bea ki vora na tangahani gi rua ma ke unumia. Na aberaberagana ki vora na tangahana gi tage. Ngaia ki gâga mênga i Raba, na hinua raha i Amone.)

¹²“Matena igia ka bani parênia na apanena bêkê na ve i Jotano, inê kê haganahunirerua na varo ninuni iaterua hegitigi o Rubeni mo Gata renia na apanena i haganega i hinua i Aroere i na akerena na ve i Aranone ki râ ki aragupu i Gileata huhunganiga henigi na hinua igê.

¹³Inê kê haganahunia na apapana na varo ninuni iana o Manase renia i Gileata na agua i hita râ ma renia i Basani hagenani, i marungia i nago o Ogo. Ngaia ki na apanena hagenani i Aragobo.” Na enoni ka hêtana nikâ i Basani vi na apanena iata na Repaimi.

¹⁴O Jaire tenia na varo ninuni iana o Manase ki têa hagenani na apanena i Aragobo, i vi Basani, ki râ ki tariha igê na taritarihaterua i Gesure ma i Maaka. Ngaia ki hêtani na hinua renia marena ma na enoni ka visigi mênga vi na hinua iana o Jaire.

¹⁵“Inê kê haganahunirerua na varo ninuni iana o Makire tenia na varo ninuni iana o Manase renia i Gileata.

¹⁶Inê kê haganahunirerua na varo ninuni iaterua hegitigi o Rubeni ma o Gata renia na apanena, i haganega i Gileata ki râ ki tariha i ve i Aranone. Na gupuna na ve i Aranone ka na taritarihana ma na ve i Jaboko ka na taritarihana bêrâ. Ngaia nikâ ki na tarihana hetanga henia i Amone.

¹⁷Na taritarihana bêso ka na ve i Jotano, i haganega igê na rano i Galilea, ki rârâ ma ki tariha igê na Asime, mataro me igê na hungana i Pisiga i na apanena bêkê na Asime.

¹⁸“I na matena ngekana inê o Moise, kê ramatenira na varo ninuni iaterua hegitigi o Rubeni, ma o Gata ma na apaneni me na varo ninuni iana o Manase, kê vi, ‘Na Araha God iaka ki haganahunigamu renigi na apaneni kê me ikê i Jotano, hanana vigamu ogasigi. Hoi, mu bonasira na mane ni me iami ke tangaru. Mu hagatorangenira tarê igê na ve i Jotano, ke nanago tarata na goami na varo ninuni getera iana o Isiraele, hanana ga tamanira ka henahuraugi na apaneni kereso i Jotano ma ka ogasigi.

¹⁹Inê kê bani girara, vi igamu ka aharêsigamu na togoha. Hoi, na gete iami, na karemi ma na togoha iami ngaira ma kaniga oga so nga i hinua, gê bani tonganigamu renigi.

²⁰Mu tamanira na Isiraelita, mataro me ka ogasigi na apaneni so i Jotano, na Araha ki page haganahunira renigi, ma mataro me na Araha ki haganahunira renia na marapeha, manga i bani katogamu ikê. I murina ngekana ki koro ma mu aporo me ikê igê na apaneni, gê bani tonganigamu renigi.’

²¹“Nikâ inê kê ramatenia o Josua, kê vi, ‘Igo ko bani bâsigi na tarani hato na Araha God iamu ki bani katorerua na maneraha gi rua o Sigone mo Ogo renigi. Ngaia ki page katoa nikâ na tarana vikana tangara na maneraha hato, go page taharira, hanana go parênigi na apaneni iata.

²²Siana ko magutenira, suria na Araha God iamu ki page meraheariha pusigo.’

²³“I na matena ngekana inê kê nunginungi, kê vi:

²⁴‘Araha God, inê kê bani girara, vi igo ko haganega ko hagabâsiê na kariamu renigi na bâbâhamu ma na raramohamu raha. I mareha rârâ na ataro i vavearo se i ano ge girara vige katogi na mena, go bani katogi igo.

²⁵Araha, gu nakê be tarêhia na ve i Jotano, hanana ve bâsigi na agua na mako koro i na apanena tarê, na hungani bâkoro ma na hungana i Libanone.’

²⁶“Ma suria igamu na enoni, tahema na Araha ki mangariaga tangê ma ki pe aganariê, ma ki vi hete, ‘I uhu noga! Siana ko vi vikana nikâ!

²⁷Gu tagere igê na botena na hungana i Pisiga ma ku sira râ tanga i Libanone ma tanga i Negeve, tanga i kerekê ma tanga i kereso. Gu boretenigi maniga na marâ go bâsigi, suria igo ki asa, vigu tarêhia i Jotano.

²⁸Gu kasia o Josua ke urusigo. Gu hagaramonia ma ku kanukanua, suria ngaia ki page bêngenira tarê na enoni, hanana i haganahunira renia na agua, go bâsia râ.’

²⁹Vikê igia ka oga ma igê na maruguna i avorana na hinua i Betepeore.