Read Kahua RAMATA 30 Bible Online

RAMATA 30 - Kahua bible

RAMATA 30

¹“Hoi, inê kê bani naka vê tangagamu, kamu atea na ani ta na tarana kamu obania: na koroha se na hagaitangiha. Matena ga tarahugamu hato na bagabevoani hato ngegana ma igamu kamu gâga i pasita na apaneni me na Araha God iami ki bani tokorenigamu surira, igamu kamu page takusia aporo na ateha, gê bani naka vê tangagamu.

²Manga igamu ma na raraha iami ma kamu page aharia na Araha ma i mêrihami hagenani kamu page marupegi na ramata iana, gê vategamu renigi i ngekê,

³hoi, na Araha God iami ki page takuigamu aporo. Ngaia ki page toregamu hura aporo tenira na apaneni me, i bani tokorenigamu surira. Ngaia ki page katogamu kamu gâga aporo nikâ igê na ramana.

⁴Henaka igamu kamu totoko surigi na agua hagatê ngavê i maveta, na Araha God iami ki page hagahakugamu me aporo ma ki page toregamu i pasimi,

⁵hanana igamu kamu page nahunia aporo na agua, ga oga i nago igê na êvarimi. Ngaia ki page haganahunigamu ngavê renia na ramana ma ki page hagarakonigamu nga teharira na êvarimi i nago.

⁶Ngaia ki page katogamu, igamu ma na raraha iami, kamu voravora re na kariana monari. Mu têtê viteana maninga, hanana igamu kamu page takuia i mêrihami haganani, ma kamu page gâga hagahu igê na agua ngekana.

⁷Ngaia ki page hagatarêngenigi na hagaitangiha hato ngegana tenigamu tangara na merongami, ga kitenigamu ma ka hagamamasiagagamu.

⁸Igamu kamu page têtê viteana aporo ma kamu page marupegi na ramata hato iana, gê vategamu renigi i ngekê.

⁹Na Araha ki page katogamu, kamu tavoraha maninga ngavê igê na tagaraha hato iami. Ka page aharêsigamu na karemi ma na togoha iami, ma na mu iami ka page ganora ngavê. Ngaia ki paga vagevage, suria i haganahunigamu renia na ramana, tagenana ma manga i vagevage i nago, matena i haganahunira na êvarimi renia na ramana.

¹⁰Manga mu obania vikana, mu têtê viteana ma kamu marupegi na ramata hato iana i rarona na buka na hagesuringa iana ikê. Mu aharia nga i mêrihami hagenani.

¹¹“Na ramata, gê vategamu renia i ngekê, ki mareha vige asa, se vige bara ngavê tangagamu.

¹²Ngaia ki pe gâga hagatê kê i vavearo, hanana gamu arisia. Siana kamu hagate, kamu vivi, ‘E, ti ki girara i akê, hanana i torea vato me tangagia, ka rongoa ma ka marupea?’

¹³Ngaia ki pe oga i na apanena râ na asi. Siana kamu hagate, kamu vivi, ‘E, ti ki girara i arâ tanga na apanena râ na asi, hanana i torea me tangagia, ka rongoa ma ka marupea?’

¹⁴Mareha! Ngaia ki gâga ma ikê henigamu. Igamu bani girara re harami. Mu marupea nga!

¹⁵“Hoi, i ngekê inê kê nakarerua na tarana gi rua tangagamu: na koroha ma na eraha, se na mauriha ma na mera. Hoi, mu atea na hitangiterua.

¹⁶Manga mu marupegi na ramata iana na Araha God iami, gê vategamu renigi i ngekê, manga mu takuia na Araha God iami ma kamu têtê viteana, ma kamu ototo surigi na ramata hato iana, hoi, vikana igamu kamu page gâga igê na ramana, ma kamu page gahugahu ngavê. Na Araha God iami ki page korokoro tangagamu igê na agua, mu sugi parênia.

¹⁷Ma ki manga mu guguruga tanga ma kamu usi vigamu karinga, ma kamu nakara na enoni getera ka toregamu kamu vogasira na ataro iata,

¹⁸hoi, igamu kamu page mutemute. Naka be vi tangagamu i ngekê nga. I manga ngekana ki asa iami hagetage, vigamu oga arihu igê na agua i na apanena tarê i Jotano, mu sugi parênia.

¹⁹Hoita, mu atea na hitangiterua na mauriha se na mera, na korohana God se na hagaitangiha. Inê kê hagatorarerua na vavearo ma na ano, hanana garu hagatanga monari renia na ateha iami. Mu atea nga na mauriha!

²⁰Mu takuia na Araha God iami. Mu têtê viteana ma kamu tototo suria. Vikana igamu ma na raraha iami kamu page gâga hagahu igê na agua, i bani surua, vi haganahunira na êvarimi o Abarahamo, o Isako mo Jakobo renia.”