Read Kahua RAMATA 31 Bible Online

RAMATA 31 - Kahua bible

RAMATA 31

¹O Moise ki ama ni tamasi nga tangara na Isiraelita hato,

²ki vi: “Inê ki tonga noga na 120 na harisi iaku. Inê ki bara tangê vi ve bêngenigamu nikâ. Ma ta na marâ nikâ: Na Araha ki bani vi tangê, vi inê ki asa be tarêhia na ve i Jotano.

³Ngaia marena na Araha God iami ki page hagenago tarami ma ki page mutera na apaneni me, ga oga i ngekana, hanana igamu kamu girara mu parênia na apanena iata. O Josua ki page bêngenigamu, manga i bani visia na Araha.

⁴Na Araha ki page mutera na apaneni me ngegana, manga i bani teharirerua noga o Sigone mo Ogo na maneraha iata na Amorita, ma ki ruhuruhua na apanena iaterua.

⁵Na Araha ki page katogamu kamu teharira ma kamu katora nga, manga hanana gê bani visia tangagamu.

⁶Mu togeaga ma kamu ramoramo. Siana kamu magutenira. Ngaia marena na Araha God iami ki page ngahisigamu. Ngaia ki asa vige nakagamu vê maremi, se vige panigamu.”

⁷Hemuri o Moise ki unia me o Josua ma ki vi tanga i maata na Isiraelita hato, ki vi: “Gu togeaga nga ma ko ramoramo. Igonga ka na ani go page bêngenira na enoni igê, hanana ga parênia na agua, na Araha ki bani surua tangara na êvarita.

⁸Na Araha marena ki page hagaotogo ma ki page ngahisigo. Ngaia ki asa vige nakago maremu, se vige panigo. Vikê, siana ko bagahagêguri, se vigu magu.”

⁹Hoita, o Moise ki segegi so na ramata iana God igê na buka ma ki tagarenia na buka ngekê tangara na mane ni hagarahenga, ga bâsuria na bokesi na suruheri iana na Araha, ma tangara na mane ni hagaotonga iata na Isiraelita.

¹⁰Ngaia ki bonasira, ki vi: “Hoi, igê na ara ni hagahatongini na pita na harisi, na harisi mu nahunahu igê na ani mavê na hagaba, ki tuguhigamu, mu tomania raha na buka na ramata ngekê igê na tangiana raha ni ruhu.

¹¹Mu tomania tangara na Isiraelita, matena ga hakuhaku me tanga ga rahesia na Araha God iami igê na agua gi tagena togo ni vogasiha.

¹²Mu hagahakura ngaira hato na mane, na gete, na kare ma na mahuara ga oga surigi na hinua iami, hanana ngaira hato ka rongoa ma ka hagahigasia tare na Araha God iami ma ka amaka surigi maninga na hagesuringa iana.

¹³Vikana na raraha iami, ga pe bani rongogi me i nago na ramata iana na Araha God iami, ngaira ka page rongogi. Vikana ngaira ka page girara ge têtê viteana igê na ogaha iata igê na agua i na apanena tarê i Jotano, mu sugi parênia.”

¹⁴Hemuri na Araha ki vi tanga o Moise, ki vi: “Igo ko sugi meme. Gu unia me o Josua ku merâ me igê na ruma na gahu iaku, hanana gê vatea renia na hagesuringa iaku.” O Moise mo Josua karu râ tanga na ruma na gahu iana na Araha.

¹⁵Na Araha ki vora me tangarerua i ngekana igê na u na vaha, i ura i maani ruma na gahu iana.

¹⁶Na Araha ki vi tanga o Moise, ki vi: “Igo ko sugi meme, ma i murina go meme na enoni ka page haritoheê ma ka page aharêngia na suruheri iaku henira. Ngaira ka page murisigeê ma ka page hagarapera na ataro iata na enoni igê na agua, ga sugi bêbanu igê.

¹⁷Vikana inê kê page mangariaga tangara. Inê kê page kasikasi renira, ma ngaira ka page mutemute. Rako na bagabevoani ga erataga ngavê ka page tarahura ma ngaira ka page tahetara, vi na bagabevoani ngegana ka tarahura, suria inênga na God iata kê pe ngahisira.

¹⁸Vikê inê kê page usi vi ve tamanira, suria ngaira ka bagaparongata ma ka vogasira na ataro.

¹⁹“Hoi, gu segea so na ki ikê. Gu hagesurira na Isiraelita renia, hanana ga girara re harata. Na ki ngekê ki page ranganira.

²⁰Inê kê page bêngenira banu igê na agua na mako koro ni ngauha ma ni togoha, manga gê bani surua tangara na êvarita. I ngekana na ngêra ka page aharêsira ngavê igê, ma ki page hagagara koro na ogaha iata. Ma ngaira ka page murisigeê, ma ka page vogasira ma hete na ataro. Ngaira ka page kikitenia ma ka page aharêngia na suruheri iaku.

²¹Rako na bagabevoani ga erataga ngavê ka page tarahura. Henaka, ma na ki ikê ki page akê me nga ma ki page ranganira. Bâ, inê kê mamênga vi ve merabanu igê na agua, gê bani surua vigê haganahunira renia, ma inê kê bani giraragi na takotako iata.”

²²Igê nga na tangiana ngekana o Moise ki segea so na ki ma ki hagesurira na Isiraelita renia.

²³Hemuri na Araha ki tamasi tanga o Josua o karena o Nune, ki vi: “Gu ramoramo nga ma ko togeaga. Igo ko page bêngenira banu na Isiraelita igê na agua, gê bani surua tangara. Inê kê page ngahisigo.”

²⁴Hoi, o Moise ki segegi so na ramata iana God igê na buka, mareha vige naka hura ta na marâ.

²⁵Matena i sege hato, ngaia ki vi tangara na mane ni hagarahenga, ga bâsuria na bokesi na suruheri iana na Araha, ki vi:

²⁶“Ia, mu torea na buka na ramata iana God ma kamu naka ngahisia na bokesi na suruheri iana na Araha God iami, hanana i gâga i ngekana tanga i ranganira na kariana.

²⁷Inê kê bani girara, vi ngaira ka togeaga ngavê ka guguruga. Ngaira ka bani haritohea na Araha suria na ogaha iaku hagenani. Ma i murina gê meme inê, ngaira ka page erataga ngavê teharia i nago.

²⁸Mu hagahakura me na bêni na varo ninuni hato ma na mane ni hagaotanga iata ikê i maaku, hanana gê visigi tangara na marâ hato ngegê. Inê kê page hagatorarerua na vavearo ma na ano, hanana garu ranganira.

²⁹Inê kê bani girara, vi i murina gê meme inê na enoni ka page bagaparongata ma ka page kikitenigi na hagesuringa iaku tangara. Ma i hemuri me na bagabevoani ka page tarahura, suria ngaira ka page hagamangaria na Araha renigi na bagatauhata.”

³⁰O Moise ki kiria na ki hagenani, matena na Isiraelita hato ka karinga suria. Na ki ki manga ikê: