Read Kahua RAMATA 32 Bible Online

RAMATA 32 - Kahua bible

RAMATA 32

¹“Maveta ma vavearo, muru rongo! Muru karinga maninga na tamasinga iaku.

²Muru aganarigi na tamasinga iaku manga na rangi koro tangagi na go ma manga na kârupu tanga mako.

³Inê be hagarahasia na Araha God. Na kariana ke tarohenia God raramohaga hunia.

⁴Na Araha ki na bêata nganganihaga iami. Na tauhana ka koro ma ka oto igê na ara ni tarani hato. Ngaia ki hagamonarigi tare na tamasinga iana. Ngaia ki katogi ma na tarani ga koro ma ka oto.

⁵Ma igamu, igamu kamu pe toto suria. I pe ararigamu, vi igamu ka na kariana. Igamu ka na enoni mu bagatauhami ma kamu hagahagaparu tare ma tarema.

⁶Nga hanana mu katoa vari na Araha ngekana? Igamu kamu beka ngavê ma kamu bagatatako. I hega, na Araha ki pe vora re na vaemani vari? I hega, ngaia ki pe hagavoragamu vari? I hega, ngaia ki pe hagarakonigamu vari ma ki pe marupegamu rârâ vari?

⁷Mu takusia na matena i nago kere vê noga. Mu hagatera o vaemami ke sihonga tangagamu renigi na tarani ga bani vora me i nago. Mu hagatera na bani inuni ke hagarongogamu renigi.

⁸Na Araha God raramohaga hunia ki haganahunira na ara ni apaneni me renigi na atohata mareta. Ngaia ki nakagi na agua ni ogaha tangara ma ki atera na angero tonganira ka anumasira.

⁹Ngaia ki atera na varo ninuni iana o Jakobo tanga marena ka vora na anina, na kariana marena.

¹⁰Ngaia ki tarahura ga ataka mavê re raoha igê na bagamasusu raha i hihiruga, ki rogaroga tare igê ma ki hagagara era. Ngaia ki anumasira ma ki marupera bâkoro tagenana manga i anumasia so marena.

¹¹Na Araha ki bâsurira, hanana siana ka votavota manga na ahetaronga i hagesurira na karena ka gagaha. Ngaia ki aheahe ma ki apera renigi na gagahana.

¹²Na Araha ngaia getea ma ki bêngenira na kariana mareha vi na ataro.

¹³Ngaia ki haganahunira renia na agua huhunganiga. Ngaira ka ngaugi na ngêra mora ni mu. Ngaira ka tarahugi na pirui mamaki igê na hê na agua ga asita Na apinige ni olive iata ka hungu igê na mako bêratega

¹⁴Na puruka ma na goti iata ka vunuvunu ngavê tare na susuta. Na sipi, na goti ma na puruka iata ka binibinikaga. Na ngêra iata ka na ngêra mora ma na vaini iata ka tono koro teha ngavê.

¹⁵“Na kariana na Araha ka ruruguha, ka binibinikaga ma ki rarapuhaga na obata. Ngaira ka haganega ka haritohea na Araha. Ngaira ka murisigea God i hagavorara. Ngaira ka kitenia na hagamauri raramohaga iata.

¹⁶Ngaira ka hagamangaria na Araha, suria ga hagarapera na ataro. Na bagatauhata ka hagaera obana.

¹⁷Ngaira ka vogasira na ataro ga pe monari, na ataro na êvarita ka pe bani girarara me i nago, na ataro na Isiraelita ka pe bani hagarapera me.

¹⁸Ngaira ka bonotenia na God iata, na hagamauri raramohaga hunia iata, na ani i vatera renia na mauriha.

¹⁹“Matena na Araha ki bâsira vikana, ngaia ki mangariaga ngavê ma ki rumakaka renira na karena.

²⁰Ngaia ki vi: ‘Inê kê hato tenira. Inê kê page bâbâ, ta na marâ ka page tarahura. Ngaira ka erataga ma ka hagahagaparu tare.

²¹Ngaira ka hagamangariê renira na ataro iata. Ngaira ka hagaera obaku renira na ataro, ga pe monari ma ka vora re na marâ purua ma. Vikana inê be hagamangarira renira na apaneni me. Inê be hagaera obata renira na apaneni me bekabekaga.

²²Na mangariaganiha iaku ki page manga na anguruna na gi ma ki page hagamakakagi na ara ni agua i maveta. Ngaia ki page hagamakaka na agua iata na enoni ga bani me me ki page ngaugi na hunani na hungani.

²³Inê be katogi na bagabevoani ke tarahura hesurisuri. Inê be hanasira renigi na mage hato iaku.

²⁴Ngaira ka page mesi magêha ma na matoroha. Ngaira ka page meme renigi na mera era. Inê be nakara na marâ vasiga ke taharira ma na ma gara hunu ke garera.

²⁵Na hearihatana ki page raramohaga i hinua iata. Na enoni ka page bubununuga i ruma iata. Na mane ma na gete na gapu haoru ka page meme ma na kare gari ma na bani inuni nogata.

²⁶Inê ki araria ma be mutera hato ngavê, hanana ga hitenira ngavê tare.

²⁷Ma ki mareha, suria i era ma na merongata ki akê na ageageta, vi ngaira ka teharira na kariaku. Ma hete inê mareku kanigê kato vikana.’

²⁸“Na Isiraelita ka na enoni ga pe takotako, na apaneni me i pe mataha na bêta.

²⁹Ngaira ka pe bâsia manga i he kaniga pe teha. I asa iata vige aitangisigi na tarani ga tarahura.

³⁰Tanu hega na vere tage ki teharira na rehagaro? Tanu hega na vererua karu teharira na rehagaro tangahuru? Na Araha God iata ki rumakaka renira. Na God raramohaga hunia iata ki kasi renira.

³¹Na merongata ka girara, vi na ataro iata ka pe ramo, ka pe raramohaga manga na God iata na Isiraelita.

³²Na merongata ka bagaparongata mangara na ai i Sotome me Gomora. Ngaira ka mangagi na varo i mahe na guani ma na enoni ka meme renigi.

³³Ngaira ka manga na vaini ga tagarahia renigi na tavoni na rivona na ma gara hunu.

³⁴Na Araha ki asa vige bonotenigi na tarani na merongata ka katogi. Ngaia ki naasia ma na matena i arari vi hagaitangira igê.

³⁵Na Araha ki page naka na siva tangara, hanana i hagaitangira ngavê. I page arâ me na matena ga page votavota igê. I hagarangi me noga na matena ga mutemute igê.

³⁶“Na Araha ki page hagatahira na kariana, matena i bâsira ga mameaga igê. Ngaia ki page takuira na ani ga toto suria, matena i bâsia i barabara tangara.

³⁷I ngekana na Araha ki page hagatera na kariana, ki vivi, ‘I he ngaira nga na ataro raramohaga mu hagêguritogo renira?

³⁸I hega, mu pe hagangêra vari renigi na êbeni na ganiani, mu susu tangara renigi? I hega, mu pe hagatonomira vari renigi na vaini mu vogasira renigi? Hoi, i hega, kaniga pe tamanigamu? I hega, kaniga pe hagatahigamu?

³⁹“ ‘Inê gi tage togo ma kanigê God. Na ataro ka pe monari. Inê kê marungirerua na mera ma na mauriha. Inê kê hagamamari ma kê hagamavo. Na ara ni enoni hato ka oga i ruguhaku.

⁴⁰Inê kê tohe reniê mareku, inê God gê mauri hagahu. Inê kê tagare rima kê tohe,

⁴¹vi inê kê page ratea na tatapa borahu iaku ke togatoga. Inê kê page surira na merongaku igê na otoha. Inê kê page naka na siva tangara ma kê page hagaitangira na ani ga kiteniê.

⁴²Na mage iaku ka page gagapuga renigi na gaputa. Na tatapa borahu iaku ki page hagamesira na merongaku hato. I asa ta na hitangita vige tahi. Na ani gê hagamamarira ma kê henahuraura ka page meme nogata.’

⁴³Apaneni me hato, mu hagarahasira na kariana na Araha. Ngaia ki hagaitangira na ani hato, ga hagamesira na kariana. Ngaia ki naka na siva tangara na merongana ma ki bonotenigi na tasi iata na kariana.”

⁴⁴O Moise mo Josua o karena o Nune karu kiria na ki ngekana, hanana na Isiraelita ka rongoa.

⁴⁵Matena o Moise ki hagarongora hato na enoni renigi na hagesuringa iana God,

⁴⁶ngaia ki vi: “Mu marupegi nga na ramata hato ngegana, gê vategamu renigi i ngekê. Mu hagatarêngenigi tangara na karemi, hanana ngaira ka marupegi maninga na hagesuringa hato iana God.

⁴⁷Na hagesuringa ngegana ki mareha vi na guruni ma na tamasinga. Ngaigi ka na mêriha iami hete. Mu tototo surigi, hanana mu gâga hagahu igê na agua i na apanena tarê i Jotano, mu sugi parênia.”

⁴⁸Igê nga na tangiana ngekana na Araha ki vi tanga o Moise, ki vi:

⁴⁹“Go arâ nga igê na hungani i Abarimi i na apanena i Moaba, i avorana na hinua i Jeriko. Go tagere igê na hungana i Nebo ma ko bâsia râ Kanani, gê sugi haganahunira na Isiraelita renia.

⁵⁰Igo ko page meme igê na hungana ngekana, manga o veogamu o Aroni, i me igê na hungana i Hore,

⁵¹suria igamurua kamuru pe toto suriê i maata na Isiraelita. Matena igê na ve i Meriba hagarangia na hinua i Katesi igê na bagamasusu raha i Sine igamurua kamuru pe hagahigasiê i maata na enoni.

⁵²Igê na hungana i Nebo igo ko page bâsia râ hagatê na agua, gê sugi haganahunira na Isiraelita renia, ma igo ki bara tangago vigu banu igê.”