Read Kahua RAMATA 33 Bible Online

RAMATA 33 - Kahua bible

RAMATA 33

¹O Moise na kariana monari God, ki nunginungi tangara na Isiraelita i nago tarana i me. O Moise ki vi:

²“Na Araha ki râ me tenia na hungana i Sinai. Ngaia ki akê manga na arito, i raboa kerekê i Etome. Ngaia ki mavesira na kariana i hungana i Parane. Rako na rehagaro na angero ka takua. Na marangea ka gaha tenia na rimana na otona.

³“Na Araha ki takuira na kariana ma ki anumasira na anina. Vikê igia ka susure ma ka bêrusu i maana ma ka têtê viteana maninga.

⁴Igia ka marupegi na ramata hato o Moise ki vategia renigi. Igia ka makuanigi bâraha.

⁵Matena na Isiraelita ma na bêni na varo ninuni iata ka bani hakuhaku me, na Araha ki nakara i ruguhana.”

⁶O Moise ki nunginungi vikê tanga na varo ninuni iana o Rubeni: “Na varo ninuni iana o Rubeni ke gâga tare ki bê ki arâ, henaka ga pe rako.”

⁷O Moise ki nunginungi vikê tanga na varo ninuni iana o Juta: “Araha, gu aganarigi na avarasiha iaku. Gu hagahakura aporo henira na varo ninuni getera. Araha, gu rohe pusira ma ku urapusira na merongata.”

⁸O Moise ki nunginungi vikê tanga na varo ninuni iana o Levi: “Araha, renigi na hê ni girarasiha gu hagagirarara na mane ni hagarahenga ga toto surigo maninga henigi na katoha iamu. Igo ko uhungira i Masa ma igê na ve i Meriba.

⁹Ngaira ka tototo surigo teharira na enata, na goata ma na kareta. Ngaira ka tê viteamu ma ka toto suria na suruheri iamu.

¹⁰Ngaira ka page hagesurira na kariamu, hanana ga marupegi na ramata iamu. Ngaira ka page susu igê na bea ni vogasiha iamu.

¹¹Araha, gu hagaramonira, hanana ga hagakoro obamu igê na ogaha iata. Gu menamenarira na merongata hato hanana i hatohato iata.”

¹²O Moise ki nunginungi vikê tanga na varo ninuni iana o Benamino: “Na Araha ki takuira ngavê na varo ninuni iana o Benamino. Ngaia ki anumasira. Ngaia ki marupera na tangiani ma na bungiani ma ki ngahisira tare.”

¹³O Moise ki nunginungi vikê tanga na varo ninuni iana o Josepo: “Na Araha ke hagarangisigi na mako iata Na ve i rarona na ano ke hagamagarohagi.

¹⁴Na arito ke sinarigi na apinige ni ngauha ke taka ma ke hungu bâkoro igê na ara ni mateni tangagi.

¹⁵Na apinige ni ngauha ke manasigi na hungani hagahu iata.

¹⁶Na ngêra mora hato ke manasia na apanena iata. Ke aharêsira na korohana na Araha, i tamasi igê na vavatana na gi igê na kere apinige i suru. Na marâ koro hato ngegana ke tarahua na varo ninuni iana o Josepo, suria ngaia ki raha tangara na goana.

¹⁷O Josepo ki ramo manga na puruka mane, mangagi na honi na puruka vasiga. Na honi iana ngaira ka na rehagaro ma na rehagaro na mane ni me iana o Manase ma na rehagaro tangahuru na mane ni me iana o Eparaimi. Renigi na honi ngaia ki sipangira na apaneni me ma ki bugurenira tanga na apanena hura na maveta.”

¹⁸O Moise ki nunginungi vikê tangarerua na varo ninuni iaterua hegitigi o Sebuluni mo Isakare: “Na varo ninuni iaterua hegitigi o Sebuluni mo Isakare ke tavoraha bâkoro igê na tagaraha iata i asi ma nikâ matena ga gâga i hinua iata.

¹⁹Ngaira ka unira me na mahuara, hanana ga vogasia God igê na hungana renigi na vogasiha ga hagakoro obana. Ngaira ka vagevagesigi na ruruguha, ga râ me tenigi na asi, na one, ma na tarasini.”

²⁰O Moise ki nunginungi vikê tanga na varo ninuni iana o Gati: “Ge hagarahasia God, i haganahunira renia na apanena i raha. O Gati ki manga na laione, i hâa na rimana na merongana se na ratana bêna.

²¹Ngaira ka atea na apanena na mako koro tangara mareta. Ga vatera renia na apanena i araria na maneraha. Ngaira ka marupegi na ramata ma na hagesuringa iana na Araha, matena na enoni raha iata na Isiraelita ka oga haku.”

²²O Moise ki nunginungi vikê tanga na varo ninuni iana o Tane: “O Tane ki manga na bêhâgana na laione. Ngaia ki reke tenia i Basani.”

²³O Moise ki nunginungi vikê tanga na varo ninuni iana o Napatali: “Na korohana na Araha ke aharêsira ngavê na raraha iana o Napatali. Na apanena iata ki haganega tenia na rano i Galilea tariha i Negeve.”

²⁴O Moise ki nunginungi vikê tanga na varo ninuni iana o Asere: “Na Araha ke koro ngavê tanga na varo ninuni iana o Asere teharira na varo ninuni getera. Na raraha iata na goana ke tê surira. Na apinige ni olive ke manasia na apanena iata.

²⁵Na hinua iata ke nganganihaga renigi na maani para na aiani. Ngaira ke oga suri parongata tare.”

²⁶“Isiraelita, i mareha rârâ na ataro, vige maratorana na God iami. Ngaia ki bâ hahanetaga ngavê. Ngaia ki oga igê na vaha i vavearo. Ngaia ki tagirigi me hanana i tamanigamu.

²⁷God ki bani rohe pusigamu me. Ngaia ki tamanigamu tare renia na raramohana, i asa vige page hato. Ngaia ki tarigenira hura na merongami tarami. Ngaia ki bonasigamu, kamu mutera hato.

²⁸Igamu na raraha iana o Jakobo, igamu kamu page oga igê na ramana. Igamu kamu page oga suri parongami igê na apanena iami. Na ngêra ma na vaini ka aharêsigamu. Na kârupu ke hagavokarigi na mako iami.

²⁹E, Isiraelita, igamu kamu babarisi ngavê. I mareha tani na apaneni me vige maratorami, suria na Araha ki hagatahigamu. Na Araha marena ka na bêata ma na tatapa borahu iami. Ngaia ki ngahisigamu ma ki katogamu kamu tehateha. Na merongami ka page angoango me ka avarasigamu hanana vigamu takira. Ma igamu kamu page pupu huritagenira hete.”