Read Kahua RAMATA 34 Bible Online

RAMATA 34 - Kahua bible

RAMATA 34

¹O Moise ki panigi na bena i Moaba ma ki tagere i hungana i Nebo tanga na botena na hungana i Pisiga kerekê i Jeriko. I ngekana na Araha ki hagabâsia igê renia na agua hagenani: na apanena i Gileata ki râ ki tariha i hinua i Tane;

²na apanena hagenani iana o Napatali, na apanena iaterua o Eparaimi mo Manase; na apanena iana o Juta ki râ ki tariha i asi i kereso;

³na apanena iana o Juta i Negeve ma na bena i haganega i Soare tanga i Jeriko, na hinua ni geara.

⁴Na Araha ki vi tanga o Moise, ki vi: “Bâ, ngaia ngekana na agua, gê bani surua tangara o Abarahamo, o Isako mo Jakobo, hanana vigê page haganahunira na raraha iata renia. Inê kê hagabâsigo renia, ma kê manimania tenigo vigu banu igê.”

⁵Hoi, o Moise, na kariana koro na Araha ki me i ngekana i na apanena i Moaba, manga i bani visia na Araha.

⁶Na Araha ki bagia igê na maruguna i Moaba i avorana na hinua i Betepeore. Mataro me i ngekê ki mareha rârâ ta na enoni vige girara na anoanona.

⁷O Moise ki tonga na 120 na harisi iana ma ki kahu me. Ngaia ki ramoramo mênga ma ki pe guruha rârâ na maana.

⁸Na Isiraelita ga ogasira na bena i Moaba ka angi maramara igê renia surigi na tangahuri tangiani gi oru.

⁹O Josua o karena o Nune ngaia ki nahunia na takoha mataha, suria o Moise ki têbuhia ma ki kasia ki urusia. Na Isiraelita ka tê viteana o Josua ma ka marupegi na ramata, na Araha ki bani vatea renigi o Moise tangara.

¹⁰I mareha rârâ ta na poropete i Isiraele, vige maratorana o Moise. Na Araha ki metamasi re harana.

¹¹I mareha rârâ ta na poropete vige katogi na mena ma na tagaraha raha mangagi na ani na Araha ki hagatora o Moise ki hagaitangira renigi na maneraha i Esipito, na mane ni hagaotonga iana ma na ai ni Esipito hato.

¹²I mareha rârâ ta na poropete vige katogi na tarani ga hagamamaguraga, i katogi o Moise i maata na Isiraelita hato.