Read Kahua RAMATA 4 Bible Online

RAMATA 4 - Kahua bible

RAMATA 4

¹O Moise ki vi tangara na enoni, ki vi: “Mu marupegi na ramata hato, gê ramatenigi tangagamu, hanana mu page henahuraua ma kamu ogasia na agua, na Araha God na êvarimi ga rahesia, ki page haganahunigamu renia.

²Siana kamu nakagi kê nikâ tani na ramata henigi na aniku, se vigamu kasia râ tani. Mu marupegi na ramata iana na Araha God iami, gê bani vategamu renigi.

³Igamu maremi kamu bani bâsia na tarana, na Araha ki katoa i hungana i Peore. Ngaia ki mutera igê na ara ni hitangimi, ga vogasia o Bala i ngekana.

⁴Ma na hitangimi mu toto suria na Araha God iami, igamu kamu gâga mênga i ngekê.

⁵“Inê kê bani hagesurigamu renigi na ramata hato, manga i bani bonasiê na Araha God iaku renigi. Mu marupegi na ramata ngegana igê na agua mu sugi bêbanu igê ma kamu parênia.

⁶Mu marupegi maninga. Vikana igamu kamu hagabângenia tangara na enoni ga pe Isiraelita, vi igamu ka na enoni ni tako mataha ma ni giraraha. Matena ka rongogi na ramata hato ngegana, ngaira ka page vivi, ‘E, na Isiraelita ka na enoni ni tako mataha ma ni giraraha!’

⁷“Na enoni getera, naka ma ga raramohaga ngavê, ka pe nahunia rârâ na ataro vige ngahisira, matena ga avarasia, manga na Araha God iaka ki ngahisigia igia. Ngaia ki tamanigia i na anima na matena igia ka avarasia igê.

⁸Na enoni getera, naka ma ga raramohaga ngavê, ka pe nahunigi rârâ na ramata vige oto mangagi na ramata, gê bani hagesurigamu renigi i ngekê.

⁹Mu bâsigamu! Siana hagetage kamu bonotenigi igê na ogaha iami na marâ, mu bâsigi re maami maremi. Mu hagarongora na karemi ma na esimi

¹⁰renia na matena mu ura i maana na Araha God iami i hungana i Sinai, matena i vi tangê, ki vi, ‘Gu hagahakura na enoni. Inê kê obanira, viga karingagi na ramata iaku, hanana ngaira ka girara ga têtê vitaku igê na ogaha hagenani iata, ma hanana ga hagesurira na kareta ka marupegi nogata.’

¹¹“Mu hagarongora na karemi renia na matena mu ura igê na hunana na hungana, i tarê igê na gi. Na vavatana ki akê i vavearo. Na vaha puru ki aruhia na hungana.

¹²Mu hagarongora renia na Araha i tamasi tangagamu tenia na gi. Igamu kamu rongoa i tamasi ma kamu pe bâsia rârâ na bahanana.

¹³Ngaia ki bonasigamu renigi na marâ ga tuguhigamu, hanana vigamu marupea na suruheri i naka henigamu. Mu marupegi nga na tangahuri ramata, i segegi igê na hê aberabera gi rua.

¹⁴I na matena ngekana na Araha ki bonasiê, kê hagesurigamu renigi na ramata hato ga tuguhigamu, vigamu marupegi igê na agua, mu sugi bêbanu igê ma kamu parênia.

¹⁵“Matena na Araha ki tamasi tangagamu igê na gi i hungana i Sinai, igamu kamu pe bâsia na apena. Mu bâsigamu,

¹⁶hanana siana kamu tasitasi. Siana kamu tagarahigi na nunuta na ataro, ga bâ manga na mane se na gete,

¹⁷se na marâ i mauri i ano, se na manu,

¹⁸se na ma ma na marâ vigana, se na siare.

¹⁹Siana kamu vogasigi na arito, na hageha ma na higu i vavearo surigi ma na bâkorohata. Na Araha God iami ki nakara na marâ ngegana tangara na enoni hato getera i maveta, hanana ga vogasira ngaira.

²⁰Ma igamu, igamu nga ka na ani i hagatahigamu tenia i Esipito, na agua ni mamasiaganiha i raha manga na anguruna na gi. Ngaia ki bêngenigamu hura, hanana igamu kamu vora re na kariana marena. Ngaia kani igamu i ngekê.

²¹“Suria igamu, tahema na Araha God iami ki mangariaga tangê, ma ki tohe, vi inê ki asa hagetage, vi ve tarêhia na ve i Jotano se vi ve bêbanu igê na agua na mako koro, i page haganahunigamu renia.

²²Inê kê page meme so i na apenena ikê, ma igamu, igamu kamu sugi tarê ma kamu parênia na agua na mako koro.

²³Siana hagetage kamu bonotenia na suruheri iana na Araha God iami henigamu. Mu marupea na ramata iana, vi siana kamu tagarahigi na nunuta na ataro,

²⁴suria na Araha God iami ki manga na anguruna na gi, suria i manimanigamu ngavê, vi siana kamu vogasira na ataro.

²⁵“Henaka na matena mu bani oga arihu i ngekana ma kamu tongatonga na karemi ma na esimi, siana kamu tasitasi kamu tagarahigi na nunuta na ataro hanana mu vogasira henaka ga bâ manga i he. Na tarana ngekana ki era ngavê i maana na Araha ma ki page hagamangaria.

²⁶Inê kê tohe renirerua na vavearo ma na ano, vi manga igamu ma kamu guguruga tangê, igamu kamu meme rêrê igê na agua i na apanena tarê na ve i Jotano. Vikana ki asa iami, vigamu oga hagahu igê na agua, mu sugi parênia. Igamu kamu page mutemute ngavê.

²⁷Na Araha ki page tokorenigamu surigi na apaneni iata na enoni getera, ma tani ma na hitangimi ka page tahi.

²⁸Ma i ngegana igamu kamu page vora re igê na kare rakuraku iata na nunuta na ataro, na enoni ka tagarahigi renigi na apinige se na hê, na ataro ga pe girara vige bâbâ, se vige rongorongo, se vige ngêngê, se vige siginia ta na marâ.

²⁹I ngegana igamu kamu page garia igê na Araha God iami. Ma ki manga mu garia igê na mêrihami hagenani, igamu kamu page tarahua.

³⁰Matena ga tarahugamu na mamasiaganiha ma na bagabevoani hato getigi, hoi, mu page aharia aporo nga na Araha ma kamu têtê viteana.

³¹Ngaia ki na God ni hetakiha. Ngaia ki asa vige panigamu, se vige mutegamu ngavê. Ngaia ki asa vige bonotenia na suruheri iana marena henira na êvarimi.

³²“Mu bâ bê aporo igê na matena i mamênga vigamu voravora igê, igê na matena i nago kere vê noga God ki hagavorara na enoni i maveta ikê. Mu bâ i maveta hagenani. I hega, na tarana i raha vikana ki bani vora me vari i nago? I hega, ta na enoni ki bani rongoa vari na tarohana na tarana vikana?

³³I hega, ta na enoni ki mauri vari manga igamu matena i bani rongoa God i tamasi tanga igê na gi?

³⁴I hega, igamu kamu bani rongoa vari, vi ta na ataro ki ramo ki râ ki hagatahira na enoni tenira na merongata ma ki katora ka vora re na kariana, manga na Araha God iami i bani kato tangagamu igamu i Esipito? Renigi na maami maremi igamu kamu bâsigi na bâbâhana ma na raramohana raha. Ngaia ki hagatorangenigi na hagaitangiha ma na hearihatana. Ngaia ki katogi na mena ma na tagaraha raha. Ngaia ki katogi na tarani ga hagamagusira ngavê na enoni.

³⁵Na Araha ki hagabâsigamu renigi na tarani ngegana, hanana i hagatanga monari tangagamu, vi ngaia getea ma ki God, mareha vi tani râ nikâ.

³⁶Ngaia ki katogamu, kamu rongoa na ringena i râ me tenia i vavearo, hanana i hagesurigamu. Ma ikê i ano ngaia ki hagabâsigamu renia na gi apuna iana ma ki tamasi tangagamu igê.

³⁷Suria ngaia ki takuira na êvarimi, tahema ngaia ki ategamu ma ki bêngenigamu hura tenia i Esipito renia na raramohana raha.

³⁸Na enoni ga rako ma ka ramo teharigamu, ngaia ki paira hura tenia na apanena iata, hanana i bêngenigamu banu igê ma ki haganahunigamu renia na agua kamu nahunia nga igamu.

³⁹Hoi, i ngekê nga mu takusia, vi na Araha ngaia getea ma ki marungirerua na vavearo ma na ano, i mareha vi tani râ nikâ. Siana hagetage kamu bonotenia.

⁴⁰Mu marupegi nga na ramata hato iana, gê vategamu renigi i ngekê, hanana igamu ma na raraha iami kamu gâga igê na ramana. Vikana igamu kamu page gâga hagahu nga igê na agua, na Araha God iami ki page haganahunigamu renia, kamu nahunia tare ki bê ki arâ.”

⁴¹Hoi, O Moise ki nakagi na hinua gi oru kerekê i ve i Jotano,

⁴²tangara na enoni ga gavagava ka tahitahi igê, matena i bagara râ me ka nahu hunira na enoni i mareha vige merongasira. Ngaira ka girara ga gavagava tanga na hitangini na hinua ngegana, hanana ga tahitahi igê.

⁴³Na hinua i Besere igê na botena benaga igê na bagamasusu raha tanga na varo ninuni iana o Rubeni. Na hinua i Ramote i na apanena i Gileata tanga na varo ninuni iana o Gati. Na hinua i Golane i na apanena i Basani tanga na varo ninuni iana o Manase.

⁴⁴O Moise ki vatera na Isiraelita renigi na ramata ma na hagesuringa iana God.

⁴⁵Ngaia ki kato vikana i murina na matena ga hura tenia i Esipito. Ngaia ki vatera na ramata, matena ga oga igê na maruguna kerekê i ve i Jotano i avorana na hinua i Betepeore. Na agua ngekana kani igê na apanena i nahunia i nago o Sigone na maneraha iata na Amorita, ma ki marungia i nago na hinua i Gesebone. O Moise ma na Isiraelita ka teharia, matena ga râ me tenia i Esipito.

⁴⁶

⁴⁷Ngaira ka henahuraua na apanena iana ma nikâ na apanena iana o Ogo na maneraha getea iata na Amorita, i marungia i Basani ma ki oga kerekê i Jotano.

⁴⁸Na apanena iaterua ki haganega i hinua i Aroere igê na akerena ve i Aranone, ki râ ki tariha i hungana i Sirione, i vi hungana i Heremone.

⁴⁹I rarona nikâ na apanena ngekana na apanena hagenani i Negeve kerekê i ve i Jotano tariha i Asime ma ki tariha nikâ kerekê i hungana i Pisiga.