Read Kahua RAMATA 5 Bible Online

RAMATA 5 - Kahua bible

RAMATA 5

¹O Moise ki hagahakura na Isiraelita hato ma ki vi tangara, ki vi: “Isiraelita, mu karingagi na ramata hato, gê vategamu renigi i ngekê. Mu hagesuringenigi nga ma kamu marupegi.

²I hungana i Sinai na Araha God iaka ki naka igê na suruheri,

³mareha vi henira ma na êvarika, ma henigia igia hato hete, ga oga i ngekê.

⁴I ngekana igê na hungana na Araha ki tamasi me igê tangagamu tenia na gi.

⁵I na matena ngekana inê kê hagatarê tamasinga iana na Araha igê tangagamu. Suria igamu kamu magutenia na gi tahema igamu kamu pe tagere igê na hungana. Na Araha ki vi,

⁶‘Inênga ka na Araha God iami. Inê kê hagatahigamu tenia i Esipito, mu vora re igê na kare rakuraku.

⁷“ ‘Mu rahesiê ma inê, mareha vi na ataro.

⁸“ ‘Siana kamu tagarahigi na nunuta na anima na marâ i vavearo, se i ano, se vi i ruguhana na maveta, hanana vigamu rahesira.

⁹Siana hagetage kamu hagarapera na ataro, se vigamu vogasira, suria inênga ka na Araha God iami ma kê ngaritenira ngavê na ataro. Inê kê hagaitangira na enoni ga kiteniê, ma na hagaitangiha ngekê ki page tarahura nikâ na raraha iata ki tarêhira na oruta ma na heta na apaparaha iata.

¹⁰Ma inê kê takuira na enoni ga takuiê ma ka marupegi na ramata iaku, ki tarêhigi na rehagaro na apaparaha iata.

¹¹“ ‘Siana kamu visia purua na ataku, se vigamu kuasira na enoni renia, suria inê na Araha God iami, inê kê page hagaitangia na anima na enoni i katokato vikana.

¹²“ ‘Mu marupea na tangiana ni mamaroha, ma kamu hagahigasia, manga inê na Araha God iami gê bani bonasigamu renia.

¹³Na tangiani gi ono ka oga tangagamu mu tagara igê.

¹⁴Na pita na tangiana ki na tangiana ni mamaroha. Ngaia ki na aniku. Igê na tangiana ngekana ki apu hagetage na enoni vige tagara igê, naka ma igamu, se na karemi, se na kare rakuraku iami, se na togoha iami, se na mahuara ga oga i berarogami. Na kare rakuraku iami ki tuguhira, viga mamaro manga igamu.

¹⁵Mu takusia tare, vi igamu kamu vora na kare rakuraku i Esipito, ma inênga na Araha God iami kanigê hagatahigamu renia na raramohaku raha. Tahema inê kê bonasigamu, hanana mu hagahigasia na tangiana ni mamaroha.

¹⁶“ ‘Mu hagahigasira o vaemami ma kenami, manga inê na Araha God iami gê bonasigamu renia, hanana na ara ni marâ ka tovaraha maniga tangagamu, ma hanana igamu kamu page gâga hagahu igê na agua, gê sugi haganahunigamu renia.

¹⁷“ ‘Siana kamu nahuira na enoni ka meme.

¹⁸“ ‘Siana kamu gamogamo.

¹⁹“ ‘Siana kamu hanago.

²⁰“ ‘Siana kamu hagatoraia na enoni.

²¹“ ‘Siana kamu tenia na gete iana na mane getea, se na ruma iana, se na mako iana, se na kare vurivuri iana, se na puruka iana, se na tonki iana, se na anima vê na nahuniga iana.’

²²“Na ramata hato ngegana na Araha ki vategamu renigi, matena mu haku igê na hungana. Matena i tamasi igê na ringena raha tenia na gi ma tenia na vaha puru, ngaia ki vategamu renigi na ramata ngegê, mareha vi tani râ nikâ, ma hemuri ngaia ki segegi so igê na hê aberabera gi rua ma ki vateê renirerua.

²³“Matena na gi ki ora igê na hungana hagenani ma igamu kamu rongoa na ringena na Araha tenia na roto hono, na enoni ga bêngenigamu ma na enoni raha surigi na varo ninuni hehegitigi iami ka râ me i pasiku.

²⁴Ngaira ka vi, ‘Na Araha God iaka ki hagabângenigi na bâbâhana ma na raramohana raha tangagami, matena mi rongoa i tamasi tenia na gi. I ngekê igami kami bâsia, vi na enoni ki asa vige me, matena na Araha ki metamasi.

²⁵Igami kami tahi. I hega, igami kami garigari mera nikâ? Igami kami page meme nga, manga vigami rongoa na Araha God iaka i tamasi nikâ.

²⁶I hega, na enoni ki girara i tahitahi vari, matena i rongoa God mamauri i tamasi tenia na gi?

²⁷Moise, gu râ ma igo ma ku karingagi na ara ni marâ i page visigi na Araha God iaka. Ma hemuri ko aporo me ko hagarongogami renigi na tamasinga iana tangago. Igami kami page karingagi ma kami page marupegi.’

²⁸“Matena na Araha ki rongo vikana, ngaia ki vi tangê, ki vi, ‘Inê kê bani rongoa na tamasinga iata na enoni ngegana. Ngaira ka vi koro.

²⁹Manga vi ngaira ma ka takotako tare vikana ki koro era, ma ki mareha! Manga vi ngaira ma ka hagahigasiê tare ma ka marupegi tare na ramata hato iaku, hanana na ara ni marâ ka tavoraha bâkoro tangara, ngaira ma na raraha iata, ki koro era, ma ki mareha!

³⁰Râ, ku vi tangara ke aporo i ruma na gahu iata,

³¹ma igo ma Moise ko gâga so ikê heniê, ma be vatego renigi na ramata ma na hagesuringa hato iaku. Go hagesurira na enoni renigi, hanana ngaira ka page marupegi igê na agua, gê page haganahunira renia.’

³²“Isiraelita, mu uhungia nga kamu tanugi na ara ni marâ, na Araha God iami i bonasigamu renigi. Siana kamu aharêngia ta na hitangini na ramata iana.

³³Mu marupegi ngaigi hato, hanana na ara ni marâ ki tavoraha bâkoro tangagamu ma hanana igamu kamu page gâga hagahu igê na agua, mu sugi henahuraua.