Read Kahua RAMATA 6 Bible Online

RAMATA 6 - Kahua bible

RAMATA 6

¹“Ngegana ka na ramata hato, na Araha God iami ki bonasiê, vigê hagesurigamu renigi. Mu marupegi igê na agua mu sugi bêbanu igê ma kamu henahuraua.

²Igê na ogaha hagenani iami ki tuguhigamu, igamu ma na raraha iami, mu hagahigasia na Araha God iami, ma kamu marupegi na ramata hato iana, gê vategamu renigi, hanana mu gâga hagahu igê na agua i ngekana.

³Isiraelita, mu tototo surigi ma kamu marupegi. Vikana na ara ni marâ ka page akê me maninga tangagamu ma igamu kamu page gahugahu ngavê ma kamu page gâga igê na agua na mako ni ngauha ma ni togoha, manga na Araha God, na êvarimi ga rahesia, ki bani surua.

⁴“Isiraelita, mu rongo! Na Araha God iaka ngaia getea ma ki Araha.

⁵Mu takuia na Araha God iami igê na mêrihami hagenani.

⁶Siana hagetage kamu bonotenigi na ramata ngegana, gê vategamu renigi i ngekê.

⁷Mu hagesurira na karemi renigi. Mu tamasigi, matena mu gâga i pasimi, matena mu arâ i tagua, matena mu mamaro ma na matena mu tagara.

⁸Mu rakugi i rimami ma kamu tarepuri renigi, hanana mu takusigi tare.

⁹Mu segegi igê na u na maani ruma iami ma igê na maani para ni hinua iami.

¹⁰“Manga i bani surua na Araha God iami tangara na êvarimi o Abarahamo o Isako mo Jakobo, ngaia ki page haganahunigamu renia na agua henigi na hinua raha, ga hagagara koro, mu pe tagarahigi maremi.

¹¹Na ruma igê ka page vunu renigi na marâ koro, mu pe nakagi igamu maremi igê. I ngekana ka page goga igê na vekaru, mu pe oparigi maremi. I ngekana ka page gâga igê na pariki ni vaini ma olive, mu pe hasigi maremi. Matena na Araha ki bêngenigamu banu igê na agua ngekana ma ka aharêsigamu ngavê na ngêra mu obanigi,

¹²mu takusia tarema na Araha, i hagatahigamu tenia i Esipito, mu vora re na kare rakuraku igê.

¹³Mu hagahigasia na Araha God iami. Mu rahesia ngaia getea ma, ma kamu tohetohe renia na atana ngaia getea.

¹⁴Siana kamu hagarapera na ataro, na anima na ataro iata na enoni getera igê na agua rihigamu.

¹⁵Manga mu vogasira na ataro, na mangariaganiha iana na Araha ki page nahuigamu manga na gi ma ki page mutegamu ngavê, suria na Araha God iami i ngahisigamu, ki usitenira ngavê na ataro.

¹⁶“Siana kamu uhungia na Araha God iami, manga mu katoa i nago i Masa.

¹⁷Mu uhungia hete, kamu marupegi na ramata hato, i bani vategamu renigi.

¹⁸Mu katogi ma na tarani, na Araha ki visigi, viga koro ma ka oto, ma igamu kamu page tavoraha bâkoro igê na ara ni marâ hato. Igamu kamu girara mu page parênia na agua ni mako koro, na Araha ki bani surua tangara na êvarimi.

¹⁹Igamu kamu page tarigenira hura na merongami, manga i bani visia na Araha.

²⁰“I hemuri me na karemi ka page hagategamu, ka vivi, ‘Tanu hega na Araha God iaka ki bonasigia, viga marupegi na ramata hato ngegana?’

²¹Hoi, mu vi tangara, kamu vivi, ‘Igami kami vora na kare rakuraku iana na maneraha i Esipito, ma na Araha ki hagatahigami renia na raramohana raha.

²²Renigi na mamami maremami igami kami bâsia, i tanugi na mena ma na tagaraha raha, ga hagamagusira na ai ni Esipito, na maneraha iata ma na mane ni hagaotonga hato iana.

²³Ngaia ki hagatahigami tenia i Esipito ma ki bêngenigami me, ma ki haganahunigia renia na agua ikê, manga i bani surua vikana tangara na êvarika.

²⁴Hoi, na Araha God iaka ki bonasigia, hanana viga marupegi na ramata hato ngegana ma ka hagahigasia ngaia. Manga ga katokato vikana, ngaia ki page anumasigia tare ma ki page haganahunigia renia na ramana.

²⁵Manga igia ma ka tototo surigi na ramata hato iana, God ki page obakoro renigia.’