Read Kahua RAMATA 7 Bible Online

RAMATA 7 - Kahua bible

RAMATA 7

¹“Na Araha God iami ki page bêngenigamu banu igê na agua, mu sugi henahuraua, ma ngaia ki page tarigenira hura na apaneni me rako getera. Ngaia ki page tarigenira hura na apaneni me gi pi, ga rako ma ka ramo teharigamu, matena mu gâga sugira: na Hitita, na Girigasita, na Amorita, na Kananita, na Perisita, na Givita ma na Jebusita.

²Matena na Araha God iami ki tagarenira na apaneni me ngegana tangagamu, ma igamu kamu teharira, ki tuguhigamu, mu mutera hato ngavê. Siana kamu heaganari henira, se vigamu takira.

³Siana kamu auragi hetarênge henira, igamu se vi na karemi.

⁴I era ma ngaira ka hagahorora na karemi tenia na Araha ka vogasira na ataro. Manga i manga ngekana, na Araha ki page mangariaga tangagamu ma ki page mutegamu ototo râ nga.

⁵Vikana mu hogegi na bea ni vogasiha iata. Mu menamenarigi na panga apuna tangara na ataro iata. Mu kumukumugi na u na nununa ka Asere na ataro, ma kamu sungigi na nunuta na ataro iata.

⁶Mu katogi vigana, suria igamu ka na anina na Araha God iami. I berarogata na apaneni me hato i maveta, ngaia ki ategamu igamu, kamu vora re na kariana hetakui.

⁷“Na Araha ki mareha vige takuigamu se vige ategamu, suria vi igamu kamu rako teharira na apaneni me getera. Igamu ka na apaneni me i mareha ngavê vigamu rako.

⁸Na Araha ki takuigamu ma ki obania vi hagamonaria na suruha iana tangara na êvarimi. Tahema ngaia ki hagatahigamu renia na raramohana raha, ma ki rupasigamu, suria igamu kamu vora na kare rakuraku iana na maneraha i Esipito.

⁹Mu takusia tare, vi na Araha God iami ngaia getea ma ki God ma ki hagamonarigi tare na tamasinga iana. Ngaia ki page hagamonaria na suruheri iana, ma ki page ama ni takuira nga na enoni, ga takuia ma ka marupegi na ramata iana, tariha na rehagarota na apaparaha iata.

¹⁰Ma na enoni ga kikitenia, ngaia ki hagaitangira nga.

¹¹Hoita, mu arâ surigi na hagesuringa iana. Mu marupegi na ramata, gê vategamu renigi i ngekê.

¹²“Manga mu karingagi na ramata ngegana ma kamu marupegi maninga, hoi, na Araha God iami ki page ama ni hagamonaria nga na suruheri iana henigamu ma ki page ama ni takuigamu nga, manga i bani surua tangara na êvarimi.

¹³Ngaia ki page takuigamu ma ki page korokoro tangagamu, hanana mu ama ni rakorako nga ma ka rakorako na karemi. Ngaia ki page katogi na mu ma na pariki iami ka akê bâkoro, hanana ga page aharêsigamu na ngêra, na vaini ma na oile ni olive. Ngaia ki page hagarakonira na puruka ma na sipi iami. Ngaia ki page korokoro tangagamu vikana igê na agua, i bani surua tangara na êvarimi, hanana vi page haganahunigamu renia.

¹⁴Ngaia ki page korokoro tangagamu igamu teharira na apaneni me getera i maveta. I asa ta na hetangimi, vige gomara se vige gomara ta na hitangita na togoha iami.

¹⁵Na Araha ki page marupegamu tenigi na maeha hato, ma ki asa vige page hagamamasiagagamu renigi na mera, ga tarahugamu i Esipito, ma ki hagamamasiagara hete na merongami hato renigi.

¹⁶Mu mutera ngavê na ara ni apaneni me, na Araha God iami ki tagarenira tangagamu. Siana kamu takira. Siana kamu vogasira na ataro iata, i era ma kamu me.

¹⁷“Siana kamu tako kamu vi, ‘E, na apaneni me ngegana ka rako teharigia igia. Manga i he igia ka girara viga tarigenira hura?’

¹⁸Siana kamu magutenira. Mu takusia aporo vi manga i he na Araha God iami ki hagaitangira na maneraha i Esipito ma na kariana hato.

¹⁹Mu takusigi aporo na hagaitangiha raha, mu bani bâsigi re maami maremi, na mena ma na tagaraha raha, na Araha God iami ki katogi, matena i hagatahigamu renigi na raramohana ma na bâbâhana raha. Ngaia ki page mutera na enoni hato mu magutenira i ngekana, manga i mutera i nago na ai ni Esipito.

²⁰Ngaia ki page katora, ka bagatatako ma ki page mutera nikâ na ani ga gava ka ruku.

²¹Vikê siana kamu magutenira na enoni ngegana. Na Araha God iami ki ngahisigamu. Ngaia ki na God raramohaga hunia i bâ hahaneaga.

²²Ngaia ki page tarigenira hura tatage na apaneni me ngegana tarami. I page bara tangagamu, vigamu mutera igê na matena gi tage, suria manga vi igamu ma kamu katokato vikana, na marâ vasiga ka page vunusigamu ma kamu page meme renira.

²³Na Araha ki page tagarenira na merongami tangagamu ma ki page katora ka bagatatako, mataro me ka mutemute ngavê.

²⁴Ngaia ki page tagarenira na maneraha iata tangagamu. Igamu kamu page nahuira ka meme, ma ki hato vige page takusira nikâ. I asa ta na enoni vige rêra pusigamu. Igamu kamu page mutera ngaira hato.

²⁵Mu sungigi na nunuta na ataro iata. Siana kamu tenigi na siliva se na golo ga hagarênira renigi, ma siana kamu toregi tangagamu maremi, i era ma kamu meme, suria na Araha ki ngaritenia ngavê na vogasiha ni ataro.

²⁶Siana kamu migibanu na hitangini na nunuta na ataro ngegana i ruma iami, i era ma kamu makaka manga ngaira. Mu kikitenigi nga i mêrihami hagenani na nunuta na ataro ngegana, suria na Araha ki page hagamagahurura.