Read Kahua RAMATA 8 Bible Online

RAMATA 8 - Kahua bible

RAMATA 8

¹“Mu marupegi na ramata hato, gê bani vategamu renigi i ngekê, hanana mu tahitahi, kamu rakorako ma kamu henahuraua na agua, na Araha ki bani surua tangara na êvarimi.

²Mu takusia, manga i he na Araha God iami ki bêngenigamu me surigi na harisi tangahuru ge he, matena mu aharêvoro igê na bagamasusu raha. Ngaia ki uhungigamu renigi na bagabevoani, ga tarahugamu, hanana i giraragi na takotako iami, ma hanana i tarahua, vi igamu kamu page marupegi na ramata iana se mareha.

³Ngaia ki naka na magêha ki tarahugamu, ma hemuri ngaia ki hagangêgamu renia na mana, na ngêra mu pe ngêa noga igamu ma na êvarimi. Ngaia ki kato vikana, hanana i hagesurigamu, vi na enoni ki pe mauri ma renia na ngêra ma renigi nikâ hete na tamasinga hato iana God.

⁴Surigi na tangahuru ge he na harisi ngegana na gahu iami ke pe êvariga ma na êgami ka pe hahara.

⁵Mu takusia, vi na Araha God iami ki hagaotogamu ma ki hagaitangigamu manga na mane i hagaotora na karena.

⁶Tahema mu marupegi na ramata iana na Araha. Mu arâ surigi. Mu hagahigasia na Araha.

⁷Na Araha God iami ki sugi bêngenigamu banu igê na agua na mako koro, ma ka oga igê na ve ma na vebanga ma na ve i rarona na mako ga huhura me igê na maruguni ma igê na hungani,

⁸na mako koro tangagi na ngauha, na koni, na vaini, na apinige na fiki, na marâ mangagi na memeapu, na olive ma ka rako igê na pirui.

⁹I ngekana igamu ki asa, vigamu page magê, se vigamu matareha igê. Na hê igê ka tonga renigi na aiani ma na kapa ka oga igê na hungani.

¹⁰Na ngêra ka page aharêsigamu ngavê, ma igamu kamu page visia koro na Araha God iami, i vategamu renigi na agua na mako koro.

¹¹Mu takusia tare na Araha God iami. Mu marupegi maninga na ramata hato iana, gê vategamu renigi i ngekê.

¹²Matena ga aharêsigamu na ngêra ma kamu bani tagarahigi na ruma koro ni ogaha iami,

¹³ma na matena ga gahugahu na puruka ma na sipi iami, na siliva ma na golo iami ma na nahuninga hato iami,

¹⁴hoi, siana kamu paroparo renigi ma siana kamu bonotenia na Araha God iami, i hagatahigamu tenia i Esipito, mu vora re na kare rakuraku igê.

¹⁵Ngaia ki bêngenigamu kamu aharêvoro igê na bagamasusu raha, i hagamamagura ma ka oga igê na ma garahunu ma na garagara pinihi. Igê na bagamasusu raha ngekana i avagavaga ma ki rikitaga, ngaia ki katoa na ve ki gogo me tenia na parisihê tangagamu.

¹⁶Igê na bagamasusu raha ngaia ki hagangêgamu igê renia na mana, na ngêra na êvarimi ka pe ngêa noga i nago. Ngaia ki uhungigamu renigi na bagabevoani ga tarahugamu, hanana i kahu tamanigamu renigi na marâ ga koro.

¹⁷Tahema siana hagetage kamu vivi, vi na ramoha ma na giraraha iami maremi kaniga katogamu kamu ruruguha.

¹⁸Mu takusia tare hete, vi na Araha God iami kani haganahunigamu renigi na ramoha ma na giraraha ngegana. Ngaia ki kato vikana, suria i ngekê ngaia ki ama ni toto suria nga na suruheri iana henira na êvarimi.

¹⁹Siana hagetage kamu rumakaka renia na Araha God iami, se vigamu haganega kamu hagarapera ma kamu vogasira na ataro. Manga mu katokato vikana, be vi tangagamu, igamu kamu page mutemute nga.

²⁰Manga igamu ma kamu pe têtê viteana na Araha, ngaia ki page mutegamu mangara na apanini me i page mutera tarami.