Read Kahua RAMATA 9 Bible Online

RAMATA 9 - Kahua bible

RAMATA 9

¹“Isiraelita, mu rongo! Igamu kamu sugi tarêhia na ve i Jotano, hanana mu henahuraua na apanena iata na apanini me, ga rako ma ka ramo teharigamu. Na hinua iata ka bagararaha ma na para rihigi ki akê ngavê i vavearo.

²Na enoni i ngegana ka borahu ma ka ramo. Ngaira ka na enoni ga bagararaha. Mu bani rongoa, vi i asa ta na enoni vige meraheariha.

³Hoi, igamu maremi kamu page bâsia, vi na Araha God iami ki page nanago tarami manga na bagagi raha. Ngaia ki page teharira tarami, hanana igamu kamu page tarigenira hura ma kamu mutera garigari, manga i bani visia.

⁴“Matena na Araha God iami ki tarigenira hura hato tarami, siana kamu tako kamu vi, ‘Ngaia ki haganahunigia renia na agua ikê, suria vi igia ki oto tangagia.’ Mareha vê! Na Araha ki page tarigenira hura na enoni ngegana, suria hete ngaira ka era.

⁵Na Araha ki nakagamu, kamu parênia na apanena iata, mareha vi suria igamu kamu koro ma kamu hagabângenigi na ogaha koro. Ngaia ki tarigenira hura, suria hete ngaira ka era, ma suria ngaia ki obania vi hagamonaria hete na suruha iana tangara na êvarimi o Abarahamo, o Isako o Jakobo.

⁶Siana kamu takusia, vi na Araha ki haganahunigamu renia na agua na mako koro, suria vi igamu kamu ki oto tangagamu. Mareha vê! Igamu kamu guguruga ngavê hete tanga.

⁷“Mu takusia tare, manga i he igamu kamu hagamangaria na Araha God iami igê na bagamasusu raha. Haganega tenia na matena mu hura pania i Esipito mataro me kamu ata ikê i ngekê, igamu kamu bani haritohea me.

⁸I hungana i Sinai igamu kamu hagamangaria ngavê igê na Araha. Tahema ngaia ki obania vi mutegamu.

⁹Inê kê tagere igê na hungana kê torerua na hê aberabera gi rua, ga segea igê na suruheri iana na Araha henigamu. Inê kê oga i ngekana surigi na tangiani tangahuru ge he ma na bungiani tangahuru ge he, kê pe ngê ma kê pe tono rârâ.

¹⁰Hemuri na Araha ki vateê na hê aberabera gi rua. Ngaia marena ki bani segegi so igê na marâ i bani visigi tangagamu tenia na gi igê na matena mu haku igê na hunana na hungana.

¹¹Ua, i murini ga hato na tangiani ma na bungiani tangahuru ge he, na Araha ki vateê na hê aberabera gi rua, i bani segea igê na suruheri.

¹²“Hoi, na Araha ki vi tangê, ki vi: ‘Gu vato nga tenia na hungana, suria na kariamu, go bêngenira hura tenia i Esipito, ngaira ka bagaparongata ma ka tasi. Ngaira ka bani aharêngigi noga na ramata iaku tangara ma ka tagarahia na nununa na ataro, hanana ga vogasia.’

¹³“Nikâ na Araha ki vi tangê, ki vi: ‘Inê kê bani girara, vi na enoni ngegana ka togeaga ngavê.

¹⁴Gu nakê so! Inê be mutera ngavê, hanana na enoni ka bonotenira ngavê. Ma hemuri be hagarakonira na raraha iamu, ka voravora na apaneni nuni, ga rakorako ma ka ramoramo teharira ngaira.’

¹⁵“Hoi, inê kê kari arigu kê vato tenia na hungana. Inê kê mererârua vato na hê aberabera gi rua, ga segea igê na suruheri. Na vavatana na gi ki gahuia na hungana.

¹⁶Inê kê bâsigamu, mu bani aharêngigi noga na ramata iana na Araha God iami tangagamu, ma kamu haritohea, suria mu tagarahia na nununa na puruka mane renigi na golo.

¹⁷Tahema i ngekana i maami inê kê arihatenirerua so na hê aberabera gi rua, karu babaro agani.

¹⁸Ma hemuri kê tubê so i ano i maana na Araha surigi na tangiani ma na bungiani tangahuru ge he. Inê kê pe ngê ma kê pe tono rârâ. Inê kê kato vikana, suria igamu kamu haritohea na Araha ma kamu hagamangaria.

¹⁹Inê kê magu, suria na Araha ki mangariaga ngavê. Ngaia ki obania vi mutegamu, suria i mangariaga ngavê. Henaka, ma na Araha ki aganariê nikâ.

²⁰Na Araha ki mangariaga ngavê nikâ tanga o Aroni, hanana vi nahuia ki meme. Tahema inê kê nungia na Araha tanga nikâ o Aroni.

²¹Inê kê tahura na marâ ni tasi, na nununa na puruka mane mu tagarahia renigi na golo, ma kê kasia igê na gi. Inê kê menamenarigi na golo ki vora na momogani, ma kê kasigi na momogani igê na ve, i gogo vato me tenia na hungana.

²²“Igamu kamu hagamangaria nikâ na Araha God iami, matena mu oga i Tabera, i Masa ma i Kibirote Hatava.

²³Ma na matena i hagatorangeniagamu tenia i Katesi Baranea ma ki bonasigamu, hanana vigamu henahuraua na agua, i bani surua vi page haganahunigamu renia, igamu kamu guguruga tanga. Igamu kamu pe hagêguritogo renia ma kamu pe tê viteana.

²⁴Haganega tenia na matena gê giraragamu moramora igê, igamu kamu haritohea tare na Araha.

²⁵“Tahema inê kê susure kê tubê so i ano i maana na Araha surigi na tangiani ma na bungiani tangahuru ge he, suria inê kê bani girara, vi ngaia ki togeaga hanana i mutegamu.

²⁶Inê kê nunginungi, kê vi, ‘Araha raramohaga hunigo, siana ko mutera na kariamu maremu, go hagatahira ma ko bêngenira hura tenia i Esipito renia na raramohamu raha.

²⁷Gu takusira na kariamu o Abarahamo, o Isako mo Jakobo. Siana ko takusigi na guguruganiha ma na eraha ma na tasi iata na enoni ngegê.

²⁸I era ma na ai ni Esipito ka page vivi, vi igo ki asa vigu bêngenira banu na kariamu igê na agua, go bani surua tangara. Ngaira ka page vivi, vi igo ko bêngenira banu na kariamu igê na bagamasusu raha, hanana vigo mutera, suria go kitenira.

²⁹Gu bâ, ngaira ka na enoni, go atera tangago maremu ma ko bêngenira hura tenia i Esipito renia na raramohamu raha.’