Read Kahua JOANE 10 Bible Online

JOANE 10 - Kahua bible

JOANE 10

¹O Jesu ki vi: “I monari, be vi tangagamu: manga ta na mane, ma ki bêbanu i ruma ni sipi, mareha vi ge bêbanu igê na maa ni ruma, ma ki hanehane banu ma i tagua, ngaia ki na mane hanago, se na manero.

²Ma na mane, i bêbanu igê na maa ni ruma, ngaia ki na avanuta na sipi, i bâbâsurira.

³Na mane, i anumasia na ruma ni sipi, ki tangahia na maa ni ruma tanga ki bêbanu. Na sipi ka rongoa, matena i unira, ki hêtani na atata na sipi iana, ma ki merahura.

⁴Matena i merahura vê, ngaia ki bêngenira, ma na sipi ka tari suria, renia ngaira ka rongorongo hagagara renia.

⁵Ngaira ki asa, vi ge râ suria na ani getea na mane. Ngaira ka page gavagavatenia hete, suria ngaira ka pe rongo hagagara renia.”

⁶O Jesu ki visia tangara na maramaraveta ngekana, ma ngaira ka pe tako mataha renia na marâ, i obania, vi visia tangara.

⁷Ma hemuri o Jesu ki vi tangara nikâ, ki vi: “I monari, be vi tangagamu: inê nga kanigê manga na maa ni ruma tangara na sipi.

⁸Na enoni hato, ga bâsuri sipi, ga hagenago me taraku, ngaira ka na mane hanago ma na manero, ma na sipi ka pe tê viteata.

⁹Inê nga ka na maa ni ruma. Na ani, i bêbanu igê na maa ni ruma, inê, ngaia ki page tahitahi. Ngaia ki page bêbanu me ki aporo huhura vê, ma ki page tarahua na go koro.

¹⁰Na mane hanago ki arâ ma me, hanana vi hanagora, nahuira ma ki hagaerasira na sipi. Nga noga ma inê, inê kê râ me, hanana vi ngaira ka mauri, ma ka nahunia na mauriha mora ngavê.

¹¹“Na mane, i marupera maninga na sipi, inê nga. Na mane, i marupera maninga na sipi, ngaia ki agana, ki meme, hanana ga tahitahi na sipi.

¹²Na mane, ga vuria, hanana vi bâbâsurira na sipi, ngaia ki mareha vi na avanuta na sipi. Tahema ngaia ki pe marupera maninga. Matena i bâsia râ na o vasiga, i arâ me, ngaia ki panira so na sipi, ma ki gavagava. Ma na o vasiga ki page taburia ta na sipi, ma na ani getera ka totoko.

¹³Na mane, ga vuria, ki bâbâsurira na sipi, ngaia ki gavagava, suria ngaia ki tagara meni haga ma, ma ki pe sibera na sipi.

¹⁴Na mane, i marupera maninga na sipi, inê nga. Inê kê aitangisira na sipi iaku mareku, ma ngaira nogata ka aitangisiê inê.

¹⁵I tagenana ma o Vaemaku i aitangisiê inê, menê nogaku kê aitangisia ngaia. Ma kê agana, kê meme, hanana vi ngaira ka tahitahi.

¹⁶Ga gâga nikâ na ani getera na sipi, ga pe oga igê na ruma ni sipi ngekê. Ngaira ka na aniku. I tuguhiê, gê torera nikâ. Ngaira ka page têtê viteaku, ma vikana ngaira hato ki page vora na totoha ni sipi gi tage togo ma, ma na ani, i marupera maninga, ki gi tage togo ma nikâ.

¹⁷“Vaemaku ki takuiê, suria inê kê agana, kê kasi manavaku, hanana vi gê mauri aporo.

¹⁸I asa ta na enoni, vi ge nahuiê be me, manga vi inê, ma kê pe hagamarumungenia. Inê mareku kê aganaria na mera. I oto tangê, vi gê meme, ma ki oto tangê nikâ, vi gê mauri aporo. Na tarana ngekana ki na tarana, o Vaemaku i bani naka tangê.”

¹⁹Ma nikâ na tamasinga ngegana ka katora na Siu, ka hetuguri so mareta.

²⁰Rako na hitangita ka vi, vi: “Ngaia ki atataroga! Ngaia ki beka! Tanu hega kanimu karinga.”

²¹Ma tani ka vi: “E, ge vora re na mane, ge atataroga, ngaia ki asa, vi ge tamasi vikana! Tanu hega na ataro kani vi girara, i hagamaravagi na maata na enoni, ga guru taropuru?”

²²Na enoni i Jerusaleme ka hagarahasia na tangiana raha na hagapunariana na Ruma ni Rotu. Na matena ngekana ki na rogaroga ahuru.

²³O Jesu ki arârâ igê na ruhu iana o Solomone, i bâsigu na Ruma ni Rotu.

²⁴Na Siu ka hakuria me, ma ka vi: “Se, tanu hega go hagababegami? Gu visia mataha me, vi igo nga ka na Mesaia se mareha?”

²⁵O Jesu ki arami, ki vi: “Inê kê bani visia tangagamu, ma igamu kamu pe tongesuriê. Na tagaraha, gê tanugi inê, o Vaemaku ki hagatorê renigi, ma na tagaraha ngegana ka hagatanga monari reniê.

²⁶Ma igamu, igamu kamu usi, vi gamu tongesuriê, suria igamu kamu pe bâ mangara vi na sipi iaku.

²⁷Na sipi iaku ngaira ka têtê viteaku. Inê kê aitangisira, ma ngaira ka tari suriê.

²⁸Inê kê vatera na mêriha mora ma tarema, ma ngaira ki asa hagetage, vi ge page me, ma ki asa ta na enoni ge girara, vi ge tahurara râ teniê.

²⁹Na ani getera hato ka pe maratorata na ani, o Vaemaku i bani vateê renira, ma ki asa ta na enoni, ge girara, vi ge tahurara râ tenia o Vaemaku, i marupera.

³⁰O Vaemaku menê kamuru na vere tage togo ma.”

³¹Nikâ na Siu ka tavo na hê, hanana vi ga arihahunia renigi.

³²O Jesu ki vi tangara, ki vi: “Igamu kamu bani bâsigi rako na tagaraha koro, gê katogi. O Vaemaku ki bani hagatorê renigi, kê katogi. Ma na ani ta na hitangini kani mu obania, vi gamu arihahuniê renia?”

³³Na Siu ka arami bê aporo, ka vi: “Igami kami obania, vi gami arihahunigo, mareha vi surigi na tagaraha koro, go katogi, ma suria hete igo ko tamasi erasia God. Na enoni ma kanigo igo, ma ko visigo maremu, vi go God.”

³⁴O Jesu ki arami, ki vi: “Igê na Buka na Ramata iami God ki vi, ‘Igami kamu god.’

³⁵Igia ka bani girara, vi na Buka Apuna ki asa hagetage, vi ge hagaparu. Ma God ki hêtata na enoni ngegana, vi god, na enoni, God i bani hagarongora renia na taroha iana.

³⁶Ma tangê inê, o Vaemaku ki ateê, ma ki hagatorangeniê i maveta. Hoi, tanu hega, kanimu visiê, vi inê kê tamasi erasia God, suria vi gê vi, vi inê ki no Karena God?

³⁷Manga inê, ma kê pe katogi na tagaraha, i hagatorê renigi o Vaemaku, hoi, siana kamu tongesuriê.

³⁸Ma ki manga inê, ma kê katogi na tagaraha ngegana, henaka igamu kamu pe tongesuriê inê, igamu ki ararigamu ma hete, vigamu tongesuriê renigi na tagaraha iaku, hanana mu girara maninga nga, vi o Vaemaku menê kamuru obahaku manga na vere tage togo ma.”

³⁹Nikâ ngaira ka uhungia, vi ga ranguia ka hagatotongohia, ma ngaia ki gava tenira.

⁴⁰O Jesu ki reke tarê aporo igê na ve i Jotano tanga na agua, o Joane i bani hagabatesimo igê, ma ki oga i ngekana.

⁴¹Rako na enoni ga râ me tanga. Ngaira ka vi, vi: “O Joane ki pe katogi na mena, ma na ara ni marâ hato, i bani tamasigi renia na mane ngekana, ka monari.”

⁴²Ma ka rako na enoni i ngekana ga tongesuria.