Read Kahua JOANE 11 Bible Online

JOANE 11 - Kahua bible

JOANE 11

¹I ta na hinua i Betani ki oga igê ta na mane, ga hêtana vi o Lasaro. Ngaia ki maeha. I Betani ki na hinua iaterua ka hegoana ka Maria ma ka Mata.

²(Na ani ngekê ka Maria ki na ani, i ringia i ugana na Araha na marâ, i manga na suru, i sigini koro, ma ki taruhigi râ renigi na varehuna. O veogana ki no Lasaro, i maeha.)

³Ngairerua ka hegoana karu kasi tamasinga tanga o Jesu, karu vi: “Araha, na tamamu koro ki maeha.”

⁴Matena o Jesu ki rongo vikana, ngaia ki vi: “Na mera ngekana ki mareha, vi tanga ge meme renia o Lasaro, ma tanga hete vi hagabângenia igê na raramohana God, ma na tarana ngekana ki page hagabângenia nikâ igê na raramohana o Karena God.”

⁵O Jesu ki takuira na ahegoata ka Mata ma ka Maria mo Lasaro.

⁶Matena i tarahua na tamasinga, vi o Lasaro ki maeha, ngaia ki oga ma vê i na agua, i oga igê, suria na tangiana gi rua nikâ.

⁷Ma hemuri ngaia ki kahu vi tangara na kariana, ki vi: “Nika, ge aporo tanga i Jutea!”

⁸Na kariana ka arami, ka vi: “E, Rabai, i na kere matena i hato, na enoni i ngekana ka obania, vi ga arihahunigo. Tanu hega kanigo obania, vi go aporo râ nikâ?”

⁹O Jesu ki vi: “Na mavetana na tangiana ki nahunigi na mateni tangahuru matarerua, iê? Hoi, manga na enoni, ma ki arâ igê na mavetana na tangiana, ngaia ki asa, vi ge tapasu, suria na marara i maveta ikê ki mavesia.

¹⁰Manga vi ngaia, ma ki arâ igê na bungiana, ngaia ki tapasu, suria ngaia ki pe nahunia na marara.”

¹¹Matena i tamasi hato vikê o Jesu, ma ki vi nikâ: “Na tamaka o Lasaro ki mêru bore; be râ be hagaritea.”

¹²Na kariana ka arami, ka vi: “Araha, manga vi ngaia, ma ki mêru, ngaia ki page tahi nge.”

¹³O Jesu ki tamasi renia, vi o Lasaro ki me, ma ngaira ka takusia ma, vi tamasi renia, vi o Lasaro ki mêru.

¹⁴Tahema o Jesu ki tamasi mataha tangara, ki vi: “O Lasaro ki bani me.

¹⁵Ma ki koro na obaku, suria inê kê pe oga henia, hanana vi na tarana ngekê ke tamanigamu, kamu tongesuriê. Nika, ge râ i pasina.”

¹⁶O Toma (ga hêtana vi Karepapa), ki vi tangara na tamana, ki vi: “Nika, ge râ henia na Araha, ke me henia.”

¹⁷O Jesu, matena i sugi ata râ noga, ngaia ki tarahua, vi o Lasaro ka bani bagia, ga hato huria noga na tangiani ge he.

¹⁸I Betani ki hagarangia ma i Jerusaleme,

¹⁹ma ka rako na enoni ni Jutea, ga râ me ka bâsirerua ka Mata ma ka Maria, hanana vi ga haganaku parongaterua, suria i me o veogaterua.

²⁰Matena ka Mata ki rongoa, vi o Jesu ki sugi ata me, ngaia ki hura vê, ki râ vurusia. Ma ka Maria ki oga so ma i ruma.

²¹Ka Mata ki vi tanga o Jesu, ki vi: “Araha, manga vi gu bani oga ikê, vikê o veogaku ki asa, vi ge me!

²²Ma ki henaka i manga ngekana, inê kê girara, vi God ki page vatego na ani mavê na mara, go nungia tenia.”

²³O Jesu ki vi tanga, ki vi: “O veogamu ki page mauri aporo.”

²⁴Ma ka Mata ki vi: “Inê kê bani girara, vi ngaia ki page mauri aporo igê na hagahato tangiani.”

²⁵Mo Jesu ki vi tanga, ki vi: “Inê nga ki na ani, gê hagamaurira aporo na enoni, ma kê vatera na mauriha mora. Na enoni, i tongesuriê, ki page mauri, henaka vi na apena ki meme.

²⁶Ma na enoni, i mauri ma ki tongesuriê, ngaia ki asa, vi ge page me. I hega, igo ko tongesuria vari na tarana ngekana?”

²⁷Ma ngaia ki arami, ki vi: “Ua, Araha, inê kê tongesurigo, vi igo ki na Mesaia, o Karena God, ga bani visia, vi page arâ me i maveta.”

²⁸Matena ka Mata ki tamasi hato vikana, ngaia ki aporo i ruma, ma ki hahanatea ka Maria, ki vi: “Na Araha ki râ me ma ki unigo.”

²⁹Matena ka Maria ki rongo vikana, ngaia ki hata ni aharaga ki hura vê, ma ki râ vurusia.

³⁰(O Jesu ki mamênga, vi ge vagavaga me i hinua, ma ki goga mênga vê igê na agua, i tarahua vê igê ka Mata.)

³¹Na enoni ka goga i ruma henia ka Maria, hanana viga haganaku parongana. Matena ga bâsia, i hatani aharaga ma ki hura vê ki râ, ngaira ka râ suria. Suria ngaira ka takusia ma, vi ngaia ki arâ tanga na matiku, vi angengi maramara igê.

³²Matena i mataro râ ka Maria igê na agua, i oga igê o Jesu, ngaia ki bâsia o Jesu. Ngaia ki susure ototo râ tanga, ma ki vi: “Araha, manga vi gu bani oga ikê, o veogaku ki asa, vi ge me.”

³³O Jesu ki bâsia i angiangi, ma ki rigira, ga angiangi nogata na enoni, ga râ me henia. Ngaia ki era na obana, ma ki hataera.

³⁴Ngaia ki hagatera, ki vi: “I he kanigamu bagia igê?” Ngaira ka arami, ka vi: “Araha, râ me ku bâsia.”

³⁵O Jesu ki angi.

³⁶Vikê na Siu ka vi: “Bâ, ngaia ki takuia bâraha ngavê!”

³⁷Ma tani na hitangita ka vi: “Ngaia vari kani hagamaravagi na maana na mane, i guru taropuru ea, iê? I bara tanga vari, vi ge urapusia na mera tenia o Lasaro?”

³⁸O Jesu ki hataera nikâ na obana, ma ki râ tanga na matiku. Na matiku ki na vaba, ma ka purusia renia na bagahê raha.

³⁹O Jesu ki vi: “Purisia râ na hê akana!” Ma ka Mata, kesina na mane i me, ki arami, ki vi: “E, Araha, ngaia ki bani mapu! Igami kami bagia, ka bani hato huria noga na tangiani ge he!”

⁴⁰O Jesu ki vi tanga, ki vi: “Na ta gê bani visia tangago? Igo ko page bâsia na raramohana God, manga vi igo ma ko tongesuriê.”

⁴¹Na enoni ka purisia râ na hê. Mo Jesu ki atakê, ma ki vi: “Vaemaku, inê kê visigo koro, suria go aganarigi tare na nunginungiha iaku.

⁴²Inê kê bani girara, vi igo ko aganarigi tare na nunginungiha iaku. Inê kê tamasi vikê, hanana vi ngaira na enoni ga ura ikê ka page tongesuria, vi igo nga kanigo hagatorangeniê.”

⁴³Matena i nunginungi hato vikana, ngaia ki ngere raha, ki vi: “Lasaro, hura me!”

⁴⁴Na mane, i me, ki hura me. Na rimana ma na êgana ka baraigi renigi na gahu ni bagi nuni, ma ta na gahu ka baraia renia na maana. O Jesu ki vi tangara na enoni, ki vi: “Mu rupasia, ke tatara na apena.”

⁴⁵Rako na enoni, ga râ me ka vatugia ka Maria, ngaira ka rigia na tarana, i katoa o Jesu, ma ka tongesuria.

⁴⁶Ma tani na hitangita ka aporo i pasita na Pariseo, ma ka hagarongora renia na tarana, i katoa o Jesu.

⁴⁷Tahema na Pariseo ma na mane ni vogasiha ga teha ma na Kaunselo ka haku ma ka hekarigi, ka vi: “Hoita, ga katokato hega? Ngaia ki katogi rako na mena.

⁴⁸Manga vi igia, ma ka naka mavê, na ara ni enoni hato ka page tongesuria, ma na Ai ni Roma ka page arâ me, ma ka page hogea na Ruma ni Rotu iaka, ma ka page erasira na kariaka hato!”

⁴⁹O Kaiapa, na hitangita, ngaia na mane ni vogasiha ga teha, ngaia ki vi: “Igamu, igamu kamu tako makira ngavê!

⁵⁰Mu takotako maninga! I koro ngavê tangagamu, vi na vere tage na mane ki meme urusira na enoni, hanana siana ka meme na enoni hato!”

⁵¹(Na tamasinga, i visia, ki mareha vi na takotako iana marena. Ma suria ngaia ki mane ni vogasiha i teha suria na harisi ngekana, ngaia ki hinarua hete, vi o Jesu ki page meme tangara na Siu.

⁵²Ma ki mareha, vi tangara ma ngaira getera, ma tangara nikâ hete na kariana hato God, ga oga totoko, hanana i hagahakura igê na haku gi tage.)

⁵³Haganega tenia na tangiana ngekana, na meraha i pasita na Siu ka kato, vi ga nanahuia o Jesu ki meme.

⁵⁴Tahema o Jesu ki pipinihia marena i berarogata tenira na enoni i Jutea, ma ki râ tanga na agua hagarangia na bagamasusu raha, igê na hinua i Eparaimi; ma ka oga i ngekana ngaia ma na kariana.

⁵⁵Na Tangiana Raha na Paseka iata na Siu ki ata me noga, ma ka rako na enoni tenigi na hinua ga akê i Jerusaleme, hanana ga katogi igê na tauha igê na rotu, ga katora, ka matarotaro hagenago, ma ki kahu mataro me na Tangiana Raha.

⁵⁶Ngaira ka bâbâ renia o Jesu, ma na matena ga haku i Ruma ni Rotu, ngaira ka hehagateri, ka vi: “Na ta mu takusia? Ngaia ki page arâ me vari tanga na Tangiana Raha, se mareha?”

⁵⁷Na mane ni vogasiha ga teha ma na Pariseo ka bani vi, vi: “Manga ta na enoni, ma ki girara na agua, i goga igê o Jesu, ngaia ki tuguhia, i hagarongogami renia, hanana mi rakua.”