Read Kahua JOANE 12 Bible Online

JOANE 12 - Kahua bible

JOANE 12

¹Na tangiani ge ono i nago tarana na Paseka o Jesu ki râ i Betani, na hinua iana o Lasaro. Ngaia ki na mane, o Jesu i bani hagamêria aporo.

²Tani na enoni i ngekana ka bani hagamako na kere ngêra tanga o Jesu, ma ka Mata ki voto ngêra, matena o Lasaro mo Jesu karu oga so tanga na ngauha.

³Ma hemuri ka Maria ki tavoa na pi, i vunu renia na marâ, i sigini koro ngavê, ma ki raha bâraha na mena. Ngaia ki na tavona na rauga, ma ki ringia igê na êgana o Jesu, ma ki taruhigi renigi na varehuna. Na vanuhana na marâ, i sigini koro, ki râhia na ruma hagenani.

⁴O Juta Isikariote, na hitangita na kariana o Jesu, ngaia ki na ani, i page hagavuringenia o Jesu, ngaia ki vi:

⁵“I hega, ge pe hagavuringenia ma na marâ, i sigini koro akê renia na haga na meni na tagaraha surigi na tangiani tangarê gi oru, ma ke tamanira re na enoni matareha?”

⁶Ngaia ki tamasi vikana, mareha vi suria ngaia ki tako renira na enoni, ga matareha, ma suria hete ngaia ki na mane hanago. Ngaia ki bâsuria na anga ni haga, ma tani na matena ngaia ki tavotavo ma tani na haga tanga ngaia marena.

⁷Mo Jesu ki vi: “Naka vê! Ngaia ki bani naka tanga na tangiana, ga bagiê igê.

⁸I pasimi ka gâga tare igê na enoni, ga matareha, ma tangê inê, inê kê pe gâga tare i pasimi.”

⁹Rako vê na enoni ga rongoa, vi o Jesu ki gâga i Betani. Tahema ngaira ka râ i ngekana. Ngaira ka râ i ngekana, mareha vi renia ma o Jesu, ma renia nikâ hete ga obania, vi ga bâsia o Lasaro, na mane o Jesu i bani hagamêria aporo.

¹⁰Ngekana na mane ni vogasiha ga teha ka kato, vi ga nanahuia nogana o Lasaro ki meme.

¹¹Ngaira ka kato vikana, suria ga rako na Siu, ga hura tenira na meraha iata, ma ka tongesuria o Jesu renia o Lasaro.

¹²Igê na tangiana ni muri rako ngavê na enoni, ga râ me tanga na Tangiana Raha na Paseka, ka rongo, vi o Jesu ki sugi ata me i Jerusaleme.

¹³Tahema ngaira ka têgi na arani na nini, ma ka hura vê vurusia. Ngaira ka ngerengere, ka vivi: “Hosana! Ka visia raha God! Araha God, gu tamania na ani, i râ me igê na raramohamu. God, gu tamania na maneraha iata Isiraelita!”

¹⁴O Jesu ki tarahua na bêhâgana na tonki, ma ki tagiria. Ngaia ki kato vikana, suria na Buka Apuna ki bani vi:

¹⁵“Siana kamu magu, igamu na Ai ni Sione! Bâ, na maneraha iami ki râ me, i tagiria na bêhâgana na tonki.”

¹⁶Igê na matena ngekana na kariana ka pe rongogirara na girarana, ma hemuri ma, matena o Jesu ki bani mêri aporo ma ki araha, ngaira ka kahu takusia aporo, vi na Buka Apuna ki bani visia na tarana ngekana, ma ngaira ka bani kato vikana tanga.

¹⁷Na enoni, ga oga henia o Jesu, matena i unia hura me o Lasaro tenia na matiku, ma ki hagamêria aporo, ngaira ka bani tokorenia na taroha ngekana.

¹⁸Tahema na enoni ka râ vurusia, suria ngaira ka bani rongoa, vi ngaia ki katoa na mena ngekana.

¹⁹Na Pariseo ka hetamatamasia so mareta, ka vi: “Bâsia, i bara tangagia nga! Bâ, na ara ni enoni hato ka râ suria!”

²⁰Tani na enoni, ga pe Siu ma ka râ me tenia i Helasi, ka torarira na enoni, ga akê i Jerusaleme, hanana vi ga rahesia God igê na Tangiana Raha.

²¹Ngaira ka râ i pasina o Pilipo ni Betesaita i Galilea, ma ka vi tanga, ka vi: “Oi, igami kami obania, vi gami bâsia o Jesu.”

²²O Pilipo ki râ ma ki hagarongoa o Anterea, ma ngairerua karu râ me karu hagarongoa o Jesu renira.

²³O Jesu ki aramirerua, ki vi: “I ngekê ki râ me na matena tanga o Karena Enoni, hanana vi God ki kasia akê igê.

²⁴I monari, be vi tangagamu; na maana na koni ki gâga na maana gi tage ma, manga vi ga pe hasia ke meme, hanana vi ge baogo. Manga i meme, hanana vi baogo, ngaia ki hunguhungu ka rakorako na maani.

²⁵Na enoni, ma ki takusia so ma marena, ngaia ki page têtê tara renia na mêrihana. Ma na enoni, i takusira ma na enoni getera i maveta ikê, ngaia ki asa vige page tê tara renia na mêrihana, ma ki page nahunia hete na mauriha mora ma tarema.

²⁶Na enoni, i obania, vi voravora re na kariaku, ki tuguhia, i arâ suriê, hanana i page gâga heniê igê na agua, gê gâga igê, suria ngaia ki na kariaku. O Vaemaku ki page kasia akê na kariaku.

²⁷“I ngekê ki hataera na obaku. Na ta be visia? Be vi vari, ‘Vaemaku, siana ko hagamarumungenia na matena na mamasiaganiha ngekê, ki tarahuê’? Mareha. I asa, suria tahema inê kê râ me i maveta, hanana gê hatamigi na mamasiaganiha.

²⁸Vaemaku, gu hagabângenia na raramohamu raha!” Ma tenia na vavearo God ki tamasi, ki vi: “Inê kê bani hagabângenia, ma kê page hagabângenia aporo nikâ.”

²⁹Na enoni, ga oga i ngekana, ka rongoa na ringena, ma ka bagatatako, ka vi: “E, na akurua!” Ma tani ka vi: “Na angero kani tamasi tanga.”

³⁰Mo Jesu ki tamasi tangara, ki vi: “Ngaia ki pe tamasi, hanana vi ge tamaniê, inê, ma ki tamanigamu, igamu, hete.

³¹I ngekê ki na matena, God i page surira igê na enoni i maveta. I ngekê God ki page paia igê na ani, i marungia na maveta.

³²Matena ga bani rageê akê tenia na maveta, inê kê page katora na enoni hato, ka arâ me tangê.”

³³(Matena ngaia ki tamasi vikana, ngaia ki tamasi renia na tarana na mera, na ani ngaia i page meme renia.)

³⁴Na enoni ka arami bê aporo, ka vi: “Na Buka Apuna ki bani vi, vi na Mesaia ki gâga tare ma tarema. Tanu hega kanigo vi, vi o Karena Enoni ki arari, vi ga ragea akê? O ti ka no Karena Enoni?”

³⁵O Jesu ki arami, ki vi: “Na kere matena abubu mênga, na marara ki gâga henigamu. Mu ama ni arâ nga, matena i tangitangi mênga, hanana siana ki bungisigamu, suria na enoni, i arâ igê na roto hono, ki pe girara, vi i he kani arâ igê.

³⁶Mu tongesuria na marara, matena i gâga mênga henigamu, hanana igamu kamu voravora re na kariana na marara.” Matena o Jesu ki tamasi hato vikana, ngaia ki râ vê igê na agua, i pinihi tenira.

³⁷Henaka vi ngaia ki bani katogi na mena hato ngegana, ka bâsigi re maata, ma ngaira ka pe tongesuria.

³⁸Na tarani ngegana ka vora me, hanana ga hagamonaria na tamasinga iana na poropete o Isaia, i vi: “Araha, ti ki tongesuria na taroha iamami? Na Araha ki hagabângenia na raramohana tangara ma va ti?”

³⁹Tahema i bara tangara, vi ge tongesuria. Renia o Isaia ki vi vikê nikâ, ki vi:

⁴⁰“God ki katora ki guru na maata, hanana ga pe marava na maata. Ma ngaia ki katora ki bono na obata, hanana ga pe rongorongogirara, i era ma ka aporo me tangê, hanana vi gê hagakorora aporo.”

⁴¹O Isaia ki tamasi vikê, suria ngaia ki bani bâsia râ na raramohana o Jesu, ma ki tarohenia.

⁴²Henaka i manga ngekana, ma na meraha rako iata na Siu ka tongesuria o Jesu, ma ki suria ngaira ka magutenira na Pariseo, tahema ngaira ka pe tamasia mave rârâ, suria ngaira ka takusia, vi i era ma ka paira hura tenia na rotu.

⁴³Ngaira ka takusia bâraha ma vi na enoni getera, ke visira raha, ma ka pe takusia hete, vi God kani visira raha.

⁴⁴O Jesu ki tamasi raha, ki vi: “Na enoni, i tongesuriê, ki pe tongesuriê ma inê, ma ki tongesuria nikâ hete na ani, i hagatorangeniê.

⁴⁵Na enoni, i bâsiê, ngaia ki bâsia nikâ na ani, i hagatorangeniê.

⁴⁶Inê kê râ me i maveta, kê mavesigi na aitangihata na enoni, hanana vi na ara ni enoni, i tongesuriê, ki pe ama ni gâga nga igê na roto hono.

⁴⁷Manga ta na enoni, i rongoa na taroha iaku, ma ki pe arâ suria, inê kê pe suria kê hagaitangia. Renia inê kê râ me i maveta, mareha vi tanga ve surira kê hagaitangira na enoni i maveta, ma kê hagatahira hete.

⁴⁸Manga ta na enoni, ma ki usiteniê, ma ki pe râ suria na taroha iaku, ta na marâ ki gâga tanga, hanana i page suria ki hagaitangia igê na hagahato tangiani.

⁴⁹Hoi, na tamasinga, gê visigi, ka mareha vi na tamasinga iaku mareku inê. Inê kê visigi, ma kê tamasigi ma hete na marâ, na Vaemaku, i hagatorangeniê, i bani hagatorê renigi o Vaemaku i hagatorangeniê.

⁵⁰Ma inê kê bani girara, vi na ramata iana ngekana ki katora na enoni, ka nahunia na mauriha mora ma tarema. Hoita, na marâ, gê visigi, ngaigi ka na marâ, o Vaemaku i bani hagatorê renigi, hanana gê visigi.”