Read Kahua JOANE 13 Bible Online

JOANE 13 - Kahua bible

JOANE 13

¹Igê na tangiana i nago tarana na Tangiana Raha na Paseka. O Jesu ki bani girara, vi na matena iana ki râ me tanga, hanana vi pania na maveta ikê, ma ki aporo i pasina Vaemana. Ngaia ki takuira tare na kariana i maveta, hanana vi ngaia ki meme, ma ngaia ki ama ni takuira nga, ki bê ki arâ.

²I manurahi. Mo Jesu ma na kariana ka ngê haku. Satana ki bani hagatakusia o Juta, o karena o Simone Isikariote, hanana vi hagavuringenia o Jesu.

³O Jesu ki bani girara, vi o Vaemana ki bani kasia, hanana vi marungira na ara ni marâ hato. Ngaia ki bani girara, vi ngaia marena ki bani râ me tenia God, ma ki page aporo i pasina God.

⁴Tahema, matena ga ngêngê, ma ngaia ki aharaga. Ngaia ki tasia râ na tuguni iana, ma ki hugusia marena renia na gahu.

⁵Ma hemuri ngaia ki karangia na ve igê na apira, ma ki haganega ki tananigi na êgata na kariana, ma ki taruhigi renia na gahu, i hugusia marena renia.

⁶Rârâ ki râ me tanga o Simone Petero. Mo Petero ki vi: “Araha, igo na Araha, igo ko obania, vi go tananigi na êgaku?”

⁷O Jesu ki arami, ki vi: “I ngekê igo ko pe tako mataha mênga renia na tarana, gê katoa, ma i hemuri me igo ko page takotako mataha renia.”

⁸O Petero ki vi tanga, ki vi: “Mareha vê! I pe ararigo, vigu tananigi na êgaku!” O Jesu ki arami, ki vi: “Manga inê, ma kê pe tananigi na êgamu, igo ko hatohato vi na kariaku.”

⁹O Simone Petero ki arami, ki vi: “Araha, manga ngekê, hoi, gu tananigi nikâ na êgaku, ma na rimaku, ma na bêku!”

¹⁰O Jesu ki vi: “Na enoni, i bani mamanu, ki matarotaro na apena hagenani, nga noga ma na êgana, ma ki pe arari, vi ge manu aporo nikâ. Igamu hato kamu matarotaro, nga noga ma na ani gi tage togo na hitangimi.”

¹¹(O Jesu ki bani girara na ani, i page hagavuringenia. Tahema ngaia ki vi: “Igamu hato kamu matarotaro, nga noga ma na ani gi tage na hitangimi.”)

¹²Matena o Jesu ki tananigi hato na êgata, ngaia ki tuguni aporo renia na tuguni iana, ma ki oga so aporo igê na atohana, ki ngê. Ngaia ki hagate, ki vi: “Igamu kamu tako mataha vari renia na tarana, gê kahu tanua râ i kini?

¹³Igamu kamu visiê, vi inê ki na mane ni hagesuringa, ma kê Araha. Igamu kamu vi koro reniê, suria inê nga.

¹⁴Inê nga, na Araha iami ma na mane ni hagesuringa iami, inê gê kahu tananigi râ ma na êgami i akê. Hoita, i tuguhigamu, mu tananigi heri nogami na êgami.

¹⁵Inê kê naka na hagesuringa tangagamu, hanana mu katoa nogami na tarana, i tagenana manga na tarana gê bani katoa râ akini tangagamu.

¹⁶I monari, be vi tangagamu: na kare vurivuri ki pe teharia ngavê na avanuna. Ma na ani, i totora tamasinga, ki pe teharia ngavê na ani, i hagatorangenia.

¹⁷I ngekê igamu kamu girara na tarana ngekê. I ngekana igamu kamu babarisi, manga vi igamu ma kamu tanua vikana!

¹⁸“Inê kê pe tamasi renigamu igamu hato. Inê kê bani girarara, vi na ani ta na enoni, kê bani atera. Ma ki arari, ga hagamonarigi na tamasinga, i bani visigi na Buka Apuna, i vi, ‘Na mane, i meêbêrihu, kani merongasiê.’

¹⁹I ngekê inê kê bani visia tangagamu i nago, ma hemuri ki kahu voravora me, hanana, na matena i voravora me, igamu kamu page tongesuria, vi ‘Inê nga Inê’.

²⁰I monari, be vi tangagamu: na enoni, i unia banu na ani, gê hagatorangenia, ngaia ki uniê banu nogaku inê; ma na ani, i uniê banu inê, ngaia ki unia banu nogana na ani, i hagatorangeniê.”

²¹Matena o Jesu ki bani tamasi hato vikana, ngaia ki hataera na obana, ma ki tamasi mataha, ki vi: “I monari, be vi tangagamu: ta na hitangimi ki page hagavuringeniê.”

²²Na kariana ka hesirasire, ma ka tako makira, vi o ti kani visia ngekana.

²³Ta na kariana ki ngahisia o Jesu. Ngaia ki na ani, o Jesu i takuia bâraha.

²⁴O Simone Petero ki rengasi maa tanga, ma ki vi: “Hagatea ti kani visia ngekana.”

²⁵Ngekana na kariana ngekê ki maroro râ tanga o Jesu, ma ki hagate, ki vi: “Ti nga, Araha?”

²⁶O Jesu ki arami, ki vi: “Na ani, gê onomia na apigana na bereti igê na apira ma kê vatea, ngaia nga.” Ngekana ngaia ki têa na apigana na bereti, ma ki anomia igê na apira, ma ki vatea o Juta, o karena o Simone Isikariote.

²⁷Matena o Juta ki tavoa na bereti, Satana ki angaria ototo râ. O Jesu ki vi tanga, ki vi: “Gu râ nga. Ku katoa na tarana, go bani gunahia!”

²⁸(Na ani getera na kariana, ga ngêngê i ngekana, ka bagatatako, suriê hega kani tamasi o Jesu vikana tanga.

²⁹O Juta ki na mane, i bâsuria na anga ni haga. Tahema tani na kariana ka vi ma, vi o Jesu ki bonasia, hanana vi arâ, ki vurivuri na marâ, ga obanigi tanga na Tangiana Raha, se hanana vi vatera na enoni, ga matareha, tani na haga.)

³⁰O Juta ki tavoa na bereti, ma ki hura vê ototo râ ki râ. Ma ki bani roto hono.

³¹I murina ki bani râ o Juta, o Jesu ki vi: “I ngekê na enoni ka sugi rigia na raramohana o Karena Enoni. Ma ngaia ki sugi hagabângenia na raramohana God.

³²Manga vi ngaia, ma ki hagabângenia na raramohana God, i ngekana God ngaia marena ki page hagabângenia na raramohana o Karena Enoni, ma ki sugi hagabângenia ototo râ nga.

³³Goaku, suria ma na kere matena abubu inê kê gâga henigamu mênga. Igamu kamu page bâbâ reniê. Ma i ngekê be visia tangagamu na marâ, gê bani visia tangara na meraha iata na Siu, kê vi, ‘Igê na agua, gê page arâ igê inê, ki bara tangagamu, igamu, vi gamu râ vê igê.’

³⁴Hoi, inê kê vategamu na ramata haoru: mu hetakuiheri. Tagenana manga inê gê takuigamu, ki tuguhigamu nogami, mu hetakuiheri.

³⁵Manga igamu, ma kamu hetakuiheri, i ngekana na enoni hato ka page giraragamu, vi igamu ki na kariaku.”

³⁶O Simone Petero ki hagatea o Jesu, ki vi: “Araha, i he kanigo arâ igê?” O Jesu ki arami, ki vi: “I bara tangago i ngekê, vi gu râ me suriê igê na agua, gê page arâ tanga inê, ma i hemuri me igo ko page arâ me suriê.”

³⁷O Petero ki hagatea, ki vi: “Araha, tanu hega kani bara tangê, vi ge arâ surigo i ngekê? Inê kê nanê, vi gê meme, hanana gê tamanigo!”

³⁸O Jesu ki arami, ki vi: “I monari vari, vi igo ko nanê, hanana vi go meme tangê? I monari, be vi tangago: matena na kua mane ki mamênga, vi ge hagarite, ma igo ko bani hagaiga pusigo maremu hageoru reniê.”