Read Kahua JOANE 14 Bible Online

JOANE 14 - Kahua bible

JOANE 14

¹O Jesu ki vi tangara na kariana, ki vi: “Siana ki hataera na obami. Siana kamu anumanuma. Mu hagêguritogo renia God, ma kamu hagêguritogo reniê nogaku.

²I ruma iana o Vaemaku ka rako ngavê na kiboru, ma inê kê arâ, hanana gê hagarêgi na agua tangagamu. Manga vi ge pe monari, i asa ma, be visia tangagamu.

³Matena gê arâ, kê hagarêgi hato na agua tangagamu, inê kê page aporo me, ma kê toregamu i pasiku, hanana igamu kamu page gâga igê na agua, gê gâga igê inê.

⁴Igamu kamu bani girara na tara tanga na agua, gê page arâ igê inê.”

⁵O Toma ki vi tanga, ki vi: “Araha, igami kami pe girara na agua, go page arâ igê igo. Manga i he kani vigami girara na tara, i arâ tanga i ngekana?”

⁶O Jesu ki aramia, ki vi: “Inê nga ki na tara, i hagabângenia na monariha renia God, ma ki vatera na enoni na mauriha mora. I asa ta na enoni, vi ge râ tanga o Vaemaku, manga vi ngaia ma ki pe arâ suriê inê, suria inê geteê ma ka na tara tanga i pasina o Vaemaku.”

⁷Ngaia ki vi tangara, ki vi: “Hoi, suria igamu kamu bani aitangisiê, igamu kamu page aitangisia nogana o Vaemaku. Ma tenia i ngekê igamu kamu bani aitangisia ma kamu bani bâsia.”

⁸O Pilipo ki vi tanga, ki vi: “Araha, gu hagabâsigami renia o Vaemamu. Ngaia ma ngekê.”

⁹O Jesu ki arami, ki vi: “I arihu me noga inê kê bani oga henigamu. Pilipo, tanu hega kanigo pe aitangisiê? Na enoni, i bani bâsiê inê, ngaia ki bani bâsia nikâ o Vaemaku. Tanu hega kanigo vi, ‘Gu hagabâsigami renia o Vaemamu.’

¹⁰Pilipo, igo ko pe tongesuria vari, vi inê ma o Vaemaku kamuru obahaku, ma igamirua kamuru manga na vere tage togo ma?” O Jesu ki tamasi tangara na kariana, ki vi: “Na tamasinga, gê bani visigi tangagamu, ngaigi ki mareha vi na tamasinga iaku mareku inê. Ngaia marena o Vaemaku, i obahaku heniê ma ki ama ni gâga nga heniê, ngaia kani katogi na tagaraha iana reniê inê.

¹¹Mu tongesuriê, matena gê vi, vi inê ma o Vaemaku kamuru obahaku, ma igamirua kamuru manga na vere tage togo ma. Manga mu pe tongesuria na tarana renigi na tamasinga iaku ngekê, hoi, mu tongesuria renigi na tagaraha iaku.

¹²I monari, be vi tangagamu: na enoni, i tongesuriê, ki page katogi nogana na tagaraha, gê katogi inê; hoi, ma ki page katogi na ani raha ngavê, suria inê kê aporo i pasina o Vaemaku.

¹³Manga mu obâbahaku heniê, inê kê page aganarigi na ani mavê na marâ, mu nungigi, hanana o Karena ki page hagabângenia na raramohana o Vaemana.

¹⁴Manga mu obâbahaku heniê, inê kê page aganarigi na ani mavê na marâ, mu nungigi teniê.

¹⁵“Manga mu takuiê, mu marupegi na ramata iaku.

¹⁶Inê kê page nungia o Vaemaku, hanana i vategamu na urusiku, ki tamanigamu, ma ki page gâga henigamu tare.

¹⁷Ngaia ki na Higona Apu, i hagabângenia na monariha renia God. I bara tangara na enoni i maveta, vi ge hagamarumungenia, ke angarira, suria ngaira ki asa, vi ge bâsia, se vi ge aitangisia. Ma tangagamu igamu, kamu aitangisia, suria ngaia ki gâga henigamu tare, ma ki angarigamu.

¹⁸“Matena gê arâ, inê kê pe mumu vê tenigamu. Inê kê page aporo me hete tangagamu.

¹⁹Na enoni i maveta ka sugia ma, vi ge pe bâsiê nikâ; ma nga noga ma igamu, igamu kamu page bâsiê. Ma suria inê kê mauri aporo, igamu nikâ kamu page mauri.

²⁰Igê na tangiana ngekana igamu kamu page girara, vi inê ma o Vaemaku kamuru obâbahaku manga na vere tage togo ma, ma inê megamu ka obâbahaku manga na vere tage togo.

²¹“Na enoni, i taugi na ramata iaku ma ki marupegi, ngaia ki na ani, i takuiê. Ma o Vaemaku ki page takuia na ara ni enoni, i takuiê inê. Ma inê nogaku kê takuia, ma kê katoa, ki aitangisiê.”

²²O Juta, (mareha vi o Juta Isikariote, ma o Juta na ani getea), ngaia ki vi: “Araha, tanu hega, kanigo page hagabângenia na raramohamu tangagami igami, ma ki mareha vi tangara na enoni i maveta?”

²³O Jesu ki aramia, ki vi: “Na enoni, i takuiê, ngaia ki arâ suria na hagesuringa iaku. O Vaemaku ki page takuia. Ma o Vaemaku menê kamuru arâ i pasina, ma kamuru gâga i pasina.

²⁴Na enoni, i pe takuiê, ngaia ki pe arâ suria na hagesuringa iaku. Ma na hagesuringa, mu bani rongoa, ki mareha vi na aniku inê mareku, ma na anina hete o Vaemaku, i hagatorangeniê.

²⁵“Inê kê bani vi tangagamu renigi na tarani ngegana i na matena, gê gâga mênga henigamu.

²⁶O Vaemaku ki page hagatorangenia me na urusiku. Ngaia ki na Higona Apu, i page tamanigamu, ma ki page hagesurigamu hato renigi na ara ni marâ hato, ma ki page hagatakusigamu renigi na ara ni marâ hato, gê bani visigi tangagamu.

²⁷“Na marapeha nga inê kê pania so henigamu. Na marapeha iaku mareku inê kê vategamu. Inê kê pe katogamu, kamu marape igê na tarana, na enoni i maveta ga katora re na enoni, ka marape. Siana ki hataera na obami. Siana kamu anumanuma, ma siana kamu magu.

²⁸Mu bani rongoê, gê vi tangagamu, kê vi, ‘Inê kê arâ, ma kê page aporo me tangagamu.’ Manga mu takuiê, mu vagevage renia vi inê kê aporo i pasina o Vaemaku, suria ngaia ki raha tehariê inê.

²⁹Hoita, be bani visigi tangagamu na tarani ngegana i ngekê, ma hemuri ka kahu voravora me, hanana mu tongesuriê renigi, matena ga voravora me.

³⁰Na matena, hanana ve megamu tamasi igê, ki abubu me noga, suria na ani, i marungia na maveta ikê, ki râ me noga, ma ki asa hagetage, vi ge marungiê.

³¹Hanana na enoni i maveta ka girara, vi inê kê takuia o Vaemaku, tahema gê katogi na ara ni marâ hato, i hagatorê renigi. “Aharaga! Ke hura vê, ke râ!