Read Kahua JOANE 15 Bible Online

JOANE 15 - Kahua bible

JOANE 15

¹“Inê nga ki na apinige na vaini mora, ma o Vaemaku ki na avanuna na mu ni apinige na vaini, ma ki tagara igê.

²Ngaia ki barugigi râ na ara ni araku, ga maria, suria ga pe hungu. Ma na ara ni araku, ga hunguhungu, ngaia ki uvegi, hanana ga pe heusuhi, ma ka page rasirasi na guani.

³Na hagesuringa iaku, gê bani vategamu, ki bani uvegamu.

⁴Mu ama ni gâga heniê nga inê, ma inê kê ama ni gâga henigamu nga igamu. Manga mu pe ama ni gâga nga heniê, ki asa iami, vi gamu page hagavorea ta na marâ. I tagenana ma manga na arana na apinige, ga bani retea râ, ma ki asa, vi ge page hungu.

⁵“Inê nga ki na apinige na vaini, ma igamu ki na arani. Manga na enoni, ma ki ama ni gâga nga heniê, ma inê kê ama ni gâga nga henia ngaia, ngaia ki hagavoregi rako na marâ koro. Manga inê, ma kê pe tamanigamu, igamu ki asa iami, vi gamu page hagavorea ta na marâ.

⁶Manga ta na enoni, ma ki pe ama ni gâga nga heniê, ngaia ki manga na arana, ga kasia râ ma ki maugu. Na arani, ga manga ngegana, na enoni ka ruguni haku, ma ka kasikasi igê na gi, ka makaka.

⁷Manga igamu, ma kamu ama ni gâga nga heniê, ma na tamasinga iaku ki ama ni gâga nga henigamu, mu nungia na ani mavê na marâ, mu obania tenia o Vaemaku, ma ngaia ki page vategamu.

⁸Manga igamu, ma kamu hagavoregi rako na marâ koro, ma igê na tarana ngekana ki na girarami, vi igamu ki na kariaku, igamu kamu hagabângenia na raramohana o Vaemaku.

⁹Tagenana ma, manga o Vaemaku i takuiê inê, inê nogaku kê takuigamu. Mu ama ni gâga nga heniê, hanana gê girara gê takuigamu. Mu ama ni gâga nga heniê, hanana gê girara gê takuigamu.

¹⁰Manga igamu, ma kamu marupegi na ramata iaku, mu ama ni gâga nga heniê, ma inê kê girara gê takuigamu. I manga inê, gê bani marupegi me na ramata iana o Vaemaku, ma kê ama ni gâga nga henia ngaia, ma ngaia ki takuiê.

¹¹“Inê kê bani visigi tangagamu na tarani ngegana, hanana i korokoro na obami igê na vagevageha, i tagenana manga inê, hanana mu vagevage teha ngavê.

¹²Ikê na ramata iaku: mu hetakuiheri, tagenana manga inê gê takuigamu.

¹³Manga ta na enoni, ma ki meme, hanana vi tamanira na tamana koro, na hetakuiha iana ki teha ngavê.

¹⁴Manga igamu, ma kamu tani na marâ, gê visigi tangagamu, igamu ka na tamaku koro.

¹⁵I ngekê ki hato, vi ve visigamu nikâ, vi na enoni tagara iaku, suria na enoni tagara ki pe girara râ na takotako iana na maneraha iana. Inê kê visigamu hete, vi na tamaku koro, suria inê kê bani visigi tangagamu igamu na ara ni marâ hato, gê rongogi tenia o Vaemaku.

¹⁶Ma igamu, igamu kamu pe ateê inê, ma inê nga kanigê ategamu igamu, ma kê hagatorangenigamu, kamu arâ, hanana mu hagavoregi rako na marâ koro, ga gâga tare. Tahema o Vaemaku ki page vategamu na ani mavê na marâ, mu nungigi tenia igê na raramohaku.

¹⁷Ngekana nga na tarana, gê bonasigamu renia: mu hetakuiheri!

¹⁸“Matena na enoni ni maveta ka merongasigamu, mu takusia tare, vi ngaira ka bani merongasiê inê hagenago.

¹⁹Manga vi igamu ki na enoni ni maveta, na enoni ni maveta ka takuigamu, suria igamu ka na tamata. Ma inê akê nga kê bani tavogamu hura igamu tenira na enoni ni maveta. Manga ngekana igamu kamu mareha vi na tamata. Tahema na enoni ni maveta ka merongasigamu.

²⁰Hoi, mu takusia aporo na marâ, gê bani visia tangagamu: ‘Na kare vurivuri ki pe teharia ngavê na avanuna.’ Suria ngaira ka merongasiê, tani ka page merongasigamu nogami. Suria tani ka tê viteaku, tani ka page têtê viteami nogami.

²¹Ma ngaira ka page katogamu vikana, suria igamu kamu obahaku heniê; renia ngaira ka pe hagarea na ani, i hagatorangeniê.

²²Manga vi inê, ma kê pe arâ me be tamasi tangara, na hagaitangiha na tasi ki asa, vi ge tarahura. Ma inê kê bani râ me, tahema ngaira ki asa, vi ge vi, ‘Igami kami pe girara, vi gami kami tasi.’

²³Na enoni, i merongasiê, ngaia ki merongasia nikâ o Vaemaku.

²⁴Manga inê, ma kê pe katogi i pasita na tagaraha, i mareha rârâ ta na enoni, vi ge katogi, na hagaitangiha na tasi ki asa, vi ge tarahura. Ma ngaira ka bani bâsigi na marâ, gê katogi, ma ngaira ka merongasigamirua o Vaemaku menê.

²⁵Na tarani ngegana ka vora me, hanana ga hagamonaria na tamasinga igê na Buka Apuna, i vi, ‘Ngaira ka merongasiê, mareha ngavê vi suria na marâ, i tonga hunana.’

²⁶“Tenia i pasina o Vaemaku inê kê page hagatorangenia me tangagamu na Higona Apu, i hagabângenia na monariha renia God. Ngaia ki arâ me tenia God, ma ki page tamanigamu, ma ki page taroheniê.

²⁷Ma igamu nogami, igamu kamu page taroheniê, suria igamu kamu bani oga me heniê, matena gê haganega kê hagesurira na enoni.