Read Kahua JOANE 16 Bible Online

JOANE 16 - Kahua bible

JOANE 16

¹“Inê kê tamasi tangagamu vikê, hanana siana kamu kasia na tongesuriha.

²Ngaira ka page paigamu hura tenia na rotu iata. Ma ki page arâ me na matena, na enoni, i nahuigamu kamu meme, i page takusia igê, vi ngaia ki tagara bâkoro tanga God, suria vi nahuigamu.

³Na enoni ka page katogamu vikana, suria ngaira ka pe aitangisigamirua, o Vaemaku menê.

⁴Inê kê tamasi tangagamu vikê, hanana, matena ga katogamu vikana, igamu kamu page takusigi aporo na marâ, gê bani visigi tangagamu agê. “Inê kê pe bani tamasigi na tarani ngegê tangagamu, matena gê haganega kê hagesurigamu, suria inê kê oga henigamu.

⁵Ma i ngekê inê kê aporo i pasina na ani, i hagatorangeniê. Ma ki mareha ta na hitangimi, vi ge hagateê, ke vi, ‘I he kanigo arâ igê?’

⁶Ma renia inê kê bani visigi tangagamu na marâ ngegana, igamu ki rugu bâraha na obami.

⁷Ma ki monari, be vi tangagamu: i koro ngavê tangagamu, vi inê kê arâ. Suria manga gê pe arâ, na Higona Apu, hanana vi tamanigamu, ki asa, vi ge râ me. Ma ki manga inê, ma kê arâ, hoi, inê kê page hagatorangenia me tangagamu.

⁸Ma na matena i arâ me, ngaia ki page hagatanga monari tangara na enoni ni maveta, vi i pe oto na takotako iata renia na tasi, renigi na marâ, ga koro ma ka oto i maana God, ma renia na suriha iana God.

⁹Igê na apanena na tasi, suria ngaira ka pe tongesuriê.

¹⁰Igê na apanena na marâ, ga koro ma ka oto i maana God, suria inê kê aporo i pasina o Vaemaku, ma ki asa iami, vi gamu ama ni bâsiê nga.

¹¹Igê na apanena na suriha: suria na ani, i marungia na maveta ikê, ka bani suria ka hagaitangia.

¹²“Rako era na marâ ka gâga mêngagi, hanana vi ve visigi tangagamu, ma i ngekê ki pe arari mênga na mauriha iami.

¹³Ma na matena na Higona Apu ki arâ me, ma ki page hagabângenia na monariha renia God, ngaia ki page hagagiraragamu renigi na ara ni monariha hato. Ngaia ki asa, vi ge visigi na takotako iana marena, ma ki page visigi hete na marâ, ga page voravora me.

¹⁴Ngaia ki page rongogi teniê, ma ki page hagarongogamu renigi. Ma igê na tarana ngekana ngaia ki page hagabângenia igê na raramohaku.

¹⁵Na ara ni marâ hato, i nahunigi o Vaemaku, ka na aniku. Tahema inê kê vi, vi na Higona Apu ki page visigi tangagamu na marâ, i rongogi teniê inê.

¹⁶“Igê na kere matena abubu ma igamu ki asa, vi gamu page bâsiê, ma igê na kere matena i hemuri igamu kamu page bâsiê nikâ.”

¹⁷Tani na kariana ka hehagateri, ka vi: “Na ta ka na girarana na marâ, i visia, suria i vi, ‘Igê na kere matena abubu ma igamu ki asa, vi gamu page bâsiê, ma igê na kere matena i muri igamu kamu page bâsiê nikâ? Ma na ta ka na girarana nikâ na tamasinga, i visia, ki vi, ‘I asa iami, vi gamu page bâsiê, suria gê arâ i pasina o Vaemaku’?

¹⁸Na ta ka na girarana na tamasinga, i visia, ki vi, ‘na kere matena abubu’? Igia ka pe girara na girarana na marâ, i visia.”

¹⁹O Jesu ki bani girara, vi ngaira ka obania, vi ga hagatea. Tahema ngaia ki tamasi tangara, ki vi: “Inê kê vivi, ‘Igê na kere matena abubu ki asa iami, vi gamu page bâsiê, ma igê na kere matena i muri igamu kamu page bâsiê nikâ.’ Nga na marâ mu hehagateri renia ngekana?

²⁰I monari, be vi tangagamu: igamu kamu page angiangi, ma kamu angengi maramara, ma na enoni ni maveta ka page vagevage. Ki page rugurugu na obami, ma hemuri ki page manava na obami.

²¹Matena na gete ki sugi apara, ngaia ki anumanuma, suria ngaia ki na matena iana, i hatamia igê na mamasiaganiha. Ma na matena i apara hato na kare, ngaia ki bonotenia na mamasiaganiha, suria ngaia ki vagevage, renia na karena i vora me mave.

²²Igamu nikâ kamu manga ngekana: igê na matena i ngekê igamu kamu anumanuma, ma inê kê page bâsigamu nikâ, ma igamu kamu page vagevage ngavê. Ma ki asa iana ta na enoni, vi ge hatungia na vagevageha iami.

²³Igê na tangiana ngekana igamu ki asa, vi gamu page hagateê renia ta na marâ. I monari, be vi tangagamu: o Vaemaku ki page vategamu na ani mavê na marâ, mu nungia tenia igê na raramohaku.

²⁴Tariha me i ngekê igamu kamu pe nungia rârâ ta na marâ igê na raramohaku. Mu nunginungi, hanana mu page nahunigi, hanana igamu kamu vagevage ngavê.

²⁵“Na marâ ngegana inê kê tamasigi tangagamu igê na tamasinga maramaraveta. Ma ki page arâ me na matena, inê ki hato, vi ve tamasi maramaraveta nikâ igê tangagamu, ma kê page tamasi mataha ma hete tangagamu renia o Vaemaku.

²⁶Igê na tangiana ngekana igamu kamu page nungia igê na raramohaku. Inê ki asa, ve nungia nikâ, ke tamanigamu,

²⁷suria o Vaemaku ngaia marena ki takuigamu. Ngaia ki takuigamu, suria igamu nga kanimu takuiê inê, ma kamu tongesuriê, vi inê kê râ me tenia God o Vaemaku.

²⁸Inê kê bani râ me tenia o Vaemaku ma kê râ i maveta. Ma i ngekê inê kê pania na maveta, ma kê arâ i pasina o Vaemaku.”

²⁹Ma na kariana ka vi tanga, ka vi: “Bâ, i ngekê igo ko tamasi mataha ngavê, mareha vi gu tamasi maramaraveta.

³⁰I ngekê nga igami kami girara, vi igo ko giraragi na ara ni marâ hato; igo ko pe hagatea na hagatenga tenia ta na enoni, suria igo ko bani girara. Tahema igami kami kahu tongesuria, vi igo ko râ me tenia God.”

³¹O Jesu ki arami, ki vi: “I ngekê ma vari kani mu tongesuriê?

³²Ma ki page arâ me na matena, ma ki sugia ma, vi igamu hato kamu gavagava hegitigi i pasimi, ma nga noga ma inê kanigê page hitahita so. Ma ki mareha, vi inê getegeteê, suria o Vaemaku ki gâga nga heniê tare.

³³Inê kê hagarongogamu renia na tarana ngekana, hanana mu marape, suria mu obâbahaku heniê. I maveta na mamasiaganiha ka tarahugamu. Mu ramoramo! Inê kê bani teharia na eraha i maveta!”