Read Kahua JOANE 17 Bible Online

JOANE 17 - Kahua bible

JOANE 17

¹Na matena i tamasi hato vikana o Jesu, ngaia ki atakê, ma ki vi: “Vaemaku, na matena ngekê gu hagabângenia igê na raramohana o Karemu, hanana o Karemu ke hagabângenia na raramohamu.

²Renia igo ko kasia, ki marungira na enoni hato, hanana ngaia ke vatera na enoni hato na mauriha mora ma tarema; gu bani katora, ke vora re na kariana.

³Manga na enoni, ma ka aitangisigo, vi igo ki na God monari gi tage togo, ma ka aitangisiê, vi inê ka no Jesu Kirisito, go hagatorangenia, ngaira ka nahunia na mauriha mora ma tarema.

⁴Inê kê bani hagabângenia na raramohamu i maveta, suria inê kê bani hatungia na tagaraha, go hagatorê renia.

⁵Vaemaku, gu vateê aporo na arahanga i pasimu, na arahanga, gê bani nahunia me i pasimu, matena na maveta ki mamênga.

⁶“Inê kê bani hagagirarara na enoni i maveta renigo, na enoni go bani atera tangê. Ngaira ka na animu, ma igo ko tagarenira me tangê. Ngaira ka bani tê viteamu.

⁷Ma i ngekê ngaira ka girara, vi na ara ni marâ, go vateê renigi, ka râ me tenigo igo.

⁸Inê kê hagarongora renia na taroha, go hagatorê renia, ma ngaira ka tongesuria. Ma ngaira ka tongesuria, vi igo ko hagatorangeniê inê.

⁹“Inê kê nungigo tangara. Inê kê pe nungigo tangara na enoni ni maveta. Inê kê nungigo tangara hete na enoni, go hagatorê renira, suria ngaira ka na animu.

¹⁰Na enoni hato, ga vora na aniku, ka na animu; ma na enoni hato, ga vora na animu, ka na aniku. Ma ngaira ka hagabângenia na raramohaku.

¹¹Ma i ngekê inê kê sugi râ vê i pasimu. Inê ki hato, ve oga i maveta, ma ngaira, ngaira ka oga i maveta. Vaemaku koro hunigo, gu anumasira renia na raramohamu, go bani vateê, hanana ngaira ka obâbahaku manga na vere tage togo, tagenana manga igerua garu obâbahaku manga na vere tage togo.

¹²Matena gê gâga mênga henira, inê kê anumasira renia na raramohamu, go vateê. Inê kê anumasira, ma ki mareha na hitangita, vi ge tasi, nga noga ma na mane ni tasi, hanana ga hagamonaria na tamasinga i na Buka Apuna.

¹³Ma i ngekê inê kê sugi râ vê i pasimu, inê kê visigi na marâ ngegê, matena gê gâga menga i maveta, hanana vi ngaira ka obâbakoro ngavê, tagenana manga inê gê obakoro ngavê.

¹⁴Inê kê hagarongora renia na taroha, go hagatorê renia. Ma na enoni ni maveta ka kitenira, suria ngaira ki mareha vi na tamata na enoni ni maveta, tagenana ma manga inê ki mareha vi na tamata na enoni ni maveta.

¹⁵Inê kê pe nungigo, hanana vi gu torera hura tenia na maveta, ma kê nungigo, hanana vigo anumasira hete tenia Satana.

¹⁶Ngaira ka mareha vi na tamata na enoni ni maveta, tagenana ma manga inê ki mareha vi na tamata na enoni ni maveta.

¹⁷Gu katora, ke nganganihaga igê na monariha renigo, hanana ge voravora re na kariamu. Na tamasinga iamu ki na monariha.

¹⁸Inê kê hagatorangenira i maveta, tagenana ma manga igo go hagatorangeniê i maveta.

¹⁹Hanana gê tamanira, inê kê tagareniê mareku tangago, kê vora re na kariamu, hanana ngaira nikâ ka tagarenira mareta maninga tangago, ka voravora re na kariamu.

²⁰“Inê kê pe nunginungi tangara na kariaku, ma tangara nikâ hete na enoni, ga page tongesuriê, suria na kariaku ka taroheniê.

²¹Vaemaku, inê kê nungigo, hanana vi ngaira hato ka obâbahaku manga na vere tage togo. Inê kê nungigo, hanana ngaira hato ka obâbahaku henigerua, tagenana ma manga igerua garu obahaku manga na vere tage togo ma, hanana na enoni i maveta ke page tongesuria, vi igo ko hagatorangeniê.

²²Inê nga kanigê vatera na raramohamu, go vateê, hanana ngaira ka obâbahaku manga na vere tage togo, tagenana ma manga igerua garu obahaku manga na vere tage togo ma.

²³Inê nga kê angarira ngaira, ma igo nga ko angariê inê, hanana ka obâbahaku ngavê manga na vere tage togo, hanana na enoni i maveta ka page girara, vi igo ko hagatorangeniê, ma ko takuira ngaira, tagenana manga go takuiê inê.

²⁴“Vaemaku, igo ko bani katora, ka vora re na kariaku. Ma inê kê obanira, vi ga gâga heniê i pasiku, hanana ngaira ka page bâsia na raramohaku, go bani vateê; suria igo ko bani takuiê me, matena na maveta ki mamênga.

²⁵Vaemaku, igo ko katogi tare na marâ, ga koro ma ka oto. Na enoni ni maveta ka pe girarago, ma inê nga kê aitangisigo, ma na kariaku ka girara, vi igo ko hagatorangeniê.

²⁶Inê kê bani hagagirarara renigo, ma kê page ama ni katokato nga vikana, hanana ngaira ka hetakuiheri, tagenana manga igerua garu hetakuiheri, ma hanana nikâ inê gê angarira.”