Read Kahua JOANE 18 Bible Online

JOANE 18 - Kahua bible

JOANE 18

¹Matena i nunginungi hato vikana, o Jesu, ngaia ma na kariana ka hura vê, ma ka tarê igê na marahiragana na ve i Keteroni. Ma i ngekana ki oga igê ta na mu, mo Jesu ma na kariana ka banu igê.

²O Juta, na ani i hagavuringenia o Jesu, ngaia ki bani girara nogana na mu ngekana, renia hagarako o Jesu ma na kariana ka hakuhaku tare i ngekana.

³Tahema tanga na mu ngekana o Juta ki merarâ igê na haku na mane ni me ni Roma, ma nikâ tani na mane ni me, ga anumasia na Ruma ni Rotu, ga hagatorangenira na mane ni vogasiha ga teha ma na Pariseo. Ngaira ka tangaru, ma ka migirâ na laiti ma na mangate.

⁴O Jesu ki bani giraragi na ara ni marâ, ga page tarahua. Tahema ngaia ki ura râ, ma ki hagatera, ki vi: “O ti kanimu bâbâ renia?”

⁵Ngaira ka arami, ka vi: “O Jesu ni Nasarete.” Ma ngaia ki vi: “Ngaia kani inê.” O Juta, na mane i hagavuringenia, ki oga henira.

⁶Matena o Jesu ki vi tangara, ki vi, “Ngaia kani inê”, ngaira ka suga murisiga, ma ka vota i ano.

⁷O Jesu ki hagatera nikâ, ki vi: “O ti kanimu bâbâ renia?” Ngaira ka vi: “O Jesu ni Nasarete.”

⁸O Jesu ki aramira, ki vi: “Inê kê bani visia tangagamu, vi ngaia kani inê. Manga vi igamu, ma kamu bâbâ reniê, hoi, mu nakara vê na ani agê ke râ.”

⁹(Ngaia ki tamasi vikê, hanana vi hagamonaria na marâ, i bani visia, ki vi: “Vaemaku, mareha vê, vi ge tasi na ani gi tage togo na hitangita, go bani hagatorê renira, kê anumasira.”)

¹⁰O Simone Petero ki nahunia na tatapa borahu, ma ngaia ki amuria akê, ma ki tahurua renia na kare vurivuri iana na mane ni vogasiha i teha, ma ki retea râ na karingana i otona. Na atana na kare vurivuri ngekê ka no Malako.

¹¹O Jesu ki vi tanga o Petero, ki vi: “Gu naka aporo na tatapa borahu igê na angana. Go takusia vari, vi inê ki asa, ve tono na kâkâ na mamasiaganiha, o Vaemaku i vateê renia, vi gê totono?”

¹²Na haku na mane ni me ni Roma henia na araha iata ma na mane ni me iata na Siu ngaira ka hagatutuguhia o Jesu ma ka rakua,

¹³ma ka merâ hagenago tanga o Ana. Ngaia ki no hungâna o Kaiapa, na mane ni vogasiha i teha igê na harisi ngekana.

¹⁴O Kaiapa ngaia ki na ani, i vi tangara na meraha iata na Siu, ki vi: “I koro ngavê, vi na vere tage na mane ki meme urusira na enoni hato.”

¹⁵O Simone Petero ma ta na tamana karu râ suria o Jesu. Na tamana ngekê ma na mane ni vogasiha i teha karu hegirare bâkoro. Ngekê na tamana o Petero mo Jesu karu banu igê na beraro na ruma iana na mane ni vogasiha i teha.

¹⁶Mo Petero ki oga mavê i metara i maa ni para ni ruma. Ma hemuri na tamana o Petero ki aporo hura me, ma ki tamasi tanga na kere gete, i anumasia na maa ni para ni ruma, vi mebanu o Petero.

¹⁷Na kere gete, i anumasia na maa ni para ni ruma, ki hagatea o Petero, ki vi: “Igo nogamu vari ka na kariana o vani akana?” O Petero ki arami, ki vi: “Mareha! Inê ki mareha!”

¹⁸I magaroha ngavê. Tahema na kariana na mane ni vogasiha i teha ma na mane ni me ka bani tanga na gi renigi na maraha, ma ka ura rihia, ki rangira. Ngekana o Petero ki râ, ma ki ura henira, ki hagarara.

¹⁹Na mane ni vogasiha i teha ki surarea o Jesu renira na kariana ma renia na hagesuringa iana.

²⁰O Jesu ki arami, ki vi: “Inê kê tamasi mave tare i maata na enoni. Inê kê hagesurira tare na enoni i ruma ni sukuru ma i Ruma ni Rotu, na agua ga hakuhaku igê na enoni hato. Inê kê pe pinihia rârâ ta na marâ.

²¹Tanu hega kanigo hagate susuriê? Gu surarera na enoni, ga rongoê. Go hagatera renigi na marâ, gê visigi tangara. Ngaira ka giraragi na marâ, gê visigi.”

²²Matena o Jesu ki tamasi hato vikana, ta na mane ni me ki bahitaria, ma ki vi: “Siana ko tamasi vikana tanga na mane ni vogasiha i teha!”

²³O Jesu ki tamasi tanga, ki vi: “Manga inê, ma kê visia ta na marâ, i pe oto, hoi, gu hagatanga monari renia i maata na enoni hato igê. Ma ki manga na marâ, gê visia, ma ki oto, suria i hega kanigo bahitariê?”

²⁴Ma hemuri o Ana ki hagatorangenia o Jesu tanga o Kaiapa, na mane ni vogasiha i teha. Na varo, ga rakua renia, ki gâga, mênga i rimana.

²⁵O Petero ki ura ki hagarara mênga i ngekana. Na enoni getera, i tage rangira na gi i ngekana, ka hagatea, ka vi: “Igo nikâ vari ka na hitangita na kariana na mane akana?” Mo Petero ki hagaiga pusia marena, ki vi: “Mareha! Inê ki mareha!”

²⁶Ma ta na hitangita na kare vurivuri iana na mane ni vogasiha i teha ngaia ki na goana na mane, o Petero i bani retea na karingana, ki tamasi, ki surarea, ki vi: “Go takusia vari, vi inê kê pe bâsigo henia igê na mu?”

²⁷Nikâ o Petero ki vi: “I bara vê!” Ki parama, ma ki hagarite na kua mane.

²⁸Igê na mahogotana na meraha iata na Siu ka merâ o Jesu tenia na ruma iana o Kaiapa tanga na ruma raha iana na Gavumane. Ngaira mareta ka pe banu i ruma raha, suria ngaira ka obania, vi ga matarotaro suria na ramata igê na rotu, hanana ga girara, ga ngaua na ngêra na Paseka.

²⁹Ma ngekana o Pilato ki hura me i pasita, ma ki hagatera, ki vi: “Na ta kanimu tuguria renia na mane ikê?”

³⁰Ngaira ka arami, ka vi: “Manga vi ngaia, ma ke pe katoa na tarana, i era, igami ki asa, vigami merâ me tangago.”

³¹O Pilato ki vi tangara, ki vi: “Manga ngekê, mu me aporo i pasimi maremi, ma kamu hagatamasia surigi na ramata iami maremi.” Ngaira ka arami, ka vi: “Igami, ka manimanigami, vi siana kami nahuia na enoni ki meme.”

³²(Na tarana ngekê ki vora me, hanana i hagamonaria na marâ, i bani visia o Jesu, matena i tamasi renia na tarana, i page meme igê.)

³³O Pilato ki aporo banu i ruma iana, ma ki unia me o Jesu, ma ki hagatea, ki vi: “Igo vari ka na maneraha iata na Siu?”

³⁴O Jesu ki arami, ki vi: “I hega, na hagatenga ngekana ki râ me tenigo igo maremu, se tenira na enoni getera, ga tamasi tangago reniê?”

³⁵O Pilato ki arami, ki vi: “Go vi vari, vi na Siu kani inê? Na kariamu maremu ma na mane ni vogasiha ga teha, ngaira kani ga tagarenigo tangê! Na ta kanigo katoa?”

³⁶O Jesu ki arami, ki vi: “Na arahanga iaku ki mareha vi na marâ ni maveta. Manga na arahanga iaku, ma ke vora vi na marâ ni maveta, na kariaku ke meraheariha na meraha iata na Siu, hanana siana ke hagatotongoê. Inê kê pe mangara na maneraha i maveta ikê.”

³⁷I ngekana o Pilato ki surarea, ki vi: “I monari, vi na maneraha kanigo?” O Jesu ki arami, ki vi: “Igo nga kanigo visiê, vi na maneraha. Na marâ, gê vora tanga, ma kê râ me i maveta, ki manga ikê: gê tamasi renia na monariha. Na enoni, i taua na monariha, ngaia ki têtê viteaku.”

³⁸O Pilato ki hagate, ki vi: “Na ta ki na monariha?” Ma hemuri o Pilato ki aporo hura i pasita na Siu, ma ki vi tangara, ki vi: “Inê kê pe tarahua rârâ ta na marâ era i pasina, hanana vi ve suria kê hagaitangia renia.

³⁹Hoita, suria na Tangiana Raha na Paseka inê kê kasia hura tare ta na enoni tenia na ruma ni hagaitangiha, manga bani hanana. I hega, mu obaniê vari, vi gê rupasia tangagamu na maneraha iata na Siu?”

⁴⁰Ngaira ka ngere, ka aramia, ka vi: “Mareha! Mareha vi ngaia! Igami kami obania o Baraba!” (O Baraba ka na manero.)