Read Kahua JOANE 19 Bible Online

JOANE 19 - Kahua bible

JOANE 19

¹Ma hemuri o Pilato ki tagarenia o Jesu tangara na mane ni me, hanana ga ramusia.

²Na mane ni me ka aria na varo kakaruga, ma ka bagia i bêna o Jesu, ma ka aruha renia na gahu rotorotoaga memera.

³Ngaira ka râ i pasina, ma ka vi: “Mauri koro, maneraha iata na Siu!” Ma ka râ tanga, ka bahitaria.

⁴O Pilato ki hura me nikâ, ma ki vi tangara na enoni, ki vi: “Bâ, inê be torea hura me tangagamu, hanana mu girara, vi inê kê pe tarahua rârâ ta na mara era i pasina, hanana vi ve suria kê hagaitangia renia.”

⁵Ngekana o Jesu ki hura me. Na varo kakaruga i bêna, ma ka aruha renia na gahu rotorotoaga memera. O Pilato ki vi tangara, ki vi: “Bâ, ngaia ikê!”

⁶Matena na mane ni vogasiha ga teha ma na mane ni me, ga anumasia na Ruma ni Rotu, ka bâsia, ngaira ka ngere raha, ka vi: “Rapusia igê na kuruse! Rapusia igê na kuruse!” O Pilato ki vi tangara, ki vi: “Mu merâ, ma kamu rapusia igê na kuruse. Inê kê pe tarahua rârâ i pasina ta na marâ era, hanana vi ve suria kê hagaitangia renia.”

⁷Na Siu ka tamasi bê aporo, ka vi: “Igami kami nahunia na ramata, i vi, i tuguhigami, vigami nanahuia ki meme, suria ngaia ki visia marena, vi ngaia ki no Karena God.”

⁸O Pilato, matena i rongora, ga tamasi vikana, ngaia ki kahu magu ngavê.

⁹Ngaia ki aporo banu i ruma raha, ma ki hagatea o Jesu, ki vi: “I pasimu kani i he?” Mo Jesu ki muni ma.

¹⁰O Pilato ki vi tanga, ki vi: “I hega, go pe meêtamasi? Bâ, inê kê nahunia na ramoha, hanana gê rupasigo, ma nikâ na ramoha, hanana gê bonasira na mane ni me, ka rupasigo igê na kuruse.”

¹¹O Jesu ki arami, ki vi: “Manga vi God, ma ki pe vatego na ramoha ngekana, inê ki asa iaku, vi ve oga i ruguhana na ramoha iamu. Ma ngekana na mane, i tagareniê tangago, ngaia ki tasi ngavê teharigo igo.”

¹²Matena o Pilato ki rongo vikana, ngaia ki gunahia na tarana, hanana vi rupasia igê o Jesu. Ma na enoni ka ngere bê aporo, ka vi: “Manga igo, ma ko rupasia, igo ki mareha vi na kariana na maneraha i teha igê na Gavumae i Roma. Renia na enoni, i visia marena, vi maneraha, ngaia ki merongasia na maneraha i teha igê na Gavumane i Roma.”

¹³Matena o Pilato ki rongo hato vikana, ngaia ki mehura me o Jesu, ma ki oga so igê na atohana ni suriha, igê na agua, ga hêtana vi Ririhêna. (Ma na Siu ka visia, vi “Gabata”.)

¹⁴I sugia ma, vi ge ritova igê na tangiana, ga tatêha igê tanga na Paseka. O Pilato ki vi tangara na enoni, ki vi: “Bâ, na maneraha iami ikê.”

¹⁵Ngaira ka ngere bê aporo, ka vi: “Nahuia! Nahuia! Rapusia igê na kuruse!” O Pilato ki hagatera, ki vi: “Mu obaniê vari, vi gê rapusia na maneraha iami igê na kuruse?” Na mane ni vogasiha ga teha ka arami, ka vi: “Igami kami pe nahunia na maneraha, nga noga ma na maneraha i teha igê na Gavumane i Roma!”

¹⁶Ma hemuri o Pilato ki tagarenia o Jesu tangara, hanana ga rapusia igê na kuruse. Vikê ngaira ka merâ o Jesu.

¹⁷Ngaia ki hura vê, ma ki tora gapara renia na kuruse iana, ma ki ata vê igê na agua, ga hêtana vi “Ratana Bê”. (Na Siu ka visia, vi “Gologota”.)

¹⁸Ma i ngekana ngaira ka rapusia igê na kuruse. Ngaira ka rapusirerua nikâ igê na kuruse vererua na mane: tani i otona o Jesu, ma tani i mahana, mo Jesu i guputerua.

¹⁹O Pilato ki segea na tamasinga, ma ka naka i bêna na kuruse. Na tamasinga, i segea, ki manga ikê: “O Jesu ni Nasarete, na maneraha iata na Siu.”

²⁰Rako era na enoni ga tomania, suria na agua, ga rapusia igê o Jesu i na kuruse, ki hagarangia ma na hinua raha. Na tamasinga ngekana ki segea igê na tamasinga iata na Siu, ma iata na Ai ni Roma, ma iata na Ai ni Helasi.

²¹Na mane ni vogasiha ga teha iata na Siu ka vi tanga o Pilato, ka vi: “Siana ko segea na tamasinga, i vi ‘Na maneraha iata na Siu’, ma ko segea hete na tamasinga, i vivi, ‘Na mane ikê ki vi, Inê nga ki na maneraha iata na Siu.’”

²²O Pilato ki arami, ki vi: “Na tamasinga, gê segea, ki tâ i tâ.”

²³Matena na mane ni me ka rapusia hato o Jesu igê na kuruse, ngaira ka tavogi râ na gahu iana, ma ka votogi, ka tongani ngaira na vere he. Ma ngaira ka tavoa nikâ na tuguni, ga hêria, ki râ tare, ga pe tura takugi.

²⁴Na mane ni me ka hetamatamasi, ka vi: “I pe arari, vi ge tarisia. Nika, ge pile taisi ma renia, hanana ga girara, vi o ti kani page torea.” Na tarana ngekê ki vora me, hanana i hagamonaria na tamasinga igê na Buka Apuna, i vi: “Ngaira ka votogi, ka tonganigi na gahu iaku, Ngaira ka pile taisi renia na tuguni iaku.” Hoi, na mane ni me ka kato vikana.

²⁵Ma hagarangia na kuruse iana o Jesu ka ura kenana, ma kesina kenana, ma ka Maria na gete iana o Kolopa, ma ka Maria Matalena.

²⁶O Jesu ki bâsirerua kenana ma na kariana, i bani takuia bâraha, garu ura i ngekana. Ngekana ngaia ki vi tanga kenana, ki vi: “Kego, o karemu ikê.”

²⁷Ma hemuri ki vi tanga na kariana, ki vi: “Bamane, kenamu ikê.” Ma ki haganega tenia na matena ngekana na kariana ngekê ki merâ kenana o Jesu i pasina.

²⁸O Jesu ki bani girara, vi na matena ngekana na ara ni marâ ka uhu. Ma nikâ ngaia ki hagamonaria na tamasinga igê na Buka Apuna, ma ki vi: “I mamata na rioku.”

²⁹I ngekana ki oga igê na apira, i vunu renia na vaini mahe. Ngaira ka anumia na rumurumu igê na vaini, ga takerenia igê na apinige na hisopo, ma ka tagarenia akê igê na gaviharana.

³⁰O Jesu ki tono na vaini, ma ki vi: “E, i hato, i uhu noga.” Ki tubê so na bêna, ma ki me.

³¹Ma hemuri na meraha iata na Siu ka nungia o Pilato, hanana vi hagamarumungenira, ka tahuru barugigi na êgata na mane, ga kavire igê na kuruse, ma ka tavogi vato na gahuata tenigi na kuruse. Ngaira ka kato vikana, suria i ngekana ki na tangiana ni tatêha, ma ngaira ka pe obanigi na gahuata, vi ge kavire igê na kuruse igê na Tangiana ni Mamaroha, suria na Tangiana ni Mamaroha ngekana ki na tangiana raha teha.

³²Tahema na mane ni me ka râ, ka tahuru barugigi na êgaterua na mane, ga rapusirerua igê na kuruse henia o Jesu; hagenago ta na mane, ma hemuri ta na mane.

³³Ma na matena ga râ me tanga o Jesu, ngaira ka bâsia, i bani me hunu. Tahema ngaira ka pe tahuru barugigi na êgana.

³⁴Ma ta na hitangita na mane ni me ki rupukurua na ravona o Jesu renia na ora, ma ki parama, ma karu gogo me na gapu ma na ve.

³⁵Na ani, i bâsia, i vora me na tarana ngekana, ki tamasia, hanana vi igamu kamu tongesuri. Na tarana, i visia, ki monari, ma ngaia ki girara, vi ngaia ki tamasi monari.

³⁶Na tarana ngekê ki vora me, hanana i hagamonaria na tamasinga igê na Buka Apuna, i vi: “I asa, vi ge tahuru barugia tagua na surina.”

³⁷Ma ta na tamasinga igê na Buka Apuna ki vi nikâ: “Na enoni ka page boretenia na ani, ga rupukurua na ravona renia na ora.”

³⁸Ma hemuri o Josepo ni Arimatea ki nungia o Pilato, hanana vi hagamarumungenia na gahuana o Jesu tanga, ki torea ma ki naka. (O Josepo ngekê ki na kariana pinihi o Jesu ma, suria ma ngaia ki magutenira na meraha iata na Siu.) O Pilato ki hagamarumungenia na gahuana o Jesu tanga. I ngekana o Josepo ki râ, ma ki torea vê na gahuana.

³⁹O Nikotemo ki râ henia o Josepo, ma ki migirâ na makoni na marâ, i sigini koro, ga torarigi re na tavoni na apinige na mira ma na ngangani na apinige na aloe. Na higahigani ki teharigi na kilo tangahuru gi oru.

⁴⁰Ngairerua ngegana karu torea na gahuana o Jesu, ma karu momonea renigi na makoni na marâ ngegana, ma karu baraia renigi na gahu siki ni gahua. Na tarana, garu katoa, ngekê ki na tarana iata na Siu, hanana ga hagarêgi na gahuata na enoni, ga bagira.

⁴¹I hagarangia na agua, ga nahuia ki me igê o Jesu, ki oga igê ta na mu. Ma i rarona na mu ngekana ki oga igê ta na matiku haoru, ma ki mareha, vi ge bagia rârâ igê ta na enoni.

⁴²Ma suria ngaia ki na tangiana ni tatêha iata na Siu tanga na Tangiana ni Mamaroha, ma suria na matiku ki goga hagarangi ma, ngairerua karu bagia o Jesu i rarona.