Read Kahua JOANE 2 Bible Online

JOANE 2 - Kahua bible

JOANE 2

¹Na tangiana gi rua i muri ki na hagataku i hinua i Kena i Galilea. Na kenana o Jesu ki oga i ngekana nikâ.

²Ma ka guhira me nogata o Jesu ma na kariana tanga na ngêra na hagataku.

³Matena i hato na vaini, kenana o Jesu ki vi tanga o Jesu, ki vi: “Na vaini ki hato tenira.”

⁴O Jesu ki arami, ki vi: “Kego, siana ko tateaga. Na matena iaku ki mamênga.”

⁵Ma kenana o Jesu ki vi tangara na enoni, ga votovoto ngêra, ki vi: “Mu katogi na marâ, i page visigi tangagamu.”

⁶Igê na rotu iata na Siu ka oga na ramata renia na tananiha. Tahema i ngekana ka nakagi igê na tukiri na hê gi ono tanga na ve. Na ani gi tage na tukiri ki ararigi na 80 se na 120 na lita ga vunuvunu.

⁷O Jesu ki vi tangara na enoni, ga votovoto ngêra, ki vi: “Mu hagavunusigi na tukiri igê renigi na ve.” Ngaira ka hagavunusigi.

⁸Ma ngaia ki vi tangara, ki vi: “Hoi, i ngekê mu apegi na ve, ma kamu totora râ tanga na mane, i bâsuria na ngêra na hagataku.” Ma ngaira ka tora râ tanga.

⁹Ma ngaia ki namigi anaki na ve, ma na ve ka bani vora re na vaini. Ngaia ki bagatatako, vi: “I he kani hata ni râ me igê na vaini?” (Ma na mane, ga votovoto ngêra, ga bani apegi na ve, nga noga ma ngaira kaniga girara.) Vikê ngaia ki unia me na mane, i êragi haoru,

¹⁰ma ki vi tanga, ki vi: “Ga vatera hagenago na enoni na vaini koro teha ngavê manga bani hanana, ma na matena na enoni ka totono maninga hato, ma hemuri ka kahu vatera na vaini purua. Ma igo ko naka na ani koro ngavê na vaini mataro me i ngekê!”

¹¹Na mena i Kena i Galilea ngekana ki na ani i hagenago na mena tarani na mena iana o Jesu. I ngekana ngaia ki hagabângenia na raramohana. Tahema na kariana ka tongesuria.

¹²Ma hemuri o Jesu, ma kenana, na goana, ma na kariana ka soso tanga i Kapenamu, ma ka oga i ngekana surigi na tangiani haritamani.

¹³I sugia ma, vi na Tangiana Raha na Paseka iata na Siu. Tahema o Jesu ki akê i Jerusaleme.

¹⁴Igê na beraro na Ruma ni Rotu ngaia ki tarahura igê na mane, ga hagavuringenira na puruka, na sipi, ma na kuvê, ma ki tarahura nikâ na mane, ga hagaurisingenigi na haga igê na bea.

¹⁵Ngaia ki hirigia na varo, ma ki ramusira na puruka ma na sipi renia, ma ki taringenira hura tenia na Ruma ni Rotu. Ngaia ki horogi na bea iata na mane, ga hagaurisi na haga, ma ki sikirenigi na maani na haga.

¹⁶Ngaia ki ramonira na mane, ga hagavuringenira na kuvê, ki vi: “Mu merahura! Siana kamu katoa na ruma iana o Vaemaku renia vi na ruma ni hagavuringa!”

¹⁷Ma na kariana ka kahu takusia aporo na tamasinga igê na Buka Apuna, i vi: “Na takuiha iaku tanga na Ruma iamu, God, ki hagamesiê.”

¹⁸Na Siu ka hagatea, ka vi: “Na mena ta kanigo girara go katoa, hanana mi girara, vi igo ko nahunia na ramoha, ko katokato vikana?”

¹⁹O Jesu ki arami, ki vi: “Mu hogea na ruma iana God ngekê, ma surigi na tangiani gi oru inê kê page torea aporo.”

²⁰Ngaira ka hagate, ka vi: “Igo ko takusia vari, vi go torea aporo surigi ma na tangiani gi oru? Surigi na harisi tangahuru ge he matara ke ono kaniga tagarahia na Ruma ni Rotu ngekê!”

²¹Ma na matena o Jesu i tamasi renia na ruma ni rotu, ngaia ki tamasi renia na apena.

²²Na matena ngaia ki bani mêri aporo tenira na enoni, ga me, na kariana ka kahu takusigi aporo na tamasinga ngegana, ma ka tongesurigi na tamasinga igê na Buka Apuna ma na tamasinga, i visigi o Jesu.

²³Matena o Jesu ki oga i Jerusaleme suria na Tangiana Raha na Paseka, na enoni rako ka tongesuria, renia ga bâsigi na mena, i tanugi.

²⁴Mo Jesu ki pe hagêguritogo renira, suria ngaia ki bani giraragi maninga na parongata na enoni.

²⁵Henaka i mareha rârâ ta na enoni, vi ge hagagirara renira na enoni, ma ngaia ki bani giraragi maninga na aitangihata na enoni.