Read Kahua JOANE 20 Bible Online

JOANE 20 - Kahua bible

JOANE 20

¹Igê mahogotana na Sate, matena i mamavega, ki arâ ka Maria Matalena, ki vatugia na matiku, ma ki rigia na purupuru na hê, ga bani purisia râ tenia na maana na matiku.

²Ngaia ki tango tangarerua o Simone Petero ma na tamana, na ani o Jesu i takuia bâraha, ma ki vi tangarerua, ki vi: “Na Araha ka bani torea tenia na matiku, ma igami kami pe girara, vi i he kaniga naka igê!”

³Vikana o Petero ma na tamana karu râ tanga na matiku.

⁴Ngairerua karu tango. Ma na tamana o Petero ki tango teharia, ma ki ata hagenago igê na matiku.

⁵Ngaia ki hanege banu, ma ki bâsigi na gahu siki ni gahua, ma ngaia ki pe banu i rarona.

⁶O Simone Petero ki ata me hemuri, ma ki tari oto banu i rarona. Ngaia ki bâsigi na gahu siki ni gahua, ga tâ i ngekana.

⁷Ma ngaia ki rigia nikâ na gahu, ga baraia renia na bêna o Jesu. Ma na gahu ngekana ki pe tâ henigi na gahu siki ni gahua, ma ka rumia, ki tâ râ ma i na agua getea.

⁸Ma hemuri na tamana o Petero, i bani hagenago me tanga na matiku, ngaia ki banu nogana, ki bâ, ma ki tongesuri.

⁹(Henaka i manga ngekana, ma ngairerua karu pe tako mataha mênga renia na tamasinga igê na Buka Apuna, i visia, vi i tuguhia, i mauri aporo tenia na mera.)

¹⁰Ma ngairerua karu aporo.

¹¹Ka Maria ki ura i metara na matiku, ma ki angi. Matena i angiangi mênga, ngaia ki hanege banu igê na matiku.

¹²Ngaia ki bâsirerua na angero gi rua, garu oga so igê na agua, i bani tâ igê na gahuana o Jesu; tani i bêrunga, ma tani i gusiga. Ngairerua karu tuguni siki.

¹³Ngairerua karu hagatea, karu vi: “Kego, hega kanigo angi?” Ngaia ki arami, ki vi: “Na Araha iaku ka bani torea vê, ma inê kê pe girara, vi i he kaniga naka igê!”

¹⁴Ma hemuri ngaia ki ahoro râ, ma ki bâsia o Jesu, i ura i ngekana. Ma ngaia ki pe girara, vi o Jesu.

¹⁵O Jesu ki hagatea, ki vi: “Kego, hega kanigo angi? Ti kanigo bâbâ renia?” Ka Maria ki takusia ma, vi ngaia ki na mane, i tagara i mu ngekana. Tahema ngaia ki tamasi tanga, ki vi, “Vego, manga igo, ma ko torea vê, gu visia me tangê na agua, go naka igê, hanana ve râ be torea.”

¹⁶O Jesu ki vi tanga, ki vi: “Maria!” Ma ka Maria ki ahoro râ tanga, ma ki visia igê na tamasinga iata na Siu, ki vi: “Rabuni”, (i vi “Mane ni hagesuringa”).

¹⁷O Jesu ki vi tanga, ki vi: “Siana ko tauê, suria i mamênga, vi ve aporo i pasina o Vaemaku. Go arâ, ma ko hagarongora na kariaku, vi inê kê aporo i pasina na ani, i Vaemaku ma ki Vaemata, ki God iaku ma ki God iata.”

¹⁸Ngekana ka Maria Matalena ki râ, ma ki hagarongora na kariana o Jesu, vi ngaia ki bâsia na Araha, ma ki visigi tangara na marâ, i hagatora renigi o Jesu.

¹⁹I hihite nuni igê na Sate ngekana. Na kariana o Jesu ka oga haku i ruma, ma ka purusigi na maa ni ruma, suria ngaira ka magutenira na meraha iata na Siu. Mo Jesu ki râ me, ma ki ura henira, ma ki vi: “Na marapeha henigamu.”

²⁰Matena i tamasi hato vikana, ngaia ki hagabâsira renigi na rimana ma na ravona. Na kariana ka vagevage teha ngavê, matena ga bâsia na Araha.

²¹Mo Jesu ki vi tangara nikâ, ki vi: “Na marapeha henigamu. Tagenana ma, manga o Vaemaku i hagatorangeniê inê, inê nogaku be hagatorangenigamu igamu.”

²²Matena i tamasi hato vikana, ma ngaia ki uhira, ma ki vi: “Ge angarigamu na Higona Apu.

²³Manga mu bonotenigi na tasi iata na enoni, God ki bonotenigi ngavê nogana; ma ki manga mu pe bonotenigi, ngaigi ki gâga mêngagi.”

²⁴O Toma ki na hitangita na kariana o Jesu, (ga hêtana nikâ vi Karepapa). Ngaia ki pe oga henira na tamana, matena o Jesu i vora tangara.

²⁵Ngekana na tamana ka vi tanga, ka vi: “Igami kami bâsia na Araha!” O Toma ki vi tangara, ki vi: “Manga inê, ma kê pe bâsigi na oreni na nila i rimana, ma kê pe naka na kakêku i raroni na maara ngegana, ma kê pe naka na rimaku igê na ravona, i asa hagetage, vi ve tongesuria.”

²⁶Igê na Sate i na wiki i muri me na kariana o Jesu ka oga haku nikâ i ruma, mo Toma ki kahu oga henira. Na maa ni ruma ka purupuru. Mo Jesu ki râ me, ma ki ura henira, ma ki vi: “Na marapeha henigamu.”

²⁷Ma tanga o Toma ngaia ki vi: “Gu naka na kakêmu ikê, ma ku bâsirerua na rimaku. Gu gusia me na rimamu, ma ku naka igê na ravoku. Gu tongesuri, ma siana ko takotako tugupu.”

²⁸O Toma ki aramia, ki vi: “Araha iaku ma God iaku!”

²⁹O Jesu ki vi tanga, ki vi: “Igo ko tongesuri, suria ma vari go bâsiê, iê? Ga babarisi na enoni, ga tongesuri, naka ma ga pe bâsiê!”

³⁰I maata na kariana o Jesu ki katogi rako na ani getigi na mena, na ani ga pe segegi so igê na buka ikê.

³¹Ma ka segegi so ma na ani ngegê, hanana mu tongesuria, vi o Jesu ki na Mesaia mo Karena God, ma hanana mu nahunia na mauriha mora igê na raramohana, suria mu tongesuria.