Read Kahua JOANE 21 Bible Online

JOANE 21 - Kahua bible

JOANE 21

¹Ma hemuri o Jesu ki vora nikâ tangara na kariana igê na Rano i Tiberiasi. Ngaia ki vora tangara vikê.

²Ngaira ka oga haku o Simone Petero, mo Toma (na ani ga hêtana vi Karepapa), mo Natanaele (ni Kena i Galilea), mo karena gi rua o Sebeteo, ma na kariana gi rua o Jesu nikâ.

³O Simone Petero ki vi tangara na tamana, ki vi: “Inê be râ, be hugo siare.” Ngaira ka vi: “Igami kami arâ henigo.” I ngekana ngaira ka tage igê na kere haka, ma ka râ. Ma igê na bungiana hagenani ngekana ngaira ka nagia ve.

⁴Matena i raboa na arito, o Jesu ki ura i one, ma na kariana ka pe bâgirara, vi o Jesu.

⁵Ma ngaia ki hagatera, ki vi: “Bamane, mu hugora vari na siare?” Ngaira ka arami, ka vi: “Mareha vê! Mi nagia ve ma.”

⁶Ngaia ki vi tangara, ki vi: “Mu kasia na hugo iami i otona na haka, ma kamu page hugora tani.” Vikana ngaira ka kasia na hugo, ma ki bara iata, vi ge okea aporo kê me, renia ga togo rako era na siare.

⁷Na kariana, na ani o Jesu i takuia bâraha, ki vi tanga o Petero, ki vi: “E, na Araha ngekana!” Matena o Petero ki rongo, vi ngaia ki na Araha, ngaia ki hagesuru (suria ngaia ki kâhisi), ma ki reke so igê na rano.

⁸Ma na tamana ka râ me igê na kere haka, ka goto i one. Ngaira ka okea na hugo, i vunu renira na siare. Ngaira ka pe hagatê tenia na one, na ararina na 100 mita.

⁹Matena ga reke so i one, ngaira ka rigia na garapana na gi. Ma igê na gi ngaira ka bâsigi igê na siare ma na bereti.

¹⁰Mo Jesu ki vi tangara, ki vi: “Me tani na siare, mu kahu hugora.”

¹¹O Simone Petero ki tage igê na kere haka, ma ki okea i one na hugo, i vunu renigi na siare. Ngaigi hato na siare ka vora na tangarê gi tage ma na tangahuru gi rima matara gi oru. Ma ki henaka ma ga rako era vikana, ma na hugo ki pe tatari rârâ.

¹²O Jesu ki vi tangara, ki vi: “Râ me, kamu ngê!” Ma ki mareha na hitangita na kariana, vi ge hagatea rârâ, ke vi: “Ti kani igo?” Suria ngaira ka magu, renia ngaira ka bani girara, vi ngaia ki na Araha.

¹³Ngekana o Jesu ki râ, ki tavogi na bereti, ma ki vatera. Tagenana ma nikâ na siare.

¹⁴I ngekê ki na oruta na matena o Jesu i vora tangara na kariana, i murina i mêri aporo tenia na mera.

¹⁵Matena ga ngê hato, o Jesu ki hagatea o Simone Petero, ki vi: “Simone, karena o Joane, igo ko takuiê teha ngavê vari teharira ngaira hato igê?” Ngaia ki arami, ki vi: “Mako, Araha! Igo ko bani girara, vi inê kê takuigo.” O Jesu ki vi tanga, ki vi: “Go bâbâsurira na karena sipi iaku.”

¹⁶Na ruata na matena o Jesu ki hagatea, ki vi: “Simone, karena o Joane, igo ko takuiê?” Ngaia ki arami, ki vi: “Mako, Araha! Igo ko bani girara, vi inê kê takuigo.” O Jesu ki vi tanga, ki vi: “Go bâbâsurira na sipi iaku.”

¹⁷Na oruta na matena o Jesu ki hagatea nikâ, ki vi: “Simone, karena o Joane, igo ko takuiê?” O Petero ki rugu na obana, suria ki na oruta na matena o Jesu i hagatea, ki vi, “Igo ko takuiê?” Vikana ngaia ki arami, ki vi: “Araha, igo ko bani giraragi na ara ni marâ hato. Igo ko bani girara, vi inê kê takuigo!” Mo Jesu ki vi tanga, ki vi: “Go bâbâsurira na sipi iaku.

¹⁸I monari, be vi tangago: matena go karekare mênga, igo maremu ko nanê, hanana go arâ i na agua mavê, go obania. Ma na matena go merahaga, igo ko page gusigi na rimamu, ma na enoni getera ka page rakugo, ma ka page megorâ tanga na agua, go pe obania, vi gu arâ igê.”

¹⁹(Igê na tamasinga ngekê o Jesu ki naka ririhu renia na tarana, o Petero i page meme igê, ma ki page hagabângenia igê na raramohana God.) Mo Jesu ki vi tanga, ki vi: “Go takuê!”

²⁰O Petero ki ahoro râ, ma ki bâsia na tamana i murina, na ani o Jesu i takuia bâraha. Na ani ngekana ki na ani, i maroro râ tanga o Jesu, matena ga ngêngê, ma ki hagatea, ki vi: “Araha, o ti kani page hagavuringenigo?”

²¹Matena o Petero ki bâsia, ngaia ki hagatea o Jesu, ki vi: “Araha, vaniakê ki hega?”

²²O Jesu ki aramia, ki vi: “Manga ve obania, ge mêri rârâ, mataro me be aporo me, ma ke hega? I mareha vi na tagaraha iamu. Gu takuê!”

²³Ngekana na tamasinga renia ki haganega i pasita na kariana o Jesu, vi na kariana ngekana ki asa, vi ge me. Mo Jesu ki pe vi, vi ngaia ki pe meme. Ngaia ki vi hete, vi, “Manga ve obania, ge mêri rârâ, mataro me be aporo me, ma ke hega? I mareha vi na tagaraha iamu.”

²⁴Ngaia ki na kariana, na ani i tarohenigi na marâ ngegana, ma ki segegi so nikâ. Ma igami kami girara, vi na marâ, i visigi, ka monari.

²⁵Hoi, ga rako era mêngagi na ani getigi na marâ, o Jesu i katogi. Manga vi ge segegi tatage, inê kê takusia, na buka ka rakorako ngavê, ma na maveta ki pe ararigi.