Read Kahua JOANE 3 Bible Online

JOANE 3 - Kahua bible

JOANE 3

¹Ta na mane na atana o Nikotemo. Ngaia ki na meraha i pasita na Siu, ma ki na hitangita na Pariseo.

²I ta na bungiana ngaia ki vi tanga o Jesu, ki vi: “Rabai, igami kami girara, vi igo ki na mane ni hagesuringa, ma God ki hagatorangenigo. Suria i asa ta na enoni, vi ge girara, ge katogi na mena, go katogi, manga vi God ki pe tamania.”

³O Jesu ki arami, ki vi: “I monari, be vi tangago: i asa ta na enoni, vi ge oga igê na Arahanga iana God, manga vi ngaia, ma ki pe voravora haoru aporo.”

⁴O Nikotemo ki hagatea, ki vi: “I manga i he na enoni raha kani girara, vi voravora haoru aporo? I asa hagetage, vi ge banu aporo i obana kenana, ma ke vora me na ruata na matena!”

⁵O Jesu ki arami, ki vi: “I monari, be vi tangago: i asa ta na enoni, vi ge girara ge gâga igê na Arahanga iana God, manga vi ngaia, ma ki pe voravora haoru aporo renirerua na ve ma na Higona Apu.

⁶Na enaka ka votoa na mêriha tange na apeka, ma na Higona Apu ki votoa na mêriha tange na ataroka.

⁷Siana ko konekone, renia gê vi tangago, vi, ‘Igamu hato, ki tuguhigamu, vigamu voravora haoru aporo.’

⁸Na roga ki girara i rogaroga i na agua mavê, i obania. Go rongoa na aogana na roga, ma igo ko pe girara, vi i he kani râ me tenia, se vi i he kani arâ igê. Na enoni, i voravora haoru aporo renia na Higona Apu, ki manga ngekana nikâ.”

⁹O Nikotemo ki hagate, ki vi: “E, i tanu hega?”

¹⁰O Jesu ki arami, ki vi: “Igo ki na mane ni hagesuringa, i rongo raha na atamu i pasita na Isiraelita, tanu hega, kanigo ko pe girara?

¹¹I monari, gê vi tangago: igami kami tamasigi na marâ, mi giraragi, ma kami visigi na marâ, mi bani bâsigi. Ma ku bâ, i mareha ngavê ta na hitangimi, vi ge agana, ke tongesuria na taroha iamami.

¹²Igamu kamu pe tongesuriê, matena gê tamasi tangagamu renigi na marâ igê na apanena iana God.

¹³I mareha ta na enoni, vi ge bani akê i pasina God, nga noga ma o Karena Enoni, kani bani so me tenia i pasina God.”

¹⁴Igê na manihê o Moise ki ragea akê na u, i oga igê na nununa na ma na kapa. I tagenana ma, ga page ragea akê o Karena Enoni,

¹⁵hanana na ara ni enoni, i tongesuria, ki nahunia na mauriha mora ma tarema.

¹⁶Renia God ki takuira bâraha na enoni i maveta, tahema ngaia ki hagatorangenia me o Karena i tage, hanana na ara ni enoni, i tongesuria, ki pe meme, ma ki nahunia na mauriha mora ma tarema.

¹⁷Renia God ki hagatorangenia o Karena i maveta, mareha vi tanga ge surira ka hagaitangira na enoni i maveta, ma ki tanga hete i hagatahira.

¹⁸Na ara ni enoni, i tongesuria o Karena, ka pe suria ka hagaitangia. Ma na enoni, i pe tongesuria, ka bani suria ka hagaitangia, renia ngaia ki pe tongesuria o Karena i tage God.

¹⁹Na suriha ngekana ki manga ikê: na marara ki bani râ me i maveta, ma na enoni ka usitenia na marara, ma ka obania ma hete na mengo, suria ka erataga na parongata.

²⁰Ma na ara ni enoni, i erataga na parongana, ngaia ki kitenia na marara, ma ki usi, vi ge râ tanga na marara, suria ngaia ki pe obanigi na parongana erataga, vi ge rangaranga mave.

²¹Ma na ara ni enoni, i katoa na monariha, ngaia ki arâ tanga na marara, hanana na marara ki hagabângenia, vi ngaia ki paronga suria na obaniha iana God.

²²Ma hemuri o Jesu ma na kariana ka râ i Jutea. Ngaia ki oga i ngekana henira na kariana surigi tani na wiki, ma ki hagabatesimo.

²³O Joane nikâ ki hagabatesimo, i Ainone hagarangia i Salemi, suria i ngekana ka rako igê na ve. Na enoni ka râ i pasina, ma ngaia ki hagabatesimora.

²⁴(I nago tarana o Joane i oga i ruma ni hagaitangiha.)

²⁵Tani na kariana o Joane ka mehetuguri ta na Siu renigi na ramata igê na rotu renia na tananiha.

²⁶Tahema ngaira ka râ tanga o Joane, ma ka vi tanga, ka vi: “Rabai, i hega, igo ko girara na mane, i oga henigo i na apanena akê i ve i Jotano, ma ko tamasi renia? Ngaia kani hagabatesimo, ma na enoni hato ka râ tanga!”

²⁷O Joane ki arami, ki vi: “I asa ta na enoni, vi ge nahunia ta na marâ, manga vi God ma ki pe vatea renia.

²⁸Igamu maremi kamu rongoê, gê vi, ‘Inê kê mareha vi na Mesaia, ma God kani hagatorangeniê hagenago tarana.’

²⁹Na gete, i êragi haoru, ki tanga na mane, i êragia. Na tamana koro na mane, i êragi haoru, ki ura ma, ki karinga, ma ngaia ki vagevage, matena i rongoa na mane, i êragi haoru, i tamasi. Tahema inê kê vagevage teha.

³⁰I araria viga rakorako nga na kariana ngaia teharira na aniku inê.”

³¹“Na ani, i râ me tenia God, ki raha teharira na enoni hato. Na ani ni maveta, na maveta ki na anina, ma ngaia ki tamasigi na marâ ni maveta. Na ani, i râ me tenia God, ki raha teharira na enoni hato.

³²Ngaia ki tamasigi na marâ, i bani bâsigi ma ki bani rongogi, ma ki mareha ta na enoni, vi ge tongesuria na tamasinga iana.

³³Na ara ni enoni, i tongesuria na tamasinga iana, ngaia ki hagatanga monari igê na tarana ngekê, vi na tamasinga iana God ki monari.

³⁴Na ani, God i bani hagatorangenia, ngaia ki tamasigi na tamasinga iana God, suria God ki katoa na Higona Apu, ki angaria ngavê.

³⁵God Vaemana ki takuia o Karena, ma ki nakagi na ara ni marâ hato i marungana.

³⁶Na ara ni enoni, i tongesuria o Karena, ngaia ki nahunia na mauriha mora ma tarema. Ma na ara ni enoni, i pe tê viteana o Karena, ngaia ki asa, vi ge nahunia na mauriha mora ma tarema, ma God ki page ama ni hagaitangia nga tare ma tarema.”