Read Kahua JOANE 4 Bible Online

JOANE 4 - Kahua bible

JOANE 4

¹Na Pariseo ka rongo, vi ga rako na enoni, ga amaka suria o Jesu, ma ka batesimo rako teharira na kariana o Joane.

²(O Jesu marena ki pe hagabatesimo, nga noga ma na kariana kaniga hagabatesimo.)

³Matena o Jesu ki rongo vi na enoni ka tamasia, ngaia ki pania i Jutea, ma ki aporo tanga i Galilea.

⁴Igê na râha ngaia ki aharêvoro i Samaria.

⁵Ngaia ki ata i Sikare, i ta na hinua i Samaria, hagarangia na mako, o Jakobo ki vatea renia o Josepo, o karena.

⁶I ngekana ki oga igê na vekaru iana o Jakobo. Mo Jesu ki me na apena renia na râha, ma ki oga so ototo râ hagarangia na vekaru. Na matena ngekê ki na ararina na ritovagana.

⁷Ta na gete ni Samaria ki râ me, ki titi ve, mo Jesu ki nungia, ki vi: “Me na ve, be tono.”

⁸(Na kariana ka bani banu i hinua, hanana vi ga vurivuri ngêra.)

⁹Na gete ni Samaria ki arami, ki vi: “Igo na Siu, ma inê na gete ni Samaria! Tanu hega kanigo nungiê renia na ve?” (Na Siu ma na Ai ni Samaria ka hemeronge, ma na Siu ka pe ngêngê hetarênge henira igê na apira ma na kâkâ.)

¹⁰O Jesu ki arami, ki vi: “Manga go girara na votovoto iana God, ma na ani, i nungigo renia na ve, igo hete kanigo nungia ngaia, ma ngaia ki girara, i vatego renia na ve na mauriha.”

¹¹Na gete ki vi: “E. Araha, igo ko pe nahunia ta na marâ, hanana vigu okea akê me renia na ve, suria na vekaru ki so era. Ma i he kanigo page tarahua igê na ve na mauriha?

¹²Na êvarika o Jakobo ki bani vategia na vekaru ngekê. Ngaia, ma o karena, ma na sipi iana, ngaira hato ka totono na ve igê. Igo ko takusia vari, vi igo ko raha teharia o Jakobo, iê?”

¹³O Jesu ki arami, ki vi: “Na enoni, i totono tenia na ve ikê, ngaia ki page mamata aporo na riona.

¹⁴Ma na enoni, i totono na ve, gê girara gê vatea, ngaia i asa hagetage, vi ge page mamata aporo na riona. Renia na ve, gê page vatea renia, ki page vora manga na ve banga i pasina, i page votoa na ve na mauriha mora ma tarema.”

¹⁵Na gete ki vi: “Araha, me na ani ngekana na ve! Hanana siana ki mamata aporo na rioku. Hanana siana kê arâ me nikâ kê titi ve ikê.”

¹⁶O Jesu ki vi tanga, ki vi: “Gu râ, ku unia me o vaniamu, ma ko merâ me ikê.”

¹⁷Na gete ki vi: “Inê ki mareha o vaniaku.” O Jesu ki arami, ki vi: “Go vi koro, vi igo ko pe nahunia na mane.

¹⁸Igo ko bani êragira na mane gi rima, ma na mane, go oga henia i ngekê, ki mareha vi na mane iamu monari. I monari, go vi koro.”

¹⁹Na gete ki vi: “Araha, gê kahu girara, vi igo ki na poropete.

²⁰Na êvarimami ka vogasia God igê na hungana ngekê, ma igamu na Siu kamu vi, vi i Jerusaleme ki na agua, i tuguhigia, vi ga vogasia igê God.”

²¹O Jesu ki vi tanga, ki vi: “Kego, go tongesuria na marâ, gê visia tangago i ngekê: i page arâ me na matena, na enoni ki page hato, vi ge vogasia God Vaemaka igê na hungana ikê se vi i Jerusaleme.

²²Igamu na Ai ni Samaria kamu pe girara maninga, vi o ti kanimu vogasia. Ma igami na Siu kami girara, vi o ti kanimi vogasia, suria God ki hagatahira na enoni renira na Siu.

²³Ma na bevoana ki page arâ me, ma ki bani goga noga ikê, God Higona ki page katora na enoni, ka rahesia maninga God. Na enoni ngegê God Vaemaka ki obanira, vi ga rahesia maninga.

²⁴God ki na Higona, ma na enoni, ga rahesia, ki tuguhira, ga rahesia maninga igê na raramohana na Higona Apu, i hagagirarara renia na God monari.”

²⁵Na gete ki vi tanga, ki vi: “Inê kê girara, vi na Mesaia, ga visia vi o Kirisito, ngaia kani page arâ me. Ma na matena i arâ me, ngaia ki page hagagiraragia renigi na ara ni marâ hato.”

²⁶O Jesu ki arami, ki vi: “Ngaia kani inê, gê megotamasi,”

²⁷I ngekana ma na kariana o Jesu ka aporo me. Ngaira ka konekone bâraha, matena ga bâsia, i metamasi na gete. Ma ki mareha ta na hitangita, vi ge hagatea na gete, ke vi: “Na ta kanigo obania?” Se vi hagatea o Jesu, ke vi: “Suria i hega kanigo metamasi na gete?”

²⁸Ma na gete ki pania so na pi ni ve, ma ki aporo i hinua iana, ma ki vi tangara na enoni i ngekana, ki vi:

²⁹“Râ me, ke bâsia na mane, i vi tangê renigi na ara ni marâ hato, kê katogi. Na Mesaia vari?”

³⁰Ngekana ngaira ka râ, ka bâsia o Jesu.

³¹I na matena nga ngekana na kariana o Jesu ka nungia nga, ka vi: “Rabai, gu ngê sisite!”

³²Ma ngaia ki arami, ki vi: “Na ngêra iaku, i tuguhiê, vi gê ngaua, igamu kamu pe girara.”

³³Vikana na kariana ka haganega ka hehagateri, ka vi: “Ta na enoni vari kani bani vatea na ngêra?”

³⁴O Jesu ki vi tangara ki vi: “Na ngêra iaku ki manga ikê: gê têtê viteana na ani, i hagatorangeniê ma kê hagahatongia na tagaraha, i hagatorê renia.

³⁵Na enoni ka vivi tare, ‘Na hageha ge he mêngagi, ma ki maua na mu na harisi.’ Ma be vi tangagamu: mu bâ, mu bâsigi maninga na mu. Na mu na harisi ka bani mêa i ngekê, ma ka arari ni opaha!

³⁶Na enoni, i opaopa na harisi, ma ki nakanaka tanga na mêriha mora ma tarema, ngaia ka bani vuria. Tahema enoni, i hasihasi, ma na enoni, i opaopa, karu vagevage haku.

³⁷Na enoni ka vivi tare, ‘Tani na enoni ki hasihasi, ma tani na enoni ki opaopa.’ Na tamasinga ngekê ki monari.

³⁸Inê kê bani hagatorangenigamu, kamu oparia na mu ni harisi, mu pe tagarahia maremi. Na enoni getera kaniga tagarahia, ma na meni na tagaraha iata kamu nahunia igamu.”

³⁹Rako na Ai ni Samaria i hinua i ngekana ka tongesuria o Jesu, suria na gete ki vi: “Ngaia ki vi tangê renigi na ara ni marâ hato, kê katogi.”

⁴⁰Tahema, matena na Ai ni Samaria ka râ me tanga o Jesu, ngaira ka nungia nga, vi gâga so henira. Mo Jesu ki oga so henira surigi na tangiani gi rua.

⁴¹Ma ka rako nikâ na enoni, ga tongesuria o Jesu renia na tamasinga iana.

⁴²Ma ngaira ka vi tanga na gete, ka vi: “I ngekê igami kami tongesuri, mareha vi surigi na marâ, go visigi, ma suria igami maremami hete kami rongoa, ma kami girara, vi monari, ngaia ki na Hagamauri iata na enoni i maveta.”

⁴³I murini na tangiani gi rua o Jesu ki tavoraha tanga i Galilea.

⁴⁴Renia o Jesu marena ki bani vi: “Na poropete na enoni i pasina ki asa, vi ge hagahigasia.”

⁴⁵Matena ngaia ki ata i Galilea, na enoni i ngekana ka unia banu i pasita, suria ngaira nogata ka bani râ i Jerusaleme tanga na Tangiana Raha na Paseka, ma ka bani bâsigi na ara ni marâ, i bani katogi o Jesu igê na Tangiana Raha ngekana.

⁴⁶Vikê o Jesu ki aporo tanga i Kena i Galilea, na hinua i bani urusia igê na ve, ki vora re na vaini. Ta na maneraha na gavumane ki oga i ngekana. O karena ki maeha, ma ki oga vê i Kapenamu.

⁴⁷Matena ngaia ki rongoa, vi o Jesu ki bani râ me noga tenia i Jutea tanga i Galilea, ngaia ki râ tanga, ma ki nungia, hanana vi arâ i Kapenamu, ma ki hagakomaga o karena, i sugi meme noga.

⁴⁸O Jesu ki vi tanga, ki vi: “Igamu na enoni, ki asa, vi gamu tongesuriê, manga i mareha, vi gamu bâsigi na mena ma na tagaraha raha.”

⁴⁹Na maneraha ki arami, ki vi: “Araha, râ me heniê, i era ma, ki me o kareku.”

⁵⁰O Jesu ki vi tanga, ki vi: “Gu râ, o karemu ki tahi.” Na mane ki tongesuria na tamasinga iana o Jesu, ki aharo vê ma ki râ.

⁵¹Matena i arâ vê i tara tanga i pasina, na kariana ka râ me vurusia, ma ka tarahua, ma ka hagarongoa, ka vi: “O karemu ki tahi.”

⁵²Ngaia ki hagatera, ki vi: “Na matena ta kani komaga igê o kareku?” Ngaira ka vi: “I nanora, igê na panehagana na arito, kani avogea na matoroha.”

⁵³Ma o vaemana ki girara râ, vi na matena ngekana ka na matena o Jesu i vi tanga igê, ki vi: “O karemu ki tahi.” Ma ngekana ngaia ma na ahemata iana ka tongesuria o Jesu.

⁵⁴Ngekana nga na ruata na matena o Jesu ki râ me tenia i Jutea tanga i Galilea, ma ki katoa igê na ruata na mena.