Read Kahua JOANE 5 Bible Online

JOANE 5 - Kahua bible

JOANE 5

¹Ma hemuri ki ata me ta na tangiana raha igê na rotu iata na Siu, mo Jesu ki akê i Jerusaleme.

²I ngekana i Jerusaleme ki oga igê ta na nonganonga raha. Ngaia ki oga hagarangia na maa ni para ni sipi, ma ka oga rihia na mamaruku gi rima. Igê na tamasinga iata na Siu na agua ngekana ka visia, vi Besata.

³Rako era na enoni, ga maeha, ka tâ igê na mamaruku ngegana: tani ka guru, tani ka tavi, ma tani ka meapeape. [Ngaira ka oga naasia na ve, hanana vi aripo.

⁴Suria tani na mateni na angero iana na Araha ki soso igê na nonganonga, ma ki katoa, ki aripo na ve. Na enoni, i maeha, i hagenago, ki so igê na nonganonga, matena i aripo na ve, ngaia ki komaga tenia na ani mavê na maeha, i tarahua.]

⁵Ta na mane, i tâ i ngekana, ki bani maeha surigi me noga na tangahuri harisi gi oru matara ke varu.

⁶O Jesu ki bâsia, i tâ i ngekana, ma ki bani girara, vi na mane ngekana ki bani maeha arihu me noga. Tahema ngaia ki vi tanga, ki vi: “I hega, go obania vari, vi go komaga?”

⁷Na mane, i maeha, ki arami, ki vi: “E, Araha, mareha ta na enoni, vi ge toreê hanana ge tauê so i ve, matena i aripo, suria manga gê gunaguna makira, vi gê rerere, ta na enoni getea ki hagenago so i ve teniê.”

⁸O Jesu ki vi tanga, ki vi: “Gu aharaga, ku rumi na banamu, ma ku migirâ.”

⁹Na mane ki komaga ototo râ. Ngaia ki rumi na banana, ma ki migirâ. Na tarana ngekê ki vora me igê na Tangiana ni Mamaroha.

¹⁰Vikana na meraha i pasita na Siu ka vi tanga na mane, i kahu komaga, ka vi: “Se, i ngekê ki na Tangiana ni Mamaroha, ma suria na Ramata iaka igê na Buka Apuna ki apu tangago, vi gu torea na banamu.”

¹¹Ma ngaia ki arami, ki vi: “Na mane, i hagakomagê, ki vi tangê, ki vi, ‘Gu rumi na banamu ma ko migirâ.’”

¹²Ma ngaira ka hagatea, ka vi: “O ti nga na mane, i vi tangago, ko rumi na banamu vigo migirâ.”

¹³Ma na mane, i kahu komaga ngekana, ki pe hagarea, vi o ti kani ngaia, suria o Jesu ki bani râ, renia ga rako era na enoni, ga oga i ngekana.

¹⁴Ma hemuri o Jesu ki tarahua na mane ngekana i Ruma ni Rotu, ma ki vi tanga, ki vi: “Rongo, i ngekê igo ko komaga. Ma siana ko tasitasi aporo nikâ, i era ma, ta na marâ, i era ngavê, ki tarahugo.”

¹⁵Ma hemuri ngaia na mane ki hura vê, ma ki hagarongora na meraha i pasita na Siu, ki vi: “Na mane, i hagakomagê, ngaia ki no Jesu.”

¹⁶Tahema na meraha i pasita na Siu ka haganega ka merongasia o Jesu, suria ngaia ki hagakomaga na mane igê na Tangiana ni Mamaroha.

¹⁷Ngekana o Jesu ki aramira, ki vi: “Na tagaraha iana o Vaemaku ki gâga tare, ma ki tuguhiê nogaku, vigê katoa.”

¹⁸Na tamasinga iana o Jesu ngekana ki katora na meraha i pasita na Siu, ka gatagata ngavê, hanana vi ga nahuia ki meme; mareha vi suria ma, vi ngaia ki aharê igê na ramata renia na Tangiana ni Mamaroha, ma suria nikâ vi ngaia ki vi, vi God ki no Vaemana, ma igê na tarana ngekana ngaia ki vi, vi God ma ngaia karu tagenaterua ma.

¹⁹Vikana o Jesu ki aramira, ki vi: “I monari, be vi tangagamu: o Karena ki pe katogi marena na marâ, nga noga ma na marâ, i bâsigi tenia o Vaemana. Na marâ, i katoa o Vaemana ki tanua, o karena ki katoa nogana.

²⁰Renia o Vaemana ki takuia o karena, ma ki hagabâsia renigi na marâ, i katogi ngaia marena. Ngaia ki page hagabâsia renigi na tagaraha raha ngavê teharia na ani ngekê, hanana i tanugi, ma igamu hato nga kamu page konekone ngavê.

²¹Tagenana manga o Vaemana, i hagamêrira na enoni, ga me, ma ki vatera na mêriha, i tagenana ma ngaia o Karena, i votoa na mêriha tangara na ani, i obanira.

²²Ma nikâ ngaia marena o Vaemana ki pe suria ta na enoni. Ngaia ki bani vatea o Karena na ramoha hato hanana i surira na enoni,

²³hanana na enoni hato ka kasia akê o Karena, tagenana manga ga kasia akê o Vaemana. Na enoni, i pe kasia akê o Karena, ngaia ki pe kasia akê nikâ o Vaemana, i hagatorangenia.

²⁴“I monari, be vi tangagamu: na enoni, i têtê viteaku, ma ki tongesuria na ani, i hagatorangeniê, ngaia ki nahunia na mauriha mora ma tarema. Ga pe suria, renia ngaia ki bani râ me tenia na mera tanga na mauriha mora.

²⁵I monari, be vi tangagamu: na bevoana ki page arâ me ma ki bani goga noga ikê, matena na enoni, ga me, ka page rongoa na ringena o Karena God, ma na ani, ga têtê viteana, ka page nahunia na mauriha mora.

²⁶Tagenana manga o Vaemana marena, i tonga na raramohana, hanana i hagamaurira na enoni, i tagenana ma, ngaia ki bani vatea na ramoha tanga o Karena, hanana i hagamaurira na enoni.

²⁷Ma ngaia ki bani vatea o Karena na ramoha, hanana i surira na enoni, renia ngaia ki no Karena Enoni.

²⁸Siana kamu konetenia na tarana ngekê, suria i page arâ me na matena, tangara na enoni hato i anoanota ga page rongoa na ringena,

²⁹ma ka page huhura me tenigi na anoanota. Ngaia ki page hagamaurira ngaira hato. Na ani, ga koro ma ka oto i maana God, ka page nahunia na mauriha mora, ma na ani, ga pe koro ma ka pe oto i maana, ngaia ki page hagaitangira.

³⁰“Inê kê pe tanugi mareku na marâ. Inê kê surira na enoni suria ma na obaniha iana God. Tahema na suriha iaku ki oto, renia inê kê pe tanua na marâ, gê obania inê mareku, ma na marâ ma, ngaia, i hagatorangeniê, i obania.

³¹“Manga inê geteê, ma kê hagatanga monari reniê mareku, mareha ta na enoni, vi ge tongesuriê, vi gê tamasi monari.

³²Ma ta na enoni getea râ ki hagatanga monari reniê, ma inê kê girara, na marâ, i visia reniê, ki monari.

³³Igamu kamu bani hagatorangenira na kariami tanga o Joane, ma ngaia ki visia na monariha reniê.

³⁴Inê kê pe hagêguria ta na enoni, hanana vi ge hagatanga monari reniê, ma inê kê visigi na tamasinga iana o Joane reniê, hanana God ki page hagatahigamu.

³⁵O Joane ki manga na laiti, i tarê ma ki mave, ma suria na kere matena abubu igamu kamu agana, kamu vagevage renigi na tamasinga iana, ga mavesigi na aitangihami.

³⁶Ma ki oga ta na marâ, i hagatanga monari reniê, mataha teharia na hagatanga monariha iana o Joane reniê. Ngaigi ki na mena, gê tanugi: na tagaraha raha, o Vaemaku ki hagatorê renigi ngaigi ka hagatanga monari reniê, ma ka hagabângenia, vi o Vaemaku ki hagatorangeniê.

³⁷Ma o Vaemaku, i hagatorangeniê, ki hagatanga monari nikâ reniê. Mu pe rongoa rârâ na ringena, ma kamu pe rigia rârâ na maana.

³⁸Tahema igamu kamu pe têa na taroha iana, suria igamu kamu pe tongesuria na ani, ngaia i hagatorangenia.

³⁹Mu hagesuringenia na Buka Apuna, suria mu takusia, vi i rarona igamu kamu page tarahua igê na mauriha mora ma tarema. Ma na Buka Apuna nga ngekê ki tamasi reniê inê.

⁴⁰Ma ki henaka, igamu kamu usi, vi gamu tê viteaku, hanana vi gamu nahunia na mauriha mora?

⁴¹“Inê kê pe obanira na enoni, vi ge hagahigasiê.

⁴²Inê kê pe hitenigamu. Inê kê girara, vi igamu kamu pe takuia God.

⁴³Inê kê bani râ me igê na raramohana o Vaemaku, ma igamu kamu usi, vi gamu rongoê. Ma na matena ma i arâ me ta na enoni, ma ki tamasi renia ngaia marena, igamu kamu kahu rongoa.

⁴⁴Igamu kamu obania, vi gamu hagahigasigamu heri, ma kamu pe uhungia maninga hete, vi gamu paronga koro, hanana God, i gi tage togo, ke hagahigasigamu. Tanu hega kanimu girara, vi gamu tongesuri?

⁴⁵Siana kamu takusia, vi inê kê page ranganigamu tanga o Vaemaku. O Moise ngaia ki na ani, i page ranganigamu, o Moise, mu tako hagêguria.

⁴⁶Manga igamu, ma kamu tongesuria monari o Moise, igamu kamu tongesuriê nogaku inê, suria ngaia ki bani sege reniê.

⁴⁷Ma ki suria igamu kamu pe tongesurigi na marâ, i segegi, manga i he kanimu girara, vi gamu tongesurigi na tamasinga iaku inê?”